سعر صرف الدولار مقابل الليرة 10-1-2013 سوداء

[Jack Pot]

اقتباس: المشاركة الأصلية كتبت بواسطة shereen    حتى لو صار تهدئة لح يطلع السعر ويصير بين ال 200 وال 250 ليرة للدولار

عدم المؤاخذة ، مو كأنو ظلمتي الدولار شوي ، 500 رقم أحلى ، للمعلومات العامة فقط ، حوت السوق هوالمركزي و على رهن ، و بالمناسبة 200 ألف دولار كافية ليرجع السعر لل75 و يلي مفكر أنو المركزي ما عد عندو عملة بكون مخربط و مكتر و ملاحظة أنا لاني شاري و لا بايع بس عطيني أسم تاجر موجود حالياً و بوزن المركزي

[مجد]

على اي سعر اغلق سعر الدولار

[عماد-الدين]

اخي جاك كمان 200الف بنزلوا السوق هاي مش مفهومة ؟؟؟؟؟؟؟؟؟؟؟؟

[عابر مجيب]

صباح الخير

[عابر مجيب]

قاعد وملفلف من البرد من باب التوفير ، طول عمري بحب الاحتياط وبحسب للأسوأ ، مثلا مروحة بثلاث سرعات بحطها على التانية وبقول خلي التالتة ليوم أكثر حرا . واليوم عامل على اساس نصيحة اجدادنا :
خبي حطباتك الكبار لعمك آذار .
وبالمناسبة هذا دأب أهل عموم الشام ، يحبون التحوط ، بالمواد الاستهلاكية من صابون ودبس بندورة وانتهاءا بالمربيات والزعتر والزيتون والمكدوس( الحواضر ) وقد تم اضافة العملة الصعبة إلى المصاغ حاليا على مستوى ربات البيوت ، بعد أن كانت حكرا على كبار التجار الذين تلوعوا من التأميم واصبحوا يشغلون مليون في سوريا وله حماية بقدر الضعف أو الضعفين بالعملة الصعبة المودعة بقبرص أو لندن ، ومن لديه غرين كارد حاططهم بأمريكا . فكانت النتيجة مواطن كالجبل ما هزك ريح . وفوق كل الاحتياطات هنالك تكافل اجتماعي ومن يتعثر حقيقة يجد الأيادي ممتدة لنجدته ، خصوصا الحريم .
زحزح بعزمك ان اردت بناؤنا ..... غطفان ذو الجنبات هل يتحلحل

[د وهيب]

اقتباس: المشاركة الأصلية كتبت بواسطة shereen    حتى لو صار تهدئة لح يطلع السعر ويصير بين ال 200 وال 250 ليرة للدولار

السلام عليكم
اتمنى ان يصل سعر الدلار الى الف ليرة سورية . لكن الحقيقة لن يصل.وان كانت نتيجة اجتماع جنيف ايجابية
سنشهد هبوط اللدولار وارتفاعا للاسهم. من يقول ان ان النظام ليس عنده دولارات يخمن ويدجل.
وانا اقول لو استمرت الحرب عشرة سنيين لن تنفذ دولارات النظام.
السبب ودائع القذافي من ذهب ودولارات وارشيف الحكومة تبرع بها لسوريا .
كما تبرع صدام بامواله وسلاحه لايران وسوريا بعد ان تيقن ان الشر والاشرار محيطون به
فاصبحت سوريا وايران محور الشرق وقلب العالم
اللتين سترسمان مسقبل العالم لخمسين عاما قادمه مع دول البريكس وامريكا مع حرمان تركيا وفرنسا وبريطانيا والدول العربية من اي فائدة من الحرب على سوريا
هذا ماسمعناه ومايتداول به المثقفون في مجالسهم.

[انس الحموي]

اقتباس: المشاركة الأصلية كتبت بواسطة jack pot    عدم المؤاخذة ، مو كأنو ظلمتي الدولار شوي ، 500 رقم أحلى ، للمعلومات العامة فقط ، حوت السوق هوالمركزي و على رهن ، و بالمناسبة 200 ألف دولار كافية ليرجع السعر لل75 و يلي مفكر أنو المركزي ما عد عندو عملة بكون مخربط و مكتر و ملاحظة أنا لاني شاري و لا بايع بس عطيني أسم تاجر موجود حالياً و بوزن المركزي

