houssamk

انت مع مين ..

انت معون ولا معنا ؟؟
انت مع مين هالسؤال الذي اصبح يتداول في كل مجلس لبدء النقاش
ربما هذا النقاش يتحول إلى احتدام بالاارء لمحاولة كل طرف اثبات انه على حق وان الطرف الآخر على باطل
ليتحول فيما بعد إلى خصام ,,,
ما شفتو قال هو معون وعلى الموت ومو عرفان انهم بدهون يخسروا ... بكره بتشوف وبتقول انو صطيف قال ...
انت مع ارتفاع الدولار ( يعني انت اشتريت دولار ومخبيه وخايف يهبط وتخسر )
ولا انت مع عودة سعر الدولار لسعره ( يعني انت ما لحقت تشتري دولار وتستفيد من هالطلعة وتتستفيدلك بين 50- 100% )
من بداية الازمة مين تضرر ...
كل اللي عايش بسوريا تضرر ...
واكتر الناس اللي تضررت هي اللي عايشة على قوت يومها بس يعني ما معها أي رأسمال تستثمره ...
وما عاد في مازوت
وإذا بدك بدبرلك بس بدهون 35 ل.س علىى اللتر
الميسور مادياً :: ما بتفرق بس دبرلي بأي سعر ,,, ومع تحميل من النية لأني بألف يازور دبرتلك ياهون على 35 ل.س وكان بدو 40 ..... الله يكتر خيرك ..
المنتوف :: ما في داعي للمازوت هالسنة منلبس هالجاكيتات ومندفي حالنا ,,, والله بيعيننا هالسنة..
طيب .... دبرت حالك يا هالمنتوف
وبلشت تنقطع الكهرباء ... وكل يوم 8 ساعا ت
الميسور مادياً :: دبرلي 20 شاحن كهرباء الله يسترك و جبلي مولدة ضروري مشانا تابع المسلسل التركي
المنتوف : وهي شاحن كهرباء ب300 ل.س بيكفينا ساعتين ووقت اللي بينطفا منقوم منام ..
كمان دبرت حالك يا هالمنتوف ..

وبلشت قصص الخطف ::
الميسور مادياً :: مندفعلك شقد ما بدك ..... وبيطلع الميسور المخطوف والناس كلها عم تسأل عليه وتحكي بسيرته وتقول شفتوه الله يعينوا نخطف وعطاهون مليون ليرة لحسن يطلع ..
المنتوف : بيطلع بعد ما يكون اكل قتل وضرب ظناً انه معو مصاري ...

طيب ....
وهي الدولار بدو يطلع ويصير ب200ل.س
الميسور :: بيشتري برأسماله كله دولار
والمنتوف : إيه الراتب اللي بيطالعو ما بيكفي يشري فرنك موزنبيقي..
وكان الراتب يكفي ل20 الشهر ..
والدولار طلع يا معلم لل100 ..
والتجار مباشرة سعر البضاعة × 2 (( ليش يا عمي )) لأني اليوم الدولار ب100 ل.س
لأشوف يا هالمنتوف كيف بدك تعيش ..
وبالأخير منسأل هالمنتوف
انت مع مين ...
معون ولا معنا
مع ارتفاع الدولار ولا مع نزلتو..
طيب وهي أزمة الخبز والغاز ......
وكلها بيطلع منها المنتوف أكتر نتفاً ....
يا ترى شو الموضة اللي جاية بشو رح يتاجر الميسور ....
لتجارة الادوية .... لحتى يموت هالمنتوف
ولا....تجارة الاعضاء لحتى يغروه لهالمنتوف مشان يبيع كليته أو عينه ..

