له له له هيك بدك تزعلني منك

هلا مو غلط الواحد يقرا ويتنور.. انا كان عندي كتير اهتمامات بهيك قصص ... تبع البرمجة اللغوية العصبية.. وكتب ستيفن كوفي ومراحل وقبعات واحذية دهبية وما بعرف شو .. كنت اقرا كتب من بعيد لبعيد .. لبين مرة ما قفعت معي وتعبت حقيقي.. في شخصين بحياتي كان الون كتير تأثير... وتعبت معهم وما بقى قدرت اتفاهم ..مع انو انا الحية بطالعها من الوكر وبخليها سعيدة مني كمان... وهدول التنين عجزت اتفاهم معون وحسيت بعجز واحباط.. وشفت دعاية لاحد الدورات بمركز بيعمل هيك اشياء بالشام .. وهالدورة كانت بسيطة خمس دروس عن التوصل .. قلت يا بنت ادفعيلك خمسة الاف وسجلي فيها وشوفي علومون وبلكي بتستفيدي... وفعلا سجلت.. وداومت.. والي طلعت منو من هالدورة بشي بسيط... كل شي درسونا ياه خلاني على ثقة انو انا كل شي عم اعملو بالحياة وبتصرفاتي وبردود افعالي صح ...وكان المحاضر عم يعلمنا ياهون.. وقلتلو هالحكي قلي انت بكل رد فعل عملتيه كان صح ..ووقتا عرفت انو العلة كانت مو فيني يعني خسرنا خمسة الاف ليرة لاعرف انو انا على صح.. اكتر من هيك ولا شي صدقني .

هلا مو غلط الوحد يروح ويشوف ...بس ما ياخد هالشي منهج بالحياة .. وانا كل ما اتعلم شغلة ممكن يمرق وقت ..و اكتشف انها كانت غلط.. واعمل نقيضها تماما بعدين .. بس بوقتها كنت معتبرتها انها صح الصح .

