اشارات تعجب لدى مضارب بالأسهم السورية

[Romeo]

عندي استفسارات كتيرة وبشوف انو لازم نلاقي الها اجابات وخلوني احكي بالعامية :
1- الموضوع الأول : أنا حامل سهم بركة من أول يوم تأسس فيو البنك ولهاد اليوم وكان عندي أمل بدخول السهم للبورصة بعد جهد جهيد بإرتفاع سعر السهم لسعرو المنطقي لكن يلي صاير العكس.
أليس من حق حاملي السهم بالحصول على تعويض ولو صغير يعوضلهون خسارتهون بسعر السهم
يعني بآخر ميزانية نزلت للبنك السعر الدفتري للسهم 203 ل.س
طيب وين الإدارة توزع أرباح نقدية أو اسهم عينية للمساهمين يعني الأرباح صرلها 3 سنين عم تتجمع وبعدين لإيمتى بدنا نصبر أنا كوني اقتصادي وبعرف بسياسات المصارف ماعم قول توزع كل الأرباح توزع جزء بس والباقي احتياطيات لهبوط قيمة العملة أو استثمارات جديدة .
بس هاد التوزيع كتيير بيدعم السعر السوقي للسهم وبنشط حركة السهم ويعوض الكثيرين بجزء من حقهون بالأخير.
النقطة المهمة إنو الإدارة ماهاممها حاملي الأسهم يلي بالأخير هنن صحاب البنك الفعليين.
الموضوع الثاني: هو استكمال للموضوع الأول الهم هاد عند كل المضاربين بمختلف أسهم البنوك وبعدين يعني لإيمتى بدو يبقى مافي توزيع للأرباح .
أنا شايف في مؤامرة من إدارات جميع البنوك ضدنا نحن صغار المضاربين يلي فعلياً فلسنا ومضطرين بالأخير نبيع اسهمنا بأقل الأسعار للحيتان يلي هنن بالأصل بإدارات هي البنوك وهنن وأنا والكل عرفانين انو هاد مانو السعر العادل للأسهم وانو بمجرد تحسن الأوضاع ٌ السعر العادل والمنطقي لأي سهم هو 300 ل.س طبعاً بتكون راحت علينا وإذا بدنا نشتري بسعر عالي جداً
هي إذا بقي أصلاً معنا مصاري نشتري
الموضوع الثالث : هو إدارة سوق دمشق لازم إما تجبر الشركات على توزيع الأرباح أو تحط سعر عادل للأسهم وترفع سعرها السوقي.
كل سهم بالسوق تقريباً بنص سعرو الدفتري وشوفو الميزانيات واتأكدو.
الموضوع الرابع : الحكومة وينها وين الصندوق السيادي يلي سمعنا فيو من عصر أرسطو وأفلاطون يعني سمعنا وتأملنا وصبرنا وبعدين يعني هم الحكومة الوحيد هو سعر الدولار يلي أصلا وهييك ماع تقدر تضبطو
بس في مكان تاني عم يصيير فيو مضاربة وتشلييح مصاري هييك وبالعلن ومافي حدا ينتبه للموضوع
مثلاً سهم بركة من أول يوم تداول ارتفع بعدين حووت ما كل يوم بيشتري 2500 سهم حصريا موزع مصاري أقسام وكل يوم بنزل بالسعر لوقت ماييوصل السعر السوقي لسعر هو مخطط الو 100 ليرة الله وأعلم بعدين بيهبش الهبشة الكبيرة وبيشتريلو 50 ألف سهم وطبعاً المضاربين الصغار يلي متلي مافي أكتر منهون ملو بدهن يخلصو وهو المنقذ والمخلص بيشتري ماعندو مشكلة.
طيب يلا ياحكومة هي الخطة قلتلك عليها تفضلي تصرفي مع هدول يلي عم يمتصو عرقنا وشقانا لسنين عم يسرقو أحلامنا مننا ونحن عم نتفرج ومو طالع بإيدنا شي.
أنا آسف طولت عليكون كتيييير بس والله مابقا اتحمل رايح طق
وأكييد كتييرين متلي

[عابر مجيب]

يسعد صباحك يا روميو ، انت مختار اسم رومنسي ، بس روميو اليوم لو رجعت فيه الأيام ، كان بحث عن جولييت غنيه ودارسة وموظفة وست بيت وبتعطيه كل راتبها بأول الشهر ، بتروح على شغلها مشي ، وبترقع بنطلوها ، وبس يخرب سحابو بتثبتو بشكالة ، هاد إذا ما خرزتو بالخرازة . وبيتغالظ عليها ويا بحبها يا لأ .

بنرجع لموضوعك
ما في شك انك متعلم وبتفهم بالاقتصاد ، بس في شغلات ما بيعطونا ياها بالتعليم التقليدي ، لذلك المحامي بيتخرج بعد ما يدرس بالجامعة وبيتعلم القانون عالمسطرة بعدين بيتدرب عند محامي وبينسى اللي درسو وبيتعلم المحاماة الحقيقية .
لأضربلك مثال متل عادتي بتبسيط الفكرة
واحد صاحب مصلحة ، عنده موظف ، بيوصيه يسرق الزبائن قد ما بيقدر ، وهو بيقعد حباب ولطيف وسلال من تحت لتحت .
الزبون على بساطته بس يتبين أنه مغبون (وهاد نادر) ، بيرجع لصاحب المصلحة الأكابري وبيشتكي على الموظف ، بيستغرب صاحبنا وبيبهدل الموظف وبيطلع ببياض الوش وبيخفف السرقة لنسبة 50% وبيلاقيها الزبون نعمة وبيفرح . طبعا صاحبنا بيضحك بعبو ، والموظف بيفرح لأنو صحيح أكل البهدلة بس ترسخت مكانتو عند صاحب الشغل وضمن الترقية .