المصاري كل شيء

[Dnouri]

أنا بعرف انو خبرتي بالحياة قليلة لاني صغيرة
بس صار عندي قناعة كبيرة انو مصاري هي مفتاح السعادة
يعني اذا انت بدك تروح مشوار مع أهلك او حتى رفقاتك مو بدك مصاري لتدفع لكافيه او المطعم طيب اذا قلنا انت بدك تروح سيران و تقعد عند قاسيون مو بدك مصاري حق الاكل و العصير و حصيرة يلي رح تقعد عليها
طيب اذا انت قررت انو تنزل تمشي بشام القديمة لحالك مو بدك مصاري حتى تدفع حق التياب يلي لبسها
طيب اذا بدك تسمع غنية حلوة بتذكرك بايام زمان مو أقل شي لازم يكون عندك راديو يلي حقو مصاري أو حتى راكب بتكسي يلي بدك تدفعلو مصاري بأخير
اذا قلنا سعادتك هي كلمة حلوة من أهلك او رفقاتك او حتى من شخص غالي على قلبك مو بدك مصاري حق موبايل و كمان لفاتورة او الوحدات
حتى لو كانوا معك بنفس البيت مو بدك حق هل البيت و غراض يلي فيه يعني كل شي بدو مصاري
هلا مصاري هي مفتاح السعادة مو السعادة بحد ذاتها بس من دونها ما في سعادة
ناس يلي بتقول مصاري ما دخلها بالسعادة عم تعيش بوهم كبير ورح تنصدم شي يوم
و برجع بقول هاد رايي الشخصي
و كمان مصاري هي الامان و راحة البال
صحيح أنا مو مادية أنا واقعية !

[qusay22]

موصحيح
المصاري ليست سعاده لانو الي راكب طياره خاصه ورايح فيها عفرنسا يتعالج من مرض مستعصي ماحيكون سعيد الي بيدبح مية خاروف بعزا ابنو مالو سعيد
يعني فينا نحكي انو الفلوس بتحقق جزء من السعاده وفينا ناخد مثالين واحد رايح هو وخطيبتو قاعدين ادام شي محل فطاير وعم ياكلو ومبسوطين اكتر من الي رايح على مطعم بالفور سيزن عم يحل مشاكل الشغل وئدامو سفره بتشهي الشبعان
الي راكب هو وولادو ومرتو بطرطيره ورايحين على شي بستان يفردو هل المجدره مع صحن المخلل واللبن مبسوطين اكتر من الي بياخد ولادو كل يوم عمزرعتون وياكلو مشاوي من كل الاصناف
لناخد مثلا كل واحد معو مصاري يحقق رغبة ببالو لما يحققها بيصير مابفكر فيها
في ناس عندها الفلوس احتياجات اساسيه وناس كماليه *
براي السعاده لما يكون الواحد مرتاح البال وبصحه جيده

*

[Salam L]

كلامك صحيح يادانة...

انا شخصيا بشوف مافي سعادة بدون مصاري... خصوصي بهاد الزمان..

كل شي بدنا نعمله او نساويه معتمد عليها...

اهم شي قلتيه انو هي مفتاح للسعادة.. مو شرط السعادة بحد ذاتها... لانو في حالات كتير بيكون فيها مصاااري كتير ومع هيك مافي سعادة لاسباب متل مرض او خلافات عائلية او كتير قصص....


مع هيك قصة المصاري مو بإيدنا.. وهي رزقة بالنهاية.... ووقت مانلاقيها الحل هو الرضا.... رضا بقضاء الله وقدره

[وليد متعب هزيم]

وجود المال لا يجلب حتما السعاده --ولكن غيابه يجلب حتما البؤس

[Tareq]

دانة صحيح انتي صغيرة بالسن بس كبيرة بالعقل والثقافة يلي عندك. صحيح المال أمر ضروري لكن لا يمت للسعادة باي صلة . وانا عمري 22 سنة كنت ادرس عند شيخ مع 3 شباب. كنا مرة طالعين من الدرس وراجعيين مشي ما معنا 5 ليرات لنركب سرفيس وكنت حاسس بسعادة والله العظيم مستعد ادفع كل شي حصلتوا من هداك الوقت لهلا لحتى ارجع بس حس بهالسعادة يوم واحد بس . السعادة لا تكون الا بالعطاء وليس شرط ان يكون مادي ولكن معنوي . احيانا مشوار على كتف نهر مع سندويشة جبنة بيسوى مية بوفيه مفتوح . القناعة هي من يحقق السعادة هذا من تجربتي.

