يوميات لقمان في حمص

[BROKER]

يا هلا ومرحب بابو حكيم الغالي والحبيب

عم قول منور الموقع ... لم اقرا ما كتبت احببت ان ارحب بك اولاً

[arnouri]

حماك الله ابو الحكيم
وحمى الله شباب واهل سوريا من الطغاة

[مجرد إنسان]

الحمد لله على سلامتك يا أبو حكيم الدين ، والله يحميك ويحمي عائلتك ويحمي كل سوري مظلوم من الظلم والأذى

[لقماان]

اقتباس: المشاركة الأصلية كتبت بواسطة لقماان    عائد إليك يا حمص ليلتها حاولت جاهدا قناع أم حكيم أن أنزل إلى حمص لكنها لم تنفك عن البكاء و هي تقول لي ألا تفكر فينا ألا تفكر بأولادك........ألا ترى ما تظهره قنوات التلفاز سواء المعارضة و سواء التلفزيون السوري من حجم المأساة و الأخطار التي تعيشها مدينة حمص.......... أطرقت رأسي و قلت لها: يا أم حكيم ألا ترين الحال التي نعيش بها ألا ترين حجم الاستغلال لتجار الأزمات في كل مكان... ألا ترين الناس الباقين في حمص رغم كل المآسي .... انني أحبكم و أخاف عليكم و أخذت بالأسباب و أخرجتكم من مدينة حمص .... لكن الله هو المسلم ...و الله هو اللطيف الخبير الرءوف الرحمن الرحيم .... سأتوكل على الله و أنزل الى حمص ....ادعي لي بالسلامة و التوفيق ...... الحياة ستستمر و الموت مقدر من الله عز وجل .... مقدر في الزمان و المكان ............... الموت كأس سيتجرع منه الجميع سواء كانوا موالاةأ ومعارضة ..... عنئذ سيقفون بين يدي الله العادل و ليقدم عندها كل منهم حجته ..... سأنزل الى حمص .................... قالت لي جواب نهائي .....صفنت قليلا ...قلت لها نعم ...... قالت لي :يمكنك الاستعانة بصديق........ قلت لها جواب نهائي الله يساعد هالصديق شو بدو يأدم ليأدم ....... و الله هو كل الأصدقاء ما قصرت ....بس بهي الأيام الصعبة اي حتى الصديق صار لازموا مساعدة .............. هيا يا أم حكيم اخلدي للنوم كي نستيقظ على صلاة الصبح ...فصلاة الصبح حاضر ..تساوي الدنيا و ما فيها ... أطفأت أم حكيم النور ...و لكنها لم تطفئ محرك البكاء عندها ....الى أن انطفئ لأنو خلص بنزينا و على علمكون بحلب يوجد أزمة بنزين خانقة ...و لا مجال لتأمينه للاستمرار في عمل محرك البكاء .....وهذه هي احدى فوائد الأزمات في حلب ..................... نامت أم حكيم مجهدة من البكاء و المحاولات اليائسة التي كانت تقوم بها لثني و عدولي عن فكرة السفر ..... لكن عيني لم تنم ...كانت أفكار تأخذي و أفكار تجيبني ...و قلبي يخفق بشدة .....لقد طال بعدي عن حمص و بالتالي ركنت نوعا ما الى الحياة الآمنة في حلب ....فصرت أخاف سماع صوت الرصاص .... فعندا علقت بين بيت (ب) و بيت (م )بحلب ...كان اطلاق النار غزيرا لكنه لم يكن يقارن بأصوات حمص و مع ذلك أصابني نوع من الهلع عندها لكثرة القتلى وهوان الدم الانساني على الانسان ...... والغريب انه عندما كانت أصوات القذائف تأتي من الراموسة في طريقها الى مطاردة منازل المسلحين في الريف الشمالي بحلب ..لم أخف ....يومها و نمت و كأني في بيتي في حمص ....... جالت عيني في الغرفة نظرت الى فرشات الاسفنج التي ننام عليها ...نظرت الى الأولاد و هم نائمين ....نظرت الى حصير النايلون الممدود في الغرفة ......كان صوت هدير براد بردى الذي اشتريته بحلب بخمسة آلاف ليرة يمزق هدوء و سكون و خشوع الليل .....على ما يبدو أن براد بردى له من اسمه نصيب ...فهاهوا ذا هدير نهر بردى يعود حيويا هذه الأيام بعد سنوات عجاف ما كان يسمع صوته حتى ