سعر صرف الدولار والذهب مقابل الليرة السورية ليوم الخميس والجمعة 15و16 - 05-2014

[عابر مجيب]

انا بحط اللاب توب وعين على الشاشة وعين على التلفزيون ، بس من كتر التقليب بنسى وين كان الخبر ، ما علينا .
أحلى شي طلعولنا الدارسين لعلم الفراسة ، هاد هلأ بيسموه لغة الجسد ، وصار علم من ضمن علوم الاقتصاد ، للتلاعب بمشاعر الزبون وتشليح أكبر قدر من المال ، من خلال البرمجة اللغوية العصبية .
اللي مو مطلع على هالعلوم النافعة بيتخيل أن لغة الجسد ، شغلة قليلة ادب ، والبرمجة اللغوية العصبية إلها علاقة بعلاج المعاقين .
يمكن يكون هالحكي ، بما انه الانطباع الأول ، نعم ممكن يكون صحيح ، يعني بيعتبرونا معاقين ، وبدهم يتشاطروا علينا .

بدل ما ندخل بتفاصيل هالعلوم الجديدة ، واللي صارت معروفة ومدروسة ، وصار ممكن تطبيق ما يليق من الحركات واسلوب الكلام ليخدعونا أكثر . بحيث صار لازم نعرف هل المتحدث دارس هالمادة وعم يلعب علينا ، أم هو عم يتصرف على سجيته .
نعم بدل الدخول والضياع بالتفاصيل ممكن نرجع للأصل ونقيس عليه حتى ما نضيع .

من تراثنا ، نقول حبيبك تحبو ، ولو كان عبد اسود ، وعليها قصص وملوك ومكافآت على اساس كان جواب محكم .
تاني شي
لما بنحب شخص ، بيحكي منقول حكيو حلو ، ولما بيسكت بنقول إلو تم ياكل وما ألو تم يحكي
لما ما بنحبو ، إذا حكى بنقول لتات ، وإذا سكت بنقول قاعد متل الخنزير المقوص .
فكيف طلع معهم علم بيفسر تصرفات الفرد ؟ إذا نحنا متنحين من أول الجلسة وما بدنا نغيير فكرتنا المسبقة ؟
وبالمناسبة صرنا كلنا نقرف من المسوق المتحذلق ، وبنفهم عليه من أول كلمتين وما بقا بدنا نشوف البضاعة ، حتى لو كانت مجرد تسويق لنفسه وبدون بضاعة للبيع المباشر .
بعد ما طولت عليكم ، الفكرة جاءت من خلال توصيف علماء لغة الجسد لمرشحي الرئاسة المصرية ، وخصوصا انها تصادف وشعرت منها انها كلها كذب وزعبرة .
قال هيك بشوف واحد وببلش : لديه ثقة واضحة من نبرة صوته ، حركة ايدو بتوحي انه انسان عملي ، رقيق وحازم ! يعني بالنتيجة هي أشبه بالأم اللي عم تخطب لأبنها
من تراثنا أيضا :
خنفسة شافت بنتها على الحيط ، قالت لولية بخيط
القرد بعين أمو غزال .

[عابر مجيب]

بالمشاركة الماضية كنت بدي اكتب عن تقلبات اليورو أمام ملك العملات
طلعولي بخبر لغة الجسد ، نسوني ان الصالة للعملات
اليوم جمعة سامحونا ، والله هنن نكشوني مو مني .

[عابر مجيب]

اليورو عم يترنح

16 Apr 2014 07:00 UTC - 16 May 2014 07:01 UTC
EUR/USD close:1.37127, low:1.36520, high:1.39463

3% نزول وطلوع ، هدول مو لعبة
بزماناتي ربحت برحلة مجموعة نرويجية ، مبلغ بسيط ، وربحت اضعافه فرق عملة .
اتفقنا على سعر 1.35 وتم تحويل المبلغ ، ونفذنا على سعر 1.59 بربح حوالي 18%

[MONIR]

اقتباس: المشاركة الأصلية كتبت بواسطة muh.siofi    صباح الخير للجميع ... وجمعة مباركة هناك استفسار للسادة المشرفين على الموقع حول شريط أسعار العملات والمعادن في اسفل الصفحة ... اشاهد الآن شريط المعلومات الموجود في قناة cnbc واقارنها مع شريط المعلومات اسفل الصفحة فأرى ان اسعار الذهب في الموقع 1.3715 أما في القناة فهو 1.3655 وبورصة الذهب في الموقع 1293 وفي القناة 1305 ارجو التوضيح حول هذه الفوارق

قناة cnbc عم يحصل فيها اعطال بشكل مستمرة
وتحديث الاسعارفيها متوقف من البارحة الظهر
وكل الصرافين والصياغ لم يعودا يتابعوها

[عابر مجيب]

اقتباس: المشاركة الأصلية كتبت بواسطة muh.siofi    صباح الخير للجميع ... وجمعة مباركة هناك استفسار للسادة المشرفين على الموقع حول شريط أسعار العملات والمعادن في اسفل الصفحة ... اشاهد الآن شريط المعلومات الموجود في قناة cnbc واقارنها مع شريط المعلومات اسفل الصفحة فأرى ان اسعار الذهب في الموقع 1.3715 أما في القناة فهو 1.3655 وبورصة الذهب في الموقع 1293 وفي القناة 1305 ارجو التوضيح حول هذه الفوارق

تحياتي
اعتمد اسعار الموقع فهي دائمة التحديث
انا اتابع الاسعار في موقع متخصص ( إكس إي دوت كوم ) وأجد الموقع مطابق تماما .

