صالة أسعار صرف الدولار وباقي العملات و أسعار الذهب مقابل الليرة السورية ليوم الثلاثاء 16-7-2013

[غسان]

اقتباس: المشاركة الأصلية كتبت بواسطة expert    اخي هدول التنين يللي ذكرتهم بلحظة البيع بيتحولو من مدخرين لمضاربين والمضارب معرض للربح والخسارة مو المهم السعر يللي اشتريت فيه المهم انو الربح او الخسارة ما بيتحقق الا لما بتبيع وبتتحول من عملة الى اخرة او من معدن ثمين الى عملة فيه ناس اشترت دولار ب105 باذار 2012 ونزل الدولار لل68 وما باعت بتقدر تقول انهم خسروا اكيد لا لانو رجع طلع اكتر من سعر الشراء تبعهم يللي بدهه يضارب ويبيع ويشتري وهو ماعنده ما يكفي من اتصالات وعلم بالاقتصاد فلا عزاء له لان الطمع دفعه لعمل لا يدرك مخاطره ليست شماته والله يعلم لكن الطمع هو سبب اكثر المصائب المادية

هل تحسن وضع حلب بالنسبة للسلع الغذائية كما يقال
ام ان الوضع على حاله

[C.E.Ibrahim]

ببساطة شديدة
أنا بالعادة بأول الطلوع بشتري ( عملة صعبة )
وبأول النزول ببيع وكل هالأيام ظابطة معي
وعين الله علي

[غسان]

اقتباس: المشاركة الأصلية كتبت بواسطة omar1964    لما تجولت اليوم بالسوق لفت نظري الصرافين مبسوطين اكتر مني بنزول السعر و عم يروجوا لنزول اكتر و كان في لمعة بعيونون.... انا كنت مفتكر انو زعلانين ...!!

الصراف بياخد عمولتو من الطرفين
طالع واكل ونازل واكل

يعني عم يشتغل بسلعة ويمكن اذا رخصت هالسلعة بيصير في شغل اكتر وبيزيد ربحو وبتكبر ضحكتو

[ymon1982]

السلام عليكم
اولا مبروك للجميع ارتفاع قيمة الليرة
انا مبسوط كتير بس اليوم اتصلت بدي اشتري بضاعة لقيت الاسعار مرتفعة اكتر من وقت كان الدولار 300
بحجة مافي وما بتوفي
وما عاجبك لا تاخد

[M3Maher]

اقتباس: المشاركة الأصلية كتبت بواسطة عابر مجيب    ابدأ من آخر ما كتبت انت لم تتاجر بالدولار لأنه يضر الليرة ، ولكنك تاجرت بالذهب لا أجد مثالا محكما لتشبيه ما تقوله . لوكنت كتبت هذا في بداية مشاركتك ، كنت وفرت علينا عناء قراءة الباقي . وتقول طبعا الغني بيضل غني ، لأ حبيبي مابيضل ، صار أغنى ، والمال جاءه من اللي ذكرتون وانهم تحولوا إلى فقراء ، فلا شيء يفنى ولا شيء يستحدث من العدم . الكتلة النقدية واحدة ، تذهب من أيدي الناس ويفقروا وتذهب إلى الأغنياء ويزدادوا غنى ، وهؤلاء هم حديثوا الغنى أو تجار الأزمات . من يريد الاضرار بالليرة ؟ هم الممثلون الذين يذرفون دموع التماسيح على الفقراء ، ويتهمون الآخرين بالاضرار بالليرة والفرح من هبوط سعرها ، ليس هذا كلام ولا رغبة مواطن مسؤول عن تصرفاته وكلامه . ما يفعله المركزي خطأ وأنا لست مسرورا لارتفاع قيمة الليرة بعد هبوطها أنا مع منع هبوطها أولا ، ومن ثم لو هبطت فالتصرف المسؤول هو بوقف هبوطها حيث وصلت ، ليس التراجع للوراء . التراجع يخلق فرصا للمضاربين ، ويخلق فوضى اسعار لايمكن ضبطها، فهذا اشترى بضاعته على دولار 180 وآخر اشترى على دولار 225 .....إلخ ، من المفارقات الناتجة ، والفوضى في التسعير . أخيرا ألا ترى معنى كلامك، وأنك تصف نفسك بالصلاح وتصم الآخرين بالفساد، بل وبالاضرار بأنفسهم ؟!

