صالون سيرياستوكس لأيام الخميس3 والجمعة 4 -5-2012

[رندة]

[رندة]

[رندة]

[BROKER]

اقتباس: المشاركة الأصلية كتبت بواسطة غسان    رامي...... كيف شفت الشعب الاردني بصراحة ؟؟؟؟ لانو طالع عليهم صيت ؟؟؟!!!! ودائما الحق اانه لايجوز التعميم ..اي لايجوز تعميم اي صفة على شعب كامل وهذا منافي للمنطق ..... مرة سألوا أردني : ليش أنت دائماً مكشر وعصبي ؟؟ قال : قهوتنا مرّة وبحرنا ميت وخليجنا عقبة وطبختنا مقلوبة وأشهر الأسماء عنا : زعل ومهاوش وعدوان ومطربنا اسمه متعب وأشهر أغانينا : ويلك يلي تعادينا يا ويلك ويل وبدك إياني ابتسم !!!

لا تذكرني .... الله وكيلك صاير وقت اطلع مشوار باكل همو
لانو رح ارجع معصب ... وطالع خلقي .... وعم سب حدا ببالي

يا زلمة تقول الاردن بعيدة عن سوريا شي 50 الف كيلو متر

وين الاردن وبلدنا وين يا حسرة .... شي بيدبح القلب دبح

الجماعة مي للشرب ما عندون ...... ارض خصبة مافي .... سهل واسع كالشام مافي ..... ومع ذلك عينك ما تشوف الانفاق والجسور يلي ما بتخلص رغم طبيعة البلد الجبلية .......

ولا ما تشوف الخدمات والبنية التحية رغم ان البلد فقير بالنفط والموارد وكل اشكال الطاقة ما عد هالفوسفات يا خطي ..... ورغم كل هالشي بتشوف الابنية الرائعة كلها حجر طبيعي ...... وكل بناء شكل احلى من التاني ..... والفيلات كل وحدة منون منحوتة فنية .......

النت كيبل .... وباورباند ..... وشرطة المرور بكامل اللباقة .... واشارات المرور نادرة ...... والسيارات بتشوف البي ام دبليو متل ما بتشوف كيا ريو عنا ....... وبتشوف المارسيدس الحديثة كانك شايف سيراتو بسوريا ..... وبتشوف الهوندا كأنك شايف سابا عنا .......

وكلو كووووووم يا خال ....و الشركات كووووم تاني
بتلاقي كل شركات العالم ... اذا انت في عمان فالعالم مفتوح لك

وحتى القوة الشرائية قوية ..... يعني في مول قريب مني اسمو ( سامح مول ) هاد عنا اسمو مول .... بس هون عبارة عن سوبر ماركت ...... يا خالي بس توصل لمكان بيع اللحمة بدك توقف عالدور شي ساعة بدون مبالغة ..... والسبب انو هون النشامة ما بيشتروا كيلو لحمة بس... بيشتروا خاروف كامل ...... مع انون ناس متوسطي الحال وليس ومن الميسورين .....

ولا ما تشوف الكازيات ...... بتعرف كازية المجتهد عنا اديشها حلوة وفخمة وكلها اجهزة الكترونية .... وعمالها لابسين موحد ؟؟؟؟؟ هي هون الكازيات متل عنا بفرد شكل ....... ومو بس هيك .... يا زلمة طول مالك ماشي بتشوف كازيات يعني مستحيل تنقطع من البيزين ....... وفي مول ببعض الكازيات او سوبر ماركت ........ واحلى شي وقت تدخل بسيارتك عالكازية بتلاقي العامل نظفلك البلور بكم بخة وبعدين مسحون ..... وبتمشي بدون ما يدق عليك البلور بدو اكرامية ........

وشفتلك وكالة اللمبرغيني شخصي واخيراً شفتا شخصي كنت بدي اتصور معها بس كنت راكب تكسي ..... لواحد فقير جداً سعر سيارتو 3000 دينار ..... قلي عندكون ارخص ..... قلتلو ما بدي اصدمك والله بس ضروب رقمك بــ 2 ...... كنا رح نهور من هول الرقم يلي فاجأ الزلمة .....

