الأسهم السورية ( المضارب السوري) - جلسة صالون سيريا ستوكس ليوم الخميس 25-8-2011

موضوع الحلقة اليوم متل اللي سأل الكومبيوتر شوفي مافي ؟ لوكان الموضوع بينتهي بقرار وابتعاد عن جو معين ما كان حدا تعب ، المشكلة من أصل تعليمنا عن الزواج . واللي بدو يتزوج امرأة ليتفاهم معها ممكن يجيه كتير وجع راس ورح توقفلو سنجق عرض بكل شاردة وواردة . علما بأن الرجوله مو غلاظة ومجرد فرض رأي بس كمان المركب بريسين بيغرق . يعني عم حاول اختصر بس افكاري عم تتزاحم ولو بدنا نعطي الموضوع حقو بدنا مجلدات ومع هادا مافي حالة متل التانية أبدا . والموضوع يمكن لازم يبدأ من مفاهيم الحرية والكبت ، بالمناسبة أنا قرأت مرة للمرحوم فضل الله وكانت بالصدفة ورقة لقيتها بالأرض ومطبوع عليها خطبة الجمعة ، ولفت نظري قوله بما معناه أن الافراط في الكبت لا يقل افسادا عن الافراط في التحرر . أحسست باحترام للرجل وتكررت عدة مصادفات بعد ذلك وكنت في كل مرة أجد فيه عقلا راجحا . هو بالمناسبة ميال للعقل أكثر من الاتباع لما يطلقون عليه ولاية الفقيه .

أما بمناسبة نجاح الآنسة دانا اللي لا بعرفها ولا بعرف أهلها لسا ، بحب اغتنم الفرصة وباركلها وانشالله موفقة ، بس اللي لفت نظري أنو الدورة التانية حملت خدعة مؤلمة لمن تقدم اليها لتحسين السكور ، لأن النتيجة لاتظهر إلا مع مفاضلة الموازي مع ان الأصل أن من حق الطالب التقدم للعامة مرة واحدة ! طيب لسا ما حدا قدم على العامة حتى يفقد فرصتو ! كأن اللي مصمم هالفكرة المنحوس المهايني وزير المال السابق ، شو هالأفكار هي ؟!

ثم هنن أصلا خدمونا بحيث تكون الموازي مع العامة سوا ! شو هالخدمة ؟ المفروض بعد فشل المحاولة بالعامة بيدفع الطالب خمس وعشرين ألف ملطوش وبيتقدم للمفاضلة . أما هلأ بدو يخاف يصفى ل منهون ولا منهون فبيقدم على الموازي من أول مرة ، يعني ألغوا العامة وما عاد إلها لزوم .

الحلو كمان أن التعليم المفتوح بيضل مغمض ، والطالب بعد ما يقبل بالحد الأدنى لطموحاتو ويدفع لمفاضلة الموازي ، يمكن المفتوح يكون فيه فرصة تحقيق حلم وبيسجل فيه وبيدفع من جديد وطبعا لو شاف حلمة أدنوا رح يشوف الخمس وعشرين ألف . بيجوز هدول المصاري اللي بدهم يساووا منهم الصندوق السيادي المزعوم . يا الهي قديش أنا متجني !!!.