الأسهم السورية ( المضارب السوري) - قصة السوق السوداء في سورية

معذرة أنا قرأت الموضوع ، حاولت ركز لأوصل لمضمون ، وصلت لآخر المقال ما وصلت لشي . بدي عيد لأفهم أكتر بس شي بيديق الخلق .
مع احترامي للشخص ، أنا سامع من بياع حمص وبياع بندورة حكي أكثر جاذبية وفيه مضمون .
الرجل عم ينتقد مصدر رزقه وعم يحاول يتنصل من المخالفة متل اللي كتب مسرحية وحضرها وطلع يسب على المؤلف مع الحاضرين ولما سأله واحد بيعرفه ليش عم تسب حالك ، قال أحسن ما يضربوني .
شو هاد نقد ذاتي ؟ أم منفخة ؟ مين سانده هاد ؟!!
وبعدين مالي خلق ارجع ابحث بس بتذكر ورد كلامه مره وكأنه كبير المسؤولين ومستشارعن الاقتصاد وصاحب قرار ، وفجأة طلع عم يشكي من عدم قبول الموافقة له على انشاء بنك . كأن الواحد بيعمل بنك لحاله بدون مشاركة حدا !
راحت الهيبة ، عيدو القراءة للموضوع هلأ رح تلاقوه بلا معنى . وإذا فعلا اقتصادي بشهاده بيكون آخد دكتوراه من روسيا . ياعمي المال بيحكي شو بدك بها الحكي .
أنا اللي خدمني أنو بأول المقال عمللنا بداية السوق السوداء 1980 فاستصغرت المتحدث ، وأنا بعرف مع أني مو صراف أنو كان في البساتنة والخطيب ، والجيل اللي قبلهم الدركشلي والصواف وسيدا والوتار قبل ما يوعى سحلول ويتعلم الحكي . وكتيرين نسيت اسمهم الله يرحم واحد كان اسمو أبو ياسر نسيت هلأ أسمو .من يوم يومنا في عندنا تجارة وسوق سودا وتهريب سجاد عجمي وذهب بين الأردن وسوريا والعراق وإيران ، أسواق سودة وملونه بكل الألوان .حكى لنا مرة أبو ياسر بالسبعينات عن المخابرات اللي دقت عليه الباب الساعة الواحدة مزنوقين وبدهم دولار وفي وفد رسمي مسافر ومافي دولار ، طبعا عطاهم بالدين مو من الثقة بس من الخوف وللأمانة سددوا بعد يومين .
الاقتصادي ممكن يكون شحاد بس بيفهم مو العكس . والسوق السوداء موجودة في العالم أجمع خصوصا دول العالم الثالث والرابع والخامس ...... وهكذا نزولا إلى سوريا
سامحونا .