السلام عليكم ورمضان كريم عالكل
أخي عابر مجيب كأني عم بفهم من مشاركاتك وردك على الأعضاء انك مو ممنون أبداً انه تحسن سعر صرف الليره أمام الدولار بحوالي 100 ليره خلال أقل من أسبوع تقريباً وأنه اي شيئ يفعله المركزي لا يعجب أحد، لا إن لم يتدخل عند صعود الدولار لمستويات تفوق ال 300 ليرة ولا حتى ان تدخل ونزل السعر وما زال ينزل يعني بإختصار نحن شعب لا يعجبه العجب ولا الصيام برجب
وكأنه في ناس كانت مبسوطة انه صار الدولار ب 330 ليره وعم تهلل انه لسا بده يوصل لمستوى 500 بنهاية رمضان الكريم يعني برأي هؤلاء وضعهم هل سيكون أفضل لأن قالبين مصرياتهم دولار ومو فارقة معهم لو صار ب 1000 !!!!!!؟؟؟؟؟؟
هدون اسمهم انتهازيين وعلى مبدأ فخار يكسر بعضه أو أنا ومن بعدي الطوفان وحلال عالشاطر انه دبر راسه وقلب مصرياته ونسي انه في فئات كبيرة بمجتمعنا لا تؤمن بالتعامل بالدولار ولا حتى يمكن بتعرف شكله
خلينا نشوف النصف المليان من الكأس ونسعى لأن يكون مليان لكل فئات المجتمع
واه عجبي !!!!!!!!!!!!

[expert]

اقتباس: المشاركة الأصلية كتبت بواسطة غسان    هل تحسن وضع حلب بالنسبة للسلع الغذائية كما يقال ام ان الوضع على حاله

شكرا لسؤالك

الوضع ضمن مناطق سيطرة الدولة:


الوضع سابقا لا تجد اي مواد من خضار ولحوم باي سعر
حاليا انو فيه مواد غذائية لكن الاسعار مازالت مرتفعة جدا

بطاطا 100 - 150
بندورة 125 - 150
خيار 50 - 80
فليفلة 200
جبس الكيلو ب 100
بطيخ كيلو ب 150
نعناع وحدة 15 و تنتين ب 25
و الفجل 20
بقلة و جرجير 25

بعض المؤسسات الاستهلاكية تبيع بعض اصناف الخضار لكن الجودة قد تكون سيئة نتيجة النقل والتخزين والاسعار عالية ايضا 100-125 ليرة للكيلوتقريبا وبيبيعك من كل الانواع اجباري نفس الكمية وبنفس السعر بعد انتظار طويل بالطابور (بطاطا بندورة خيار باذنجان)

اما الخبز وهو الاهم ........ فقط الافران الحكومية تعمل بتبيع حاليا الربطة ب 15 ليرة لكن الزحام لا يصدق يعني بلا يمين مريت من جنب فرن الرازي فيه حوالي 150 زلمة بدور المدنيين هاد غير دور النساء ودور العسكريين .
ويلي محظوظ بيحصل على ربطتين خبز بعد انتظار في الشمس الحارقة لمدة لا تقل عن خمس ساعات
ويللي مو محظوظ ممكن بعد ما يوقف كم ساعة يخلص الطحين او المازوت او بيتعطل الفرن وممكن يشتغل بعد ساعة وممكن ما يشتغل لبعد يوم.




