صالون سيرياستوكس للعطلات(19-20-21-22) أيلول 2013

[BROKER]

يســــــعد مساكم

خطر على بالي افتح الصالون لو أني مقصر في المتابعة

لكن يبقى الصالون هو منطقة التواصل بين كل الأفكار والألوان والاختلافات

لهيك بحبه

[BROKER]

ما بعرف ليش متفائل كتيييير

بأن الحل السوري على الأبواب .....

مع انه مافي ضو للموضوع وغالبية الناس والمنطق والعقل بقولوا .... مطولة

لكن ما بعرف من وين جايب هالتفاؤل .... يمكن لحتى عيش لانو بدونه بفقد كل شي ....

[BROKER]

وصلنا لمرحلة ما كنا نتخيل نوصل الها .... هي المرحلة يلي ما تخيلنا تصير معنا صارت من سنتين
ولا زال الخيال يسير الى ان يصل المواطن السوري الى البحر ليذهب الى اوروبا ... إما غريقاً .... أو مريضاً .... أو بخير ... لينعم بحياة أفضل ...


لا شك انو كلنا منحب نعيش حياة كريمة اهم شي فيها "الكرامة" ؟؟؟ يمكن
ولا أهم شي فيها "الأمان" ؟؟؟ كمان يمكن .
ولا أهم ما فيها هو "الدخل" ؟؟ .......

على الأغلب تختلف الاهتمامات من شخص لآخر ....
ولكن الكل يتفق على "الامان" بالمستوى الأول فهو الاهم .... ثم نذهب الى الدخل الجيد ثم العيش بكرامة......

- يمكن كلنا فكرنا بالدول الاسكندافية يلي بتعطي راتب شهري للعاطل عن العمل وتؤمن له المسكن والحياة الكريمة .... وطبعاً توفر المال والمسكن والتعليم والتأمين الصحي .... للاجئين فيها

عم اتخيل القصة رغم الاغراء يلي فيها .... بحس بشعور العصفور يلي حاطينو عنا بالقفص وعم نحطلو اكلاتو ومياتو والامان بالقفص .... وما عليه إلا أن يأكل ويشرب ....

يا ترى هل هذا سبب خلق الانسان ؟؟

شو هدف وجودنا كبشر على الارض ؟؟

هل خلقت لكي آكل واشرب وعيش وانتظر الموت ؟؟

طيب فيي كمان اتبع هرم ماسلو ... يلي بقول انك رح تبدع في حال تأمن لك الحاجيات الاساسية ( امان - غذاء - تعليم - دخل ) ..... وبعدها بكمل بانسانيتي .... (مو غلط ) ..

تذكرت مقولة "ابحث عن نفسك لا عن رزقك فهو سيأتيك"

[رندة]

اسعد الله أوقاتكم جميعاً
صالون عامر بالفائدة والأصدقاء
افتتاح مميز استاذ رامي

[omar1964]

مساء الخير
شكرا استاذ رامي
ان شاء الله يا رب تضل متفائل
الحياة بدون أمل كتير صعبة .

كان حلم البرجوازي الصغير بيت و سيارة و زوجة جميلة و وظيفة بدخل جيد
نحنا و شباب اختصرنا هالحلم لأوضة مع حمام على سطوح بيت الأهل و موتور cg و زوجة معلمة
و بسطة بشي شارع .. البلدية ما تكحشنا منو
بعدين بالعمل الدؤوب و التعب و المثابرة
تطور الحلم و صار الواقع بدل البيت الصغير على السطح اتنين كبار
و مزرعة و بدل الموتور سيارة حديثة
و بدل البسطة محلات تجارية
مع اني كل عمري عم خطط لأختم حياتي برا البلد
بس لما بفكر بالهجرة او السفر بهالوقت و بهالطريقة بحس حالي رجعت للصفر
للبداية بكل شي بس مع همة و نشاط اقل و صحة تعبانة
كتير صعب لما بتوصل لخط النهاية بالسباق انك ترجع من اول و جديد

[arnouri]

أكثر المعارفي واصدقائي وأقاربي
اما أصبحوا تحت التراب أو سافروا
السفر هو من نعم الله ولكن بشرط ان تكون بمحض ارادتنا
فعلا السفر اصبح بحثا عن الكرامه والامان اكثر من العمل

[arnouri]

البعد عن الوطن ام البعد عن الاهل هم من منخصات السفر
ام شعور انسان بالوحدة وهو كائن اجتماعي

[عابر مجيب]

