تسجيل الدخول

مشاهدة النسخة كاملة : بتتذكروا ،،،، ينصح بقرأته لمن فوق 30 سنه


arnouri
03-03-2011, 06:18 PM
بتتذكروا ،،،، ينصح بقرأته لمن فوق 30 سنه







بتتذكروا.. يوم يجي أخوك الأكبر منك ويقول لك: بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع.

‏ بتتذكروا.. يوم كنا نتصوّر عند مصوّر العيلة وطبعاً غصب عنك الخلفية زرقاء مو بكيفك ولازم تمشط شعرك بالمشط اللي عنده.. كله شعر..

‏ بتتذكروا.. المصيص الأحمر اللي بيعلق بالسنان ومعو عود لونه احمر مخطط بالأبيض وكنا نقلبو بالمقلوب ونحطو ع الشمعة أو الغاز
وننفخ مشان نساوي فقاقيع وطبعا ما تطلع النفيخة لحتى تطلع زلاعيمك معها وتنحرق كل أصابيعك.

بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله
وبعدين نحطو بطاسة مي أو بالمغسلة وناكلو عم يشرشر.

بتتذكروا.. يوم الجمعة ... ‏نقوم من الصبح مشان نسمع أغنية في قصص الشعوب قصائص لا تنتهي
وعالم حلو بهي يسكن في القلوب في قصص الشعوب .

بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل.

‏ بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك.

‏ بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة
وكل ما بدك تجي تاخدها تلاقي الوالدة حاططته تحت ومانو متلّج.. يا حسرة.

بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طوال النهار
وآخر الشي تنفكش رجل شي واحد وما ينام الليل لأنو رجلو ورمانة..

بتتذكروا..لما كنا نستقبل الحجاج بكامل الفرحة واللهفة على الهدية والعيدية
وآخر شي: مسواك ومسبحتين والكاميرا الحمراء وسجادة وللبنات قطعة قماش مبرقعة وساعة.

بتتذكروا.. عزايم قبل والسفرة ومفرش الطاولة اللي عليه صورة (‏فواكه) ‏وريحتو لازم مثل ريحة المطبخ
وقاعد على كراسي القش اللي لما تقوم تلاقي سيقانك عليها شخوط ومربعات

بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو برتقالي
مشان نظلل على الشي المهم وآخر شي نظلل على كل الكتاب.. وين الشي المهم؟؟ ما بعرف!!!!

بتتذكروا.. أول ما يسرق الأولاد سيارة أبوهم كانت الرجل اليمين على البنزين والرجل اليسار على الفرام من شدة الفرحة ....
‏ولازم طبعاً يمر على أولاد الحارة ويطلعوا معو شي خمسين واحد

‏ بتتذكروا.. لما تتقاتل مع ولد الجيران وتقول له: انقلع عن بيتنا وعن رصيفنا...

يقول لك: مو رصيفكن هادا رصيف الحكومة

كلام منطقي, ‏ويتم يمرق قدام البيت ويقول لك مادخلك.

بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..
وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله.

بتتذكروا.. لما الشباب بدهن يعملو عضلات يرحوا يترسو علب النيدو باطون ويحطون بينهن
عمود حديد وهووووووووب وآخر شي منكسرة ضهورهن

بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت

بتتذكروا... أكلة الشيطي ميطي و الملبس في الصرة , وأكلة البسكوت والراحة في السهرات



واللي ما عمل شي من المذكور من جيل الهمبرغر وسبيس توون وأبطال الديجتال..راحت عليكم هديك الأيام

أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل

و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير..

