أيها المضاربون المارون بين الدولارات العابرة(أفيدوني)

[شرابي]

ياشباب أولا السلام عليكم ورحمة الله وبركاته وأسأل الله أن يرفع الظلم والظلمات عن بلدنا الحبيب سورية وثانيا أسأل الله لي ولكم ولكل شعب بلدي السلام والأسلام والرفاه دنيا وأخرة خلصنا من الدعوات هلا بدنا نجي :patch_pleur1:ياشباب عندي مبلغ 10000 ألاف دولار الحمد لله على ما أتاني وكل واحد مبلغو بعينو كبير ونحنه درجات المهم وكل مرة بروح لعند باب الصراف لأصرفن ومتردد بظني هالمرة أذا بروح بيقلي ليش واقف عالباب أفيدوني أصرفهن ولا أستنى بخاف لأنو أذا صرفتهن وأرتفعت ليرة هاي 10 ألاف سوري وبتعرفو عندنا بسورية صايرة متل الهند يلي بيصير عندو فلوس بيصير ثرائو فاحش ويلي بيصير فيقير بينتعل سلسفيل أجدادو طبعا هاد من الفساد الذي تراكم على هذا البلد عشرات السنيين المهم أفيدوني شو التوقعات يلي راح تجي طبعا هي توقعات والله هو الذي يعلم الغيب فقط لاغيره التحليل الموضوعي( قل لا أملك لنفسي نفعا ولا ضرا إلا ما شاء الله ولو كنت أعلم الغيب لاستكثرت من الخير وما مسني السوء إن أنا إلا نذير وبشير لقوم يؤمنون .....................وجزيتم من الله الخير

[مجرد إنسان]

أخي العزيز : اذا خايف وفقط اذا كنت خايف من الهبوط ..
نصيحة هي أفضل ما وجدته هنا وهي من اخونا بشر "صراف ومحلل محترف" ما شاء الله عليه ومن أخونا عابر مجيب "رجل خبرة في الحياة كان بالايام السوداء على هالبلد ومستثمر قديم"
نصيحة اخونا بشر : اعمل نصف عاقل ونصف مجنون .. يعني اقلب اموالك 50% دولار و50% سوري
نصيحة أخونا عابر مجيب : بيع على دفعات و اشتري على دفعات
بحالتك انت بدك تبيع يعني :.. لا تبيع اللي بدك تبيعه مرة وحدة .. يعني بدك تبيع 5000 (نصف مجنون اذا اخدت بنصيحة اخونا بشر ) بيعن على 5 او 10 ايام ولا تستعجل ، فالنتيجة تبقى متقاربة ..
بدمج النصيحتين ..
صرف منن شوي شوي لحتى توصل الى النصف دولار والنصف ليرة (نصف عاقل ونصف مجنون).. فاذا صعد السعر بتكون عم تخسر نصف الصعود واذا هبط تكون خسرت نصف الهبوط وهو ما يسمى اقتصاديا "تنويع الاستثمارات"
يعني حط استراتيجية الك .. كل يوم تصرف 500 او 1000 لحد ما تصرف 5000 ، بتكون عم تشوف السوق ، فاذا طلع بتوقف شوي وبتستنى ليثبت فوق وبتكمل تصريف عالهادي الى ان تصل للنصف واذا نزل بتكون خففت خسارتك .باللي بعتن ، اذا جن السوق لا تجن معو ان كان صعود او هبوط .
شغلة حطا ببالك : وهو أن اغلبنا يتوقع بان السعر لن ينزل الى ما دون 65 (سعر المركزي 62! ويمكن بشهر يرفعوا 3 ليرات )، ولكن المخاطرة ومخافة الصعود كبيرة ، وقد نصح اخونا بشر بالشراء عند الأسعار من 66 الى 68 التي كانت سابقا وليس البيع .
هلأ كيف أنا عم فكر بالموضوع ..
خسارتك في حدها الاعظمي عن الاسعار الحالية لن تكون "حسب تقديرات الغالبية هنا على سعر 65 ليرة" أكثر من 50000 ليرة ( صحيح كتار شوي ) بس اذا طلع بصيروا هال 50 الف كأنهم تراب ، فاذا كنت قادرا ان تتحمل خسارة 50 الف بحد اعظمي فلا تبدل شي !
هذه هي نصيحتي الشخصية لوجه الله لمن هو متخوف من الهبوط ... نص بنص وعلى دفعات وليس مرة وحدة !
ورح أعطيك مثال على جودة نصائح اخواننا الاعزاء .. لو انت شفت الدولار من يومين لما صار ب 66 خفت ورحت بعت ال 10000 اللي معك ، كنت اليوم ما رح تقدر تشتريون ! وكنت لازم تدفع 40000 لحتى تشتري اللي بعتوا ، اما لو صرفت 1000 فقط كنت خسرت 4000 ليرة عسعر اليوم ، وكانوا اخف عليك بكتير من 40000
واهم شي قبل ما تعمل شي : صلي استخارة وسلم أمرك لله ومن ثم انظر ما الذي سينشرح صدرك له فافعله وتتيسر امورك له وإن شاء الله ما بتخيب ..