ما في صح او خطا مطلق بحياتنا كلو بيخضع لحسب المكان والزمان غير هيك بيكون كلو نظريات قابلة للطعن .
واكبر مثال البرمجة اللغوية بحد ذاتها ..بعد فترة سمعت انو هية نفسها خطأ ... باعتراف القيّمين عليها ذات نفسون .. لانو بتبرمج الانسان يكون روبوت بردود افعالو .. والصح الواحد يكون تلقائي وصادق .. حتى لو ظهر بمظهر سيء وما عجب الاخرين بس صدقو بيغفرلو .
صدقني هيك قصص للمتاجرة اكتر منها لتخلينا احسن .. وهنن بيلعبو على هاد الوتر.. وكلو كوم ووقت بيقلولك رسم الدورة "استثمر" معنا بدل ادفع حقها... مشان يحسسوك انو انت ما عم تكب مصاريك بالزبالة ..
انا ما بعارض اي انسان يجرب اي شي... مو متل الزميل عابر خبرتو انضج بالحياة .. وبيحب يوصللنا ياها بدون نحنا ما نمر فيها... وهاد شي كتير صعب.. ما رح تقدر تحس بالنار اذا ما لمستها .. ونفس الشي اي تجربة .. الانسان وقت بيدخلها بيطلع منها بشكل افضل .. لو نحنا خارقين متل الزميل عابر مو عم يطالبنا... كنا قرينا الامتال الشعبية وتراثنا وما احتجنا لاي شي تاني .. بكفي نتمعن بكل متل وبكل شي سمعناه .. ليكون عنا فكرة كبيرة عن الحياة ...بس هالشي مو واقعي .. والا المفروض يطلع علينا لقب شي اكتر من الحكماء.. لانو الحكماء ذات نفسون تكونت حكمتون من التجارب تبع الحياة ... والعلماء صارو علماء بعد مليون تجربة فاشلة ليطلعو بوحدة ناجحة .. ونحنا كبشر هيك حقنا نجرب ويا منتعلم يا لأ .
وما رح انسى الدورات .. بنهاية الدورة عملو اعلان عن محاضرة مجانية لنقدر نقرا بشكل سريع .. ونخلص كتب بزمن قياسي ...وحضرتا بس بقيت ساعتين ما عم افهم شو بدو المحاضر.. وسالتو كم سؤال وعلى اساس جاوبني... بنهاية المحاضرة قلتلو ما فهمت اجوبتك او انت ما وصلتها كاملة.. قلي سجلي بالدورة بفهمك .. هيك ناس لو فعلا عم يسعو ليخلونا نستفيد ما كان شرحلي بكل صدق... بجوز حقيقي كنت تحمست وسجلت .. حتى لو كانت كل الدورة هية هي الفكرة ...بس مجرد جاوبني وعطاني معلومة ببلاش بجوز ادفع الرسم وسجل ... وقتها حسيبت بالمقلب الي بيعملو فيني وبغيري.. وقلت حتى كتاب ما بقى اشتري منون يا بيوقع بين ايدي بالصدفة او بدور بالنت .
موضوع الكارما ما بعرف اذا داخل فيه والطاقة تبع كل انسان .. انا كمان دخلت بهالمجال وقريت كتب عن موضوع الكارما .. وممكن اكتب عنو بشكل منفصل لانو كان الو اثر كبير بحياتي .. بس صار موقف كمان مضحك مع مجموعة بتدّعي الطاقة والشغل عليها .. حضرت محاضرة وحدة ووحيدة طلعت منها باشياء مابعرف بضحك ولا بتبكي .. اول شي كانو مجموعة صغيرة رفقات بين بعض ...والمحاضر عرض يعطي محاضرتو ببلاش واحد الطلاب قرر يعمل مكتبو مقر للمحاضرة ..ورحت .. بنص المحاضرة حكى شي عن الطاقة ..انا سألتو عن التطهير وكيف منقدر نطلع من الاجواء السلبية المحيطة فينا وكمية الكره والحقد الي عم تغلف الجو ومن هالحكي .. شخصيا عم حاول احمي حالي وكياني الصغير.. بس عم فكر بشكل اكبر قام ...قلي في طالبة بيناتنا اخدة دروس متقدمة بالطاقة وبتساعدك كيف بتطهري.. التفت الها ..قالتلي اوك بالبريك ..
بالبريك بقلها اي شو القصة شو اعمل؟ قالتلي والله صعب جاوبك لانو انا دفعت مصاري لاخد هالمعلومات وعلمونا انو اي شي بتتعلميه لازم تدفعي حقو لتحصلي عليه فبعتذر .. هاد اول مقلب اما المقلب التاني ..
الشب صاحب المقر مرض .. اوك سلامتو... كان مقرر ناخد محاضرة كل اسبوع .. تاني اسبوع بتقلي رفيقتي الي عزمتي مريض الشب قلتلا خير.. الاسبوع الي بعدو اسلوبها بالرد ما عجبني .. قلتلا في شي احكيلي .. بتقلي والله خجلانة منك بس الشب مرض.. قلتلا بعرف ..قالتلي وراح عالمشفى قلتلا سلامتو ان شالله تحسن .. قالتلي اي .. وقالتلي البنات تبع الطاقة قالو انو في عين طرقتو ..قلتلا لا.. مو معقولة .. منآمن بالعين وهالقصص بس مو خارقة لهالدرجة وهو شب مو شكلو نعنوع وخالص .. قالتلي اي مو هون القصة ...قلتلا وين .. قالتلي قال كلنا منعرف بعض وما في حدا غريب غير انتي .. قلتلا اي .. قالتلي انت شكلك طرقتيه عين .. قلتلا ايوااا .. وقتها حسيت حالي مغفلة .. اول شي انا مو مجاملة وين ما بروح في جو ايجابي بخلقو او هيك بحس .. والي بيصيب بالعين يعني الا ما يكون بيحس عحالو .. دخل محل صارت مصيبة ..وردة دبلت.. فستان انشق ...مزهرية انكسرت بس هيك حوادث ما بتزكر مرقت معي لحس حالي ام عين خطيرة .. هالقصة ذكرتا لفرجيك عيّنة من هيك ناس بيتعاملو بالطاقة وعلى اساس هننن محصنين ضد النيات السيئة والافكار الشريرة .. لزقو فيني تهمة .. طبعا انا قررت بعدها ما روح هيك محاضرات من اصلو ..مو ناقصني جنان مع انو كلام المحاضر كان عاجبني .. بعد فترة منيحة سالني عالفيس بوك المحاضر وينك مو مبينة ..واعتذرت .. الجماعة مو بس طلعوني بحسد وبطرق عين .. كمان وقت سائل المحاضر عني قالولو اكيد صاير معها شي خلا الكون يمنعها تحضر المحاضرات .. على اساس انا ما بستاهل هيك علوم قيّمة ، لو بستاهل كنت حاربت واجيت . عجبي !!!
اما قصة الخشبة ما توقعتك هيك مصدقها .. هي تخينة شوي كتير .. انا واثقة مليون بالمية انو الخشبة فيها نقطة ضعف هو عاملها مخصوص لهي المحاضرة ووقت كسرتها اختك ضربت نقطة الضعف فيها مو شي تاني اكيد .
تحياتي للجميع