اما يا خيي في مكان بآخر شارع مكة اسمو ( مجمع الشركات ) مجمع كبير وضخم وكلو ابنية محترمة وحلوة .... وعالمدخل في حرس وكأنك داخل لشي بيت مسؤول ببلدنا الحبيب ...... او بالاحرة لحارة فيها مسؤول ..... المهم هاد التجمع تبع الشركات فيه كل الشركات العالمية هدول ما عدا المنتشرين بشوارع عمان .... لااااء هدول عالميات بتلاقي جوا ( غوغل - مايكروسفوت - سامسونج - ال جي - وشركات كتييييرة كتيييير ..... ) وهي المنطقة فيها اسرع خطوط النت (يعني اسرع من المتوفر للعالم ) بس 20 ميغا السرعة متل عنا .... وبدون موافقات امنية ....

بدي احكي باسعار البيوت بس والله بدي خليكون تناموووووووووو ما بدي يصير عليكون شي من كلامي .... وخصوصي هلا بتكونو متعشيين .....

اما الناس ::: فوالله ما شفت منون الا المزاح والخدمة المميزة ..... صح بس يكونوا ساكتين بتفكرون معصبين او مزعوجين ... بس وقت تحكي معو بتلاقيه عم يحكي ويمزح ......

ذكرتني هون كلون معون اقل شي خطين موبايل (ليش يا حزرك ؟؟؟ ) ..؟؟؟؟؟؟
لانو المكالمة لنفس الشركة تقريباً ببلاش يعني 2000 دقيقة داخلي ... و 50 خارجي ..... ومدري قديش نت بس بــــ 4 دينار كل شهر ......

واحلى شي في عرض اسمو ( الشهامة ) هاد لقوات الجيش والامن ..... تخيلت عنا بفرد شكل الوضع ....؟؟!!!
زين تطلق "خط الشهامة" لمنتسبي ومتقاعدي القوات المسلحة والأجهزة الأمنية

وأحلى شي هون المظاهرات يوم الجمعة ...... بتلاقي قوات حفظ النظام متل عنا تماماً .... عم يوزعوا عصير على المتظاهرين مشان يبوردو وينتعشوا ..... وفي حال انبح صوتون يشربوا ويرجعوا يكملوا تظاهر ........ وكمان بيحموا المظاهرة من المندسين .....

كلو متل عنا .......

بـــــــــــــــــــــس مـــــــــــا في بــــــــعد الشــــــــــــــــام

[BROKER]

اقتباس: المشاركة الأصلية كتبت بواسطة مجرد إنسان    والله البركة فيك أخي رامي وبمنتداك وبالمشرفين الأكابر الذين واللواتي تم اختيارهم بعناية ما شاء الله مجموعة راقية ومثقفة وذات عقول نيرة الله يحمي جميع السوريين ويفرحنا باللي ببالنا وتحية لكم أخي العزيز

الله يكرمك اخي الكريم

وآآآآآآآآمين

[فاميلي]

مساء الخير
بصراحة الصالون مميز جدا وجميل

[فاميلي]

مدوا الصالون شي يومين كمان

[غسان]

نهارات صاخبة

تتمادى العيون وتحملق

تثرثر الالسنة وتسلق

تتصارع الافكار وتذبح

تثور نفوس وتبرد نفوس

تضحك وتبكي ...!!

تموت وتحيا

فقر واسراف

رضا وسخط

ايمان والحاد

شتائم وتمائم

آمال وخيالات .....

أحمر وأخضر ....

يمين ويسار

تتعب القلوب

وتمل

وتستسلم....

سكن الليل ...

ونامت عيون

غائرة في

شحن طويل

لنهار صاخب جديد


هي الحياة

[فاميلي]

مساء الخير رامي طمنا عنك
شكلك حنيت للشام
معك حق

[BROKER]

اقتباس: المشاركة الأصلية كتبت بواسطة economic opinion    وبيسمعو محمد الوكيل عند الصبح الساعة شي 7 بروكرنا سمعت برنامجو مفيد بس صوتو عند الصبح...... ولا فيروز

والله ما تعرفت عليه لسا .....

بس تعرفت على إذاعة ( أمن fm ) هي اذاعة بتعطي حركة الشوارع واي شارع فيه زحمة (ازمة) بقولوه عالاذاعة ..... والحلو فيها انها مالها ناشفة يعني رغم انها (امن اف ام ) لكن فيها اغاني وعمرو دياب وكل شي ...... ودائما في طيارا" (طوافة) لمراقبة حركة الشوارع .....

بس محمد الوكيل ما تعرفت عليه