أول ما يفتح التلفزيون بتلاقيه يتفرج ع هيفا ونانسي وروبي


وعلى أيامنا قصص عالمية و حديث الجمعة الديني وسهرة صباحية ع الشدة كل ليلة خميس

وأم عمار ببرنامج ما يطلبه الجمهور

وعصمت رشيد يغني بين الشوطين

ويوم الجمعة سيران والله أيام


للأسف صار الجيل الجديد بلا ذكريات



"عندما قرأته رجعت بي الذكريات الى الماضي كم كنا ......ونقلته لكم لكي تتذكروا أيضاً "



عفواً إنني لا أقلل من شأن الجيل الحالي أبداً((جيل الفيسبوك)) قد تصبح لهم ذكرياتهم أيضاً وأصبحت لهم ذكريات







شكراً

best time
03-03-2011, 06:57 PM
ها ها ها ها
حلوين جدا ذكرنتا الأيام السابقة
أييه دنيا

abu mhd
03-03-2011, 07:41 PM
شكرا على المقالة الحلوة

الله يرحم هديك الأيام اي والله يوم الجمعة و ساسوكي و من قصص الشعوب
و الله يرحم ايام الشرشف انكسرت ايدي مرتين

الله يجزيك الخير

BROKER
03-03-2011, 09:14 PM
بتذكر كم وحدة .... بس حلوين كتيييييييير

Dr Imado
03-03-2011, 09:50 PM
بتذكرون كلون بس أنا كنت ظلل يللي مو مهم والاغلب يتظلل الكتاب كله:StickOutTongue:StickOutTongue:StickOutTongue

wasim
04-03-2011, 03:44 AM
يا سيدي احلى شي كان .........غدا نلتقي

the king
05-03-2011, 11:00 PM
يا سيدي احلى شي كان .........غدا نلتقي

و الأحلى انو لهلأ عم يطلع

حكم جركو
06-03-2011, 12:37 AM
والله ياأبو معاذ جيل الفيس بوك فاجئنا جميعاً وجعلنا نعيد تقيمه وتقديره... وفرض أحترامه على الجميع.

مع تحفظنا على لباسه وطعامه وتسريحة شعره ولكنه بكل المعايير كان جيلاً ثورياً وواعياً ومثقفاً وجريئاً...والأهم أنه جيل الأنتصار.

لم يكن أبداً جيلاً مهزوماً.....

تحية أكبار لجيل الفيس بوك...

arnouri
06-03-2011, 02:09 AM
ها ها ها ها
حلوين جدا ذكرنتا الأيام السابقة
أييه دنيا

شكراً لك هل تتذكر تمثلية ايه يادنيا - اسود وأبيض -



شكرا على المقالة الحلوة

الله يرحم هديك الأيام اي والله يوم الجمعة و ساسوكي و من قصص الشعوب
و الله يرحم ايام الشرشف انكسرت ايدي مرتين

الله يجزيك الخير


وأنا أيضاً انكسرت يدي

arnouri
06-03-2011, 02:12 AM
بتذكر كم وحدة .... بس حلوين كتيييييييير





أنا بتذكرهم كلهم


بتذكرون كلون بس أنا كنت ظلل يللي مو مهم والاغلب يتظلل الكتاب كله:stickouttongue:stickouttongue:stickouttongue



أنا كنت لاأظلل شئ

arnouri
06-03-2011, 02:15 AM
يا سيدي احلى شي كان .........غدا نلتقي


غداً نلتقي - يعيني تصبح على الخير بعد قليل -


و الأحلى انو لهلأ عم يطلع


بأي قناة يطلع

arnouri
06-03-2011, 02:19 AM
والله ياأبو معاذ جيل الفيس بوك فاجئنا جميعاً وجعلنا نعيد تقيمه وتقديره... وفرض أحترامه على الجميع.

مع تحفظنا على لباسه وطعامه وتسريحة شعره ولكنه بكل المعايير كان جيلاً ثورياً وواعياً ومثقفاً وجريئاً...والأهم أنه جيل الأنتصار.

لم يكن أبداً جيلاً مهزوماً.....

تحية أكبار لجيل الفيس بوك...


تحياتي لهم ونفتخر بهم

Aziz
06-03-2011, 11:18 AM
بالفعل رجعتنا بالذكريات لورى كثير
ايام
على فكرى انا عمري 28 سنة حسستني انو عمري 100 سنة وأكثر