economic opinion

أخي القبطان العزيز، هل فعلاً هاد الموضوع صاير مصدر قلق لنا جميعاً وأنا جربت كتير شغلات بزمانتي ريجيمات ورياضة، مارح قول إنو ما نفعوا، لأ وقتها كنت اتبع أيام ريجيمات قاسية لما كنت حس وزني زاد شوي بالجامعة وفعلاً كنت انحف عليهون بس بعد فترة يرجع يزيد وزني وهكذا.....
بعدين صرت حس إنو داق خلقي من الريجيمات وما عاد إلي خلق بس لقيت آلية ساعدتني والله شوي بأنو وزني على الأقل ما عاد زاد، وعلى المدى الطويل أسبوع - شهر صار ينقص بدون ما يرجع يزيد، رح اذكرهون علون يفيدوكم:
1- بعد الساعة 7 مساءً لا للطعام، خاصة الدسم منه والتسالي، هلأ انا كتير أيام للأسف برجع على البيت المساء بعد هاد الوقت، فصرت مثلاً لما كون جوعانة أعمل شي صحن أخضر (سلطات، فتوش تبولة) وعلى علمكون أنواع السلطة كتيرة وفيك تنوع فيها، وصحن السلطة بيصير بعشر دقائق وبتاكل وبيشبع بدون ما يسمن، أيام كمان بعملي ظرف شوربه خفيفة كمان بيمشي الحال (اكيد مو من تنبعات الكريما اواللحمة)، وعل فكرة الخل كتير مفيد إذا فيك تحطو بالسلطة أو الفتوش لأنو كمان بيساعد على حرق الدهون.
2- التركيز على الحركة متل ما قالت إختنا سلام ويفضل الحقيقة تسجيل بنادي رياضة، يعني ياجماعة هية كلها ساعة بالنهار، اعتبرها ساعة راحة لأنها فعلاً حتى بتحسن النفسية.
3- صح فيكون المسا تاكلو فواكه أو خضرة إذا ما بدكون تعملو سلطة، وعلى فكرة أنا مرة سمعت من دكتور تغذية إنو التفاح مفيد جداً جداً ويساعد على التخلص من دهون الجسم
4- إذا فينا نقلل من المعجنات والخبز والرز شوي بيكون كتير منيح (ديرو بالكون أنا قلت تقليل مو امتناع متل الريجيم وصدقوني هاد بيكفي، يعني بدال ما الواحد يعبي مثلاً صحن مليان رز ويحط فوقو الشاكرية، حط معلقتين رز بقلب لبناة الشاكرية والله بتحسها طيبة وخفيفة
(لا حدا يسألني ليش شاكرية، يمكن لني بحبها كتير )
على فكرة في ناس مرة كمان نصحوني بالشاي الأخضر
أرجو إني كون فدتكون