في النهاية ::
الحق على مين ...
- أكيد على هالدولة اللي ما عم تبيعنا الدولار مشان اتاجر فيه واربحلي شوي على حساب هالمنتوف
- اكيد على هالدولة ( يا زلمة بدهون صورة عن هويتي مشان اشتريلي كم الف دولار إيه بدول العالم كلها ما بيطلبو صورة الهوية )
- لالا اكيد على هالدولة معقول يتدخل المركزي من اجل خفض الدولار وما اتدخل إلا بعد ما انا اشتريت الدولار بس لا لا رح يطلع وما رح يصمد كتير لأنه مؤتمر اصدقاء المنتوفين اللي رح يصير بأفغانستان وزيادة اتساع ثقب الأوزون ودخول فصل الصيف رح يطلع الدولار وبعدها منبيع ..
- أكيد على هالشركات الصرافة كلها عم تلم الدولار لأنه رح يطلع...
- أكيد على هالشعب اللي عم يتاجر بالدولار على حساب هالمنتوف وبكره رح ينزل الدولار لل50 ويرجع المنتوف يعيش .....
في النهاية انت مع مين ......
مع مين ما كنت وشو ما كنت منضل اخوة ... ولو انت كنت الميسور وانا المنتوف ..

نضال العلي

نكته

بعد غياب طويل عاد أحدهم الى مدينته، و عند وصوله مدخل المدينة المظلم استوقفه رجال و معهم سلاح و سألوه: أنت معنا و الا مع التانيين؟
خاف الرجل و أجاب بحكمة: طبعاً أنا معاكم.
رد عليه المسلح: نحن التانيين.

و البقية معروفة.

__________________

ابو هاشم

حلـــــــــــــــــــــــــــــــوه
والخوف ليكون في تالتين ورابعين وخامسين

NetPro

كن مع الحق ولا تبالي

__________________

الباشا المهندس

هلأ من طول عمرو الميسور .. والتاجر بيحاول ياكل المنتوف ..
ومن طول عمرها الدنيا إنو الغني بدو يبلع الفقير والذي لاحول له ..
بس السؤال مين اللي مهمتو يحمي الناس .. أو متوسطي الحال .. أو اللي حالهن على أدها ؟؟

وكيف بدولة اشتراكية لثلاثين سنة .. وضلينا نهتف بالاشتراكية لانبحت أصواتنا .. بتطلع فجأة متل الفطر طبقة مليونيرية أو مليارديرية .. ما حدا منهن كان معو يحلق قبل 10 سنين .. وبتستلم البلد .. فنادق وشركات خدمات وبتبلش تستلم أملاك الدولة وتسكر القطاع العام تشتري حتى المناطق اللي هي ملك للناس .. وتشارك كل ممولي الخليج ..

وفجأة بالبلد الاشتراكي اللي المفروض إنو اقتصادو مركزي ودولتو لحماية العامل والفلاح والطبقات الكادحة والبرولتاريا بتطلع عشرات البنوك الخاصة والمشافي الخاصة اللي هي مو متل مشافي الدولة اللي بنخاف نفوت عليها لننضر أكتر ... طبعا ومنخاف نفوت ع الخاصة لأنو ما معنا .. ومدارس خاصة لأولادنا اللي ما عاد ممكن ينزلوا لمستوى الناس .. وجامعات خاصة .. وبلاوي خاصة .. طب كل هالخاص لمين إذا نحنا دولة اشتراكية ؟؟

الباشا المهندس

من 15 سنة ما عاد في وجود للرقابة على الاسعار ولاتقيس ع الشام طلاع لبراة الشام وشوف ..
ومن 15 سنة بلش تخصيص البلد بدون ما حدا يسألنا نحنا ولادها ..

المشاكل الللي انفجرت هلأ هي ياص احبي وبلا لف ودوران كتير مراكمة فســـــــــــــــــــــــــاد .. وفساد استثنائي .. لك القتيل والحرامي بينفك من حبل المشنقة ببلدنا إذا دفعتلوا .. وبالعالم تقريبا ما سمعت إنو لما بتتصل ع مخفر بتقلو عمنسرق بقلك بعتلي سيارة ما عنا بنزين .. طبعا وهو عندو !!!

نحنا حسب مؤشر الفساد (الشفافية الدولي) رقم سوري بعد 115 لآخر أربع سنوات .. ومن الدول العربية ما في غير العراق والسودان والصومال بعدنا ..