أخي حبيت بس اعطيك معلومة بسيطة كتيرة انو لا مليون ولا عشرة مليون دولار اذا بيفردهم المركزي بالسوق بينزل سعر الدولار ..ولمعلوماتك انو المركزي كل يوم بيعطي البنوك وشركات الصرافة قرابة 7 مليون دولار و قرابة 6 ملايين يورو اي كل شهرين تقريبا يستنزف المركزي مليار من احتياطاته النقدية واقصد دولار ويورو ويستنزف من بقية العملات الاحتياطية مليار ايضا اي يستنزف شهريا مليار من عملته الصعبة وكلياتنا منعرف انو احتياطيات المركزي كانت قبل الثورة حوالي 30 مليار وهلىء مضى عامين تقريبا على بداية الثورة وصارف المركزي قرابة 22 مليار من احتياطاته وباقي 8 مليار وباعتقادي هي السنة بتكون حاسمة لنفاد احتياط المركزي ...
معلومة اخيرة مخلوف فقط من عائدات سيريتل يلي يوميا بتتخطى 300 مليون ليرة سوري هي شو رح يعمل فيها مخلوف أكيد رح يحولها عملة صعبة فما بالك ببقية مشاريعه يلي عما تدر عليه مليارات اكيد رح يحولها عملة صعبة وامثال مخلوف بهل البلد كتار واكيد عوائدهم رح يحولها عملة صعبة فمهما فرد المركزي عملة صعبة بالسوق مارح يقدر ينزل الدولار او اليورو ولو قرش واحد ...تقبل تحياتي اخوك انس الحموي

[shereen]

اقتباس: المشاركة الأصلية كتبت بواسطة jack pot    عدم المؤاخذة ، مو كأنو ظلمتي الدولار شوي ، 500 رقم أحلى ، للمعلومات العامة فقط ، حوت السوق هوالمركزي و على رهن ، و بالمناسبة 200 ألف دولار كافية ليرجع السعر لل75 و يلي مفكر أنو المركزي ما عد عندو عملة بكون مخربط و مكتر و ملاحظة أنا لاني شاري و لا بايع بس عطيني أسم تاجر موجود حالياً و بوزن المركزي

مساء الخير لاتزعل اخي جاك 500 ليرة ممكن قريبة كتير ليصير الدولار بقللك ليش وبشكل منطقي لانو بس تحط الحرب اوزارها لح تطلع فضايح وبلاوي الها اول مالها اخر وديون خارجية على سورية بسبب الانفاق الهائل على الحرب وحتما الخزينة وقتها لح بتكون فاضية ابسط مثال قدامك المازوت والغاز والخبز قديش وصل اسعارهم وهي الحكومة موجودة والنظام قائم فمابالك لو بلش شي اسمو اعادة اعمار سورية وبالخزينة مافي ولا دولار وديون وبظن اعادة الاعمار صارت شي ترليون دولار بس هللق الدولار مستقر وهديان لانو ببساطة السلاح اللي عم يستخدم من قبل الجيش اللي كلو جاية من روسيا كلو ديون وعطيني اسم اي ضيعة او بلد او محافظة صار فيها اي نوع من اعادة الاعمار مافي فبلتالي الدولار نايم لانو مالو شغل غير المواد الاساسية من اكل وشرب والخ او شو رايك

[Jack Pot]

اقتباس: المشاركة الأصلية كتبت بواسطة عماد-الدين    اخي جاك كمان 200الف بنزلوا السوق هاي مش مفهومة ؟؟؟؟؟؟؟؟؟؟؟؟

صديقي وقت بدك تشتري بتلاقي مئة شخص حوليك بس وقت بدك تبيع ما حدا بيشيل منك ، مثلاً كنت عند صرّاف يوم الثلاثاء الماضي إجاني رفيقي و بدو يبيع 30,000 دولار ، حكيت مع الصراف قللي 92 رحت لعندو قللي انعرض علي 130,000 على 91.5 مالي مصلحة ، بين التلفون و الروحة لعندو مافي 3 دقائق ، فما بالك اذا صار عرض و فهمك كفاية

[Jack Pot]

اقتباس: المشاركة الأصلية كتبت بواسطة shereen    مساء الخير لاتزعل اخي جاك 500 ليرة ممكن قريبة كتير ليصير الدولار بقللك ليش وبشكل منطقي لانو بس تحط الحرب اوزارها لح تطلع فضايح وبلاوي الها اول مالها اخر وديون خارجية على سورية بسبب الانفاق الهائل على الحرب وحتما الخزينة وقتها لح بتكون فاضية ابسط مثال قدامك المازوت والغاز والخبز قديش وصل اسعارهم وهي الحكومة موجودة والنظام قائم فمابالك لو بلش شي اسمو اعادة اعمار سورية وبالخزينة مافي ولا دولار وديون وبظن اعادة الاعمار صارت شي ترليون دولار بس هللق الدولار مستقر وهديان لانو ببساطة السلاح اللي عم يستخدم من قبل الجيش اللي كلو جاية من روسيا كلو ديون وعطيني اسم اي ضيعة او بلد او محافظة صار فيها اي نوع من اعادة الاعمار مافي فبلتالي الدولار نايم لانو مالو شغل غير المواد الاساسية من اكل وشرب والخ او شو رايك

حكيك على راسي و كتر خيرك ، بس الفكرة أنو وقت بدو يصير إعمار سورية أولا ما رح يطلع شي من الخزينة ، رح يجي مستثمرين من برّا ، يعني رح يفوت دولار مو يطلع و لا تواخذيني بس بدا شوية تفائل حاجتنا كامشين السلم بالعرض و عيد ميلاد سعيد و يومك مبارك