الله يارب يكملك بعقلك ويهني صاحب النصيب لانو امثالك صاروا نادرين كتير

[iass]

كل واحد بيشوف سعادتو بمكان. يمكن الحب والعاطفة هي أهم من كل مال الدنية. يلي بيعيش بين الناس يلي بيحبوه عنجد. حتى لو كان عم يموت بالسرطان. رح يكون سعيد. أما يلي ما عندو حدا يحبو. لا أخ ولا أخت. لا رفيق ولا صديق. لا أم ولا أب. لا جار ولا جارة. ما رح يكون سعيد لو كان معو مال قارون. ما حدا بيقدر يشتري الحب المصاري. شوفي الولد الصغير. كتير من الأهل بيعطوه مصاري. بس ما بيكون مبسوط. بدو أنو يحضنوه. بس تحضن الأم ابنها. بيحس العالم كلو بهالحضن. لا بدو أكلات طيبة. ولا بدو شي. الفرح ما بيجي غير من المحبة. او الحب. أو العواطف الإيجابية.

[najm]

بدون عواطف وكلام رمانسي المصاري هي في معظم الحالات كل شي
وهي التي جمعتنا بي هذا الموقع اساسا
لكن عندما ترخص الارواح يرخص كل شيء
وقد اسمعتنا المدام رندة حكمة في احدى صالوناتها مازالت تراودني الى الان
الدم يتحدى الكلام .

[ام محي الدين]

حبيبتي دانة صحيح المصاري هي سبب السعادة في كثير من الحالات ولكنها سبب تعاسة لكثير من الناس
واكبر مثال ما يعانيه شعبنا وهو بالاساس المصاري
لولا طمع اصحاب النفوذ بالمصاري ما كان عانا شعبنا ما يعانيه الان نسأل الله ان يفرج عنهم وعنا

[مجد]

بالتاكيد المال مهم جدا مع تمام الصحة والرفقاء المخلصين ووجود الهدوء والامن (طبعا مو قصدي الامن الذي يفقدنا الامن الان).وكما قال اخونا نجم ان المال هو من جمعنا واكثر من يعرف قيمة المال هو من كان غني والظروف افقرته وهذا للاسف حدث الان بشكل لا يصدق مع كثير من العائلات السورية .والذي يعطي للمال اهمية عظمية هو عدم التكافل الاجتماعي وعدم دفع الاغنياء للزكاة .والا لو اعطي المال مقداره الحقيقي من المكانه لكان اقل قيمة مما نراه الان .واكبر مثال رفع اسعار اجار المساكن الان في الاحياء الامنه نسبيا ومؤقتا .يعطي المال اهمية عظيمة عند الذين ينامونبالشوارع دون ذنب ارتكبوه الا ان دورهم قد حل لتدمير منازلهم وكل مايملكون ودور الباقين في الطريق .وللاسف لم نرى من المؤيدون كما يسمون ويتبجحون باعذار كثيرة لهذا التاييد اية مساعده للذين ينامون بالشوارع من لاخوتهم السوريين وهم الاقدر ماليا بسبب فتح الدولة كل اسباب الغنى لكثير من هؤلاء من الرشوة الى السرقة المباشرةالى تسهيل امرهم في كل شئ .بينما فعلت عكس ذلك من جهة المواطنيين العاديين الذين يستهدفون بالقصف لاسباب غير مقنعه حتى للبلهان .

[/right]

[فراس السكري]

رغم اني ايدت كلام الاخ وليد وعجبني
ولكن احب ان اضيف شيء اخر ان المال شيء نسبي بين الاشخاص فما يسعدني بمئة الف يسعد غيري عشرة الاف ويسعد اخر بمئة ليرة فمحروم ان اعطيته مئة كانه ملك الدنيا وما فيها واعطي المقتدر مليون فلايجدها شيء ولكن تكمن سعادته عندما يعطي المقتدر الفقير فيفرح بفرحة الثاني فالمال هنا وسيلة سعادة وليس الاساس
ولكن يضحكي ايضا شغلة اخرى انكي تجدي الطفران اللي مامعها يومه بتلاقي طالع يشم هوا هو ولاده ويسعده اي شيء بينما تجدنا نرتب للمشوار ونتعذب ومن ثم نلغيه لعدم توافر الامكانية لهذا المشوار