[muh.siofi]

اقتباس: المشاركة الأصلية كتبت بواسطة عابر مجيب    تحياتي اعتمد اسعار الموقع فهي دائمة التحديث انا اتابع الاسعار في موقع متخصص ( إكس إي دوت كوم ) وأجد الموقع مطابق تماما .

ألف شكر أستاذنا ... كلام صحيح 100%
على ما يبدو كان في عطل بشريط القناة ... بالفعل الموقع أصح

[osama khaled]

السلام عليكم لو سمحتوا حابب استفسر عن اليورو , هل اليورو مرغوب بسوريا؟ يعني لو جبت معي يورو بلاقي تصريف بالسعر الحقيقي لانو في صراف قلي انو سعر الدولار اكتر شي مرغوب و بيعطوني بسعرو الحقيقي بسوريا شكرا جزيلا

[عابر مجيب]

اقتباس: المشاركة الأصلية كتبت بواسطة osama khaled    السلام عليكم لو سمحتوا حابب استفسر عن اليورو , هل اليورو مرغوب بسوريا؟ يعني لو جبت معي يورو بلاقي تصريف بالسعر الحقيقي لانو في صراف قلي انو سعر الدولار اكتر شي مرغوب و بيعطوني بسعرو الحقيقي بسوريا شكرا جزيلا

قبل ما تضيع بالتفصيلات ، اليورو ما مرغوب نهائيا والنصيحة حولهم لدولار ، رح تخسر بالتحويل هلأ ، بس بيضل أربحلك وقت بتصير بسوريا . ولا يتفوق على اليورو بالصعوبة إلا الدرهم والدينار والريال ، حيث تشعر وكأنك تعرض بهت تايلندي أو شلن أوغندي .

بنرجع للسعر الحقيقي ، نحنا لهلأ ما شفنا هالسعر ، آخر شي قالولنا أن السعر وهمي ومن يومها ماشيين على هالأساس .

الدولار مرغوب عند كافة الصرافين النظاميين دائما، الصرافين غير النظاميين محاربين دوما ومخالفين وقد اختفوا من السوق نظريا ، ولكن في اسوأ الأحوال كأيام العطل والأعياد وخارج أوقات الدوام ، ستجد عند أي شخص الرغبة بشراء الدولار ولو بسعر بخس حينها ، بينما اليورو لا يثير شهية أحد .

[expert]

بما انو يوم الجمعة التداولات ضعيفة وبما انو فيه كذا مشاركة حول اعادة الاعمار رح اضيف ملاحظات
الموضوع كله عبارة عن ساعات بث اعلامية يجب ملءها باخبار وندوات ونقاشات لا اكثر بعد فترة رح يطلع خبر اهم من اعادة الاعمار ورح يصير التركيز عليه ورح يتم نسيان المناطق المنكوبة بحمص
متل ما تم نسيان مناطق منكوبة قبلها في محافظة حلب تمت اعادة السيطرة على مدينتين جنوب شرق حلب هما السفيرة وتل عرن وحاليا خاليتان من المسلحين لكن دمار شبه كامل ولم يتم اي ذكر لهما ولا حتى ذهب الاعلام للتصوير ولم يسمح للاهالي بالعودة ومازالو مشردين بالقرى المجاورة
واذا بدكم ارجع بالزمن للواراااااااااااء كتير
فيه بمدينة حلب حي اسمه المشارقة مشهور وهو من الاحياء القديمة ومن اهاليه كان المرحوم زهير مشارقة احد المسؤولين السابقين في الحزب والدولة المهم
هذا الحي الجزء الاكبر منه تعرض لدمار شبه كامل خلال احداث الثمانينات ومنذ ذلك الحين لم يتم اعادة اعماره بل تم استملاكه من اهله وتحويل اراضيه لمشاريع كبيرة لم يتم تنفيذ اي منها حتى الان منها مكتب الاسد بحلب
وانا اذكر البيوت المهدمة كانت موجودة حتى ما بعد عام الالفين وبعدها تم مسح الحي القديم بالكامل ولم يبقى منه الا مسجدين واقفين داخل ارض كبيرة محفورة حولهما بعمق 8 امتار والمسجدين مغلقين وسيتتكفل عوامل الجو بهدمهما لان الحفرية حولهما لم تترك مسافة امان بينها وبين جدرانهما الا اقل من متر من كل جهة
المهم بالموضوع ان اعادة الاعمار موضوع مكلف جدا وغالبا الدراسات الاقتصادية ستنصح بعدم اعادة الاعمار بل الهدم الكامل واعادة توظيف الارض اما الاهالي فان كانوا من المحظوظين او كان الهم عند الحكومة خاطر فسيتم تعويضهم بمساكن شعبية متل مشاريع السكن الشبابي وهذا الموضوع بحاجة الى ما لا يقل عن 8 سنوات هذا في حال كان هناك جدية وتوفر بالتمويل واوضاع امنية جيدة وحكومة نسبة الفوضى ولفساد فيها ضمن حدود المقبول
اما عن تمويل الشركات الاجنبية للموضوع بصراحة هناك بذهني حالة وحيدة
وهي حالة اعادة اعمار الضاحية الجنوبية ببيروت
رغم ان حجم الدمار هناك اقل بما لا يقارن عن اي منطقة صغيرة ببلدنا الحبيب

[black_ghost87]

جمعة مباركة للجميع. الحمد لله تم الدخول على زوج اليورو دولار من مستويات 1.3665 و تم الخروج اليوم على مستويات 1.3720.