يسعد مساكم
من يومين وأنا عم حاول دخول المنتدى
جربت اربعة من عتاة كسر البروكسي ، واحد بس اشتغل وبيفتح الصفحة الرئيسية ، وبس اضغط أي شي بالصفحة ، كان كل المتصفح يقفل بالكامل ، ويقفل معو برنامج الكسر .
هلأ بالصدفة جربت ومشي الحال .
تصفحت شوي ، بس ماحبيت شارك ، لأني بحس أحيانا ان ممكن المشاركات تأثر على قرار الحجب . ما قدرت .
كان بالزمان يحطوا الناس بحصة بتمهون منشان ما يحكو ، يمكن صار لازم نعدل الاسلوب هلأ ونصير نلبس كفوف بلا أصابع حتى مانكتب .
عملت فتلة بصفحة الدولار وبدي أكتب ، بعدين لقيت الوقت متأخر ، فقلت بستنا صفحة بكرا بدل ما تروح الكتابة وما حدا يقراها .
يعني حاطين مقال للسيد رئيس الوزارة الحلقي ، أكيد ماعنده وقت يكتب ، وتارك الموضوع للمكتب الصحفي اللي حافظ كليشيهات بيكررها ، بس بيغيير بعض كلمات وأيام ما بيغير ، أكيد رئيس الوزارة واثق من حسن تطبيق السياسة ولذلك ما بيقرا شو كتبوا بأسمه . لأن مهما بلغ بالانسان ما ممكن يكتب هيك شي . والكاتب الحقيقي مو حاطط اسمه لذلك آخد راحته بالمزاودة .
أكتر من هيك مابتترقع .
المصرف العقاري رح يوزع دولار بفرع دمر ، ليش مايفتحولنا فرع بحفير الفوقى مو انسب ، وبعدين 50000 $ ، ليش ؟ قال لأن ما في اقبال ! شو بيتعلق على هيك كلام ؟!
برجع بعمل طله على التصريح وبهز بدني ، طيب إذا سيولته جيدة ، ليش اشترى من المركزي .
ما بعرف يعني مفكرين القارئ مهبول ؟!
فالج لا تعالج ، دق المي وهيه مي
من يوم يومنا بنسمع الخبر :
نظرا للإقبال الشديد ، ورغبة باقساح المجال أمام أكبر عدد من المواطنين ، تقرر تمديد فترة التقديم شهرا آخر . بالله وقت اللي بيكون الاقبال كبير ، مو المفروض يكون الاعلان :
نظرا لكثرة المتقدمين واكتمال العدد المطلوب تقرر قفل باب الانتساب اعتبارا من نهاية دوام اليوم .
طيب يقولوا تقرر تمديد القبول بدون ذكر السبب أقلها .
شغلة كمان وخلص تحملونا
واردات المغتربين لأهاليهم غطت على نقص كل واردات الدولة وزاد ، طيب واللي سافروا أديش أخدوا معهم دولارات ؟ .
وهي لبسنا الكفوف .

[روميو]

اقتباس: المشاركة الأصلية كتبت بواسطة عابر مجيب    يسعد مساكم من يومين وأنا عم حاول دخول المنتدى جربت اربعة من عتاة كسر البروكسي ، واحد بس اشتغل وبيفتح الصفحة الرئيسية ، وبس اضغط أي شي بالصفحة ، كان كل المتصفح يقفل بالكامل ، ويقفل معو برنامج الكسر . هلأ بالصدفة جربت ومشي الحال . تصفحت شوي ، بس ماحبيت شارك ، لأني بحس أحيانا ان ممكن المشاركات تأثر على قرار الحجب . ما قدرت . كان بالزمان يحطوا الناس بحصة بتمهون منشان ما يحكو ، يمكن صار لازم نعدل الاسلوب هلأ ونصير نلبس كفوف بلا أصابع حتى مانكتب . عملت فتلة بصفحة الدولار وبدي أكتب ، بعدين لقيت الوقت متأخر ، فقلت بستنا صفحة بكرا بدل ما تروح الكتابة وما حدا يقراها . يعني حاطين مقال للسيد رئيس الوزارة الحلقي ، أكيد ماعنده وقت يكتب ، وتارك الموضوع للمكتب الصحفي اللي حافظ كليشيهات بيكررها ، بس بيغيير بعض كلمات وأيام ما بيغير ، أكيد رئيس الوزارة واثق من حسن تطبيق السياسة ولذلك ما بيقرا شو كتبوا بأسمه . لأن مهما بلغ بالانسان ما ممكن يكتب هيك شي . والكاتب الحقيقي مو حاطط اسمه لذلك آخد راحته بالمزاودة . أكتر من هيك مابتترقع . المصرف العقاري رح يوزع دولار بفرع دمر ، ليش مايفتحولنا فرع بحفير الفوقى مو انسب ، وبعدين 50000 $ ، ليش ؟ قال لأن ما في اقبال ! شو بيتعلق على هيك كلام ؟! برجع بعمل طله على التصريح وبهز بدني ، طيب إذا سيولته جيدة ، ليش اشترى من المركزي . ما بعرف يعني مفكرين القارئ مهبول ؟! فالج لا تعالج ، دق المي وهيه مي من يوم يومنا بنسمع الخبر : نظرا للإقبال الشديد ، ورغبة باقساح المجال أمام أكبر عدد من المواطنين ، تقرر تمديد فترة التقديم شهرا آخر . بالله وقت اللي بيكون الاقبال كبير ، مو المفروض يكون الاعلان : نظرا لكثرة المتقدمين واكتمال العدد المطلوب تقرر قفل باب الانتساب اعتبارا من نهاية دوام اليوم . طيب يقولوا تقرر تمديد القبول بدون ذكر السبب أقلها . شغلة كمان وخلص تحملونا واردات المغتربين لأهاليهم غطت على نقص كل واردات الدولة وزاد ، طيب واللي سافروا أديش أخدوا معهم دولارات ؟ . وهي لبسنا الكفوف .

السلام عليكم
مشكور عالافتتاحية استاذ رامي
اي مشان الافتباس هلئ بتقلي ليش...............عسيرة البحصة من شي يومين كان في حدا عم يتزل هيك مشاركات بالمنتدى شغل استغباء واستهبال على نمط اللي ذكرتها حضرتك بهالمشاركة
انا حسب متابعتي لاحظت انو انت زلمة بدك تحكي كلمتك شو ما كانت العواقب نطرتك ترد وقتها...........ما رديت.............فكرت اني اكتبلك بق هالبحصة بقى (هون عسيرة البحصة) بس مدري ليش غيرت رايي والسلام.

[nido]

حطيت إيدك عل جرح أخ عابر .... و المضحك أنو ليوصل الواحد على دمر و يحصل هل كم دولار بكون دفع أكتر من فرق السعر عن السوق السودا .. هههههههه