يمكن تسألني وانت شو بدك تساوي ؟
رح قلك : انا ما فلحت لما وصل لل 100 وبعت ، هلأ صارت شغلة مو مستاهلة ، لانو بحركة ال100 وال90 خسرت قلبة فيها 35% مربح صافي وهلأ مستعد استحمل خسارة 10% جديدة
وما رح بدل دولار واحد لاني اصلا مالي مضارب وانما لحفظ القيمة فقط .

- يمكن أنا ما اعرف احكي مزبوط ، واخواتنا هون اكثر خبرة وعلم مني ، وهاد احسن شي طلع معي ، واذا كانوا عندن غير رأي يا ريت ما يبخلوا علينا بالنصيحة لوجه الله ، ولو ما قرأت الآية وحسيتك متضايق ما تدخلت وحكيت كلمة وحدة
وتقبل تحيات أخوك أبو سفيان

[شرابي]

جزاك الله كل الخير أخي مجرد أنسان وتقبل تحياتي ألك وتمنياتي لك بالربح أنت وجميع الاخوة الاعضاء

[Salam L]

الاخ مجرد انسان كفى ووفى...

انا لو مكانك ومعي دولار ماببيع بحدود هيك اسعار... بشرط يكون المبلغ مو لازمك حاليا بالسوري فهاد كلام تاني تماما...

وبالاخير اعمل استخارة وتوكل على الله... انا شخصيا شو ماعملت عم اخسر فبطلت اعمل شي ههههه

[mgkmgk]

اخي العزيز والله حسب خبرتي المتواضعة و بناء على الظروف التي تمر بها الليرة السورية انصحك بعدم بيع المبلغ الموجود معك لسببين
اولا:للحفاظ على قيمة المبلغ الموجود معك ثانيا: للارتفاع المتوقع من اغلب الخبراء وفي حال عودة الدولار الى سعره الطبيعي تكون قد حافظت على قيمة المبلغ الموجود معك اما اذا كان لديك رغبة في المجازفةفقم باللعب بهم وفي ذلك متعة كبيرة والله الموفق

[Ahmad Hamdi AlSharif]

بالنسبة للوضع الحالي للبلاد برايي الشخصي من لا يملك ليرة سورية هو الرابح الاكبر وذلك بناء على الاوضاع الاقتصادية في البلد بالنهاية النصيحة التي اود ايصالها لك هي في حال كان لديك نقود فيفضل ان لا تكون ليرة سورية و لاتصرف اي مبلغ إلا عند الضرورة انا بالنسبة لي شخصيا قمت بتحويل ما املك الى يورو ودولار و لم ابقي في جيبي سوى مايكفيني مصروفي الشهري

[نضال العلي]

حالياً، و بما أنك لم تقم بشراء الـ 10000 $ بسعر معين و ربما حصلت عليهم من الخارج أو ما شابه، مما يعني أنه ليس لديك مقياس للخسارة فلا أنصحك بالبيع طالما ليس لديك حاجة للسيولة و ليس لديك أي مشروع بديل لإستثمار المبلغ بعد تحويله.
أنا لو كنت مكانك لأبقيت المبلغ على حاله طالما لست بحاجة اليه.
و إن كنت من محبي المغامرة و من المتابعين يمكنك المضاربة طالما أن أعمالنا متوقفة و لا مدخول لدينا هذه الأيام و لكن مع إمكانية تحمل الخسارة.

[BROKER]

النصائح سوف تتفاوت وسوف تخرج بنتيجة متساوية بين جميع الاراء اخي شرابي

لكن في حال قررت ان تأخذ بخيار 50% دولار والباقي سوري.... فأنصحك هنا ان تقوم بتبديل العملة السورية الى اسهم .... وهنا تخرج بنصف راس مالك دولار والنصف الثاني اسهم ..

وانت الان في فترة الاسهم فيها رخيصة والدولار رخيص

وبالتوفيق والتيسير لك في عملك

[expert]

واله الاخ مجرد انسان (ابو سفيان) ما قصر
ومو بس نصحك وقلك مصدر النصيحة مين
اضيف لذلك اراء الشباب كلهم الله يعطيهم العافية
وفي كمان مبدا
انو اذا نزل اكتر نزول ممكن يكون بحدود 65 يعني بتخصر 4000
بس لو طلع للثمانين شقد القرق 44000 تقريبا
يعني كميةالربح (مقدرا بالليرة)تفوق كمية الخسارة (وليس الاحتمال)
كمان هالفكرة حكاها اخونا ابو سفيان بس انا اول مين وضحها لي اخونا احمد حمدي الشريف
و بخيرا يللي ماله مضطر
او عنده استثمار تاني الافضل ينتظر ....
وتقبلو تحياتي

[شرابي]

جزاكم الله خيرا كلكم وتقبلو تقديري لكم وتحياتي على مروركم الاكثر من رائع لأن العرب تقول قبل النصيحه بجمل وليكها النصيحة ببلاش ومن أصحاب خبرات تقبلو كل أحترامي لكم