ويللي بيحب المخاطرة واللعب مع القناص او بيكون درويش وما عنده خيار تاني بيروح على المناطق التي تحت سيطرة المعارضة المسلحة عبر معبر الموت التي يتعرض فيه الناس للقنص العشوائي (من القناص الموجود فوق القصر البلدي ) وبيشتري حاجياته باسعار عادية وممكن وهو عائد يتعرض لمزاجية بعض المسلحين الذين قد يمنعونه من ادخال بعض الاغراض التي اشتراها مع اخذ الاغراض منه او اتلافها وقد يتعرض للاهانة ايضا (اليومين الاخيرين تحسن تعامل المسلحين مع المواطنين اثناء اخراج الاغراض تحسن كبير بعد شكاوي متكررة من سوء المعاملة
هاد الكلام مو منقول ............ انا او حدا من عائلتي لمسه وشافه بعينه والمعبر قريب من بيتي واشترينا من الطرف التاني اغراض يوم امس

[expert]

اقتباس: المشاركة الأصلية كتبت بواسطة C.E.Ibrahim    ببساطة شديدة أنا بالعادة بأول الطلوع بشتري ( عملة صعبة ) وبأول النزول ببيع وكل هالأيام ظابطة معي وعين الله علي

اخي اذا قصدك عني
انا ما قلت اني عم ابيع
انا بس عم اشتري
والشراء مبالغ كبيرة يعني 100-200 دولار كل كم شهر
لو معي ملايين ما كنت شفتني قاعد على النت ههههه

[omar1964]

اقتباس: المشاركة الأصلية كتبت بواسطة c.e.ibrahim    ببساطة شديدة أنا بالعادة بأول الطلوع بشتري ( عملة صعبة ) وبأول النزول ببيع وكل هالأيام ظابطة معي وعين الله علي

الحمد لله يا اخ ابراهيم
و إن شاء الله بتضل ظابطة معك عطول

صعب كتير الشغل بظروف عدم ثبات و استقرار سعر الليرة
ما بعرف كيف بدنا نشتغل بدون ثبات السعر
كل ما برمجنا حالنا عسعر بيتغير يا اخي رضيانين يثبت بـ 150 بـ 200
( بأي سعر + - 2 % ) لحتى نعرف نشتغل .
من أول حزيران صار كتير تقلبات
حكيت مبارح عاليانسون حوالي الـ 200 ل س بالكيلو بظرف اقل من 10 ايام طلوع و نزول
كتار متلي بطلو شغل الجملة
عم نبيع بالمفرق بس منشان اذا صار فروقات كبيرة ما بيكون في ضرر .

[abd73fr]

أحاول أن أستوعب الأمور التي يقوم بها المركزي هذا الأسبوع ولكن حتى الآن لا أستطيع فهم ذلك!!!! علما أنني أحاول ذلك أثناء الصيام وبعد الإفطار

1- لماذا لم يتدخل المركزي إلى أن وصل سعر الدولار 370-380؟؟ مما أدى إلى رفع أسعار كل السلع في السوق!!!

2- من أين جاء المركزي بالدولار؟؟.. على أساس أنه حول الاحتياطي إلى يورو وفي كل مرة كان يعلن عن تدخله بمبلغ معين من اليورو!!!
3- إلزام شركات الصرافة بحضور جلسة شراء الدولار تحت طائلة المسؤولية!!!!!!!!!!!!!!!
4- تدخل المركزي لتخفيض الدولار بمعدل عشر ليرات كل جلسة وبمعدل جلستين كل أسبوع - حسبما هو معلن- طيب لماذا العالم تشتري اليوم ب 230 إذا كان بعد يومين راح يصير ب 220؟؟.. وإذا لم تبع شركة صرافة كل الدولارات التي أخذتها ب 227.70 هل تعيد المتبقي إلى المركزي؟؟....

صراحة مالي كتير مبسوط بهبوط الدولار لأنه لا تأثير له يذكر على الأسعار .... والله أعلم كيف ومتى سينعكس انخفاض سعر الدولار على أسعار السلع في الأسواق

[kloush]

اقتباس: المشاركة الأصلية كتبت بواسطة غسان    الصراف بياخد عمولتو من الطرفين طالع واكل ونازل واكل يعني عم يشتغل بسلعة ويمكن اذا رخصت هالسلعة بيصير في شغل اكتر وبيزيد ربحو وبتكبر ضحكتو

على مايبدوا أن اليوم هو الاخير
من جلسات التدخل كما أن موجة
الهبوط الارتدادية لم تفلح اليوم
من اختراق حاجز ال200 و عليه
فأن ظل السعر على ما هو عليه
الان فسوف نستعد لموجة صعود
(3 آليوت ) التي تعتبر الاقوى و الاطول