بمؤشرات البطالة .. لا تسأل .. ولو الغربة وألوف الشباب السوري اللي بسافر سنويا .. كانوا المناتيف متلنا سفوا التراب من زمان ..

لك التاجر إذا ما التقا مين يكسرلوا إيدو بصير بعد فترة غول .. بياكل الناس ..
والموظف المرتشي بصير عضو عصابة مو أكتر ..
والبلد اللي حالها متل بلدنا .. ضحاك علي وقلي كانت بخير .. البلد كانت عمتنباع شبر شبر .. وبجبلك 1000 دليل ولا قلك لشو .. ما انتا ابن البلد وبتعرف ..

عرفت أنا مع مين ؟؟

Ali-roaidi

بعد انهيار الاتحاد السوفيتي في 1991 ضعفت جميع الانظمة الاشتراكية في العالم وبدأت تتجه تدرجيا نحو الرأسمالية او ما يشبه الراسمالية بما فيها روسيا الاتحادية و كذلك سوريا في ما بعد
الانظمة الاشتراكية اثبتت فعاليتها لكن لمدة محدودة بعدها تنقلب الى بيوقراطية فساد ترهل ....
كذلك حال حزب البعث العربي السوري الذي كان الحزب الحاكم و الذي في بداية مشواره نقل سوريا نقلة نوعية من حيث المنشئات مشافي مدارس جيش .. لكنه في التسعينات بدء بالانحدار و وصل الى ما وصله اليوم
و في فترة 2000 بدأت الحكومة السورية بتغير سياستها و حاولوا الانفتاح على الغرب و الابتعاد عن روسيا التي لم تتعاف من الانهيار و عهد يلتسن
فبامكاننا ان نقول ان من اواخر ال تسعينات حتى الان لا يوجد طابع سياسي محدد في سوريا... او بشكل ادق فترة انتقال سوريا تدريجيا من الاشتراكية الى الراسمالية طبعا ليس بشكل كامل
اذا اردنا ان ناخذ التجربة الروسية التي بداْ بالعمل عليها من 2000 "استلام بوتين للحكم" ليومنا الحالي نرى ان توصلهم لنوع خليط بين الاشتراكية و الراسمالية بداْ يعطي ثماره.. يمكنك ان تقارن اداء الاقتصادي و الوضع الاجتماعي و المعيشي الروسي في اخر عامين مع اداءه في 2000 و 1990 و ستلاحظ الفرق الشاسع
نسبة الفساد و الترهل الاداري الذي كان في روسيا برأي قريب على الذي هنا في سوريا الان لذلك ليس من المستحيل ان نحاربه و نقضي عليه .. و اتمنى ان تكون الاحزاب الجديدة التي رخص لها هذا العام احزاب لها برامج اصلاحية اجتماعية قبل سياسية لاننا اذا نريد ان نامن ان السلطة من الشعب و الشعب هو الحاكم فمن الافضل ان يكون هذا الشعب سليم
و اتمنى ان تبدأ المنافسة بين هذه الاحزاب والتي سبقتها بخدمة الوطن و المواطن بعيدا عن تأثير المال او الدين
ملاحظة ... يوجد تحدي في سوريا برأي من الصعب ان تتعامل معه دولة اشتراكية بحتة و هو تضاعف عدد السكان كل 16 او 18 سنة
في فرق بين مدرسة فيها بلصف 30 طالب و بين ما يكون فيها 60
عدد طلاب كلية حقوق سنة رابعة تخرج جامعة دمشق 4500 طالب سنويا ؟!
من المهم ان نتذكر مع مين انت ؟
معارض او مؤيد يجب ان يكون ولائك للوطن اولا و ان يصب عملك في تطويره فتراب الوطن ليس حكرا على فئة مؤيدة او معارضة هو حق لنا و لأحفادنا واجب علينا ان نصونه ونحميه.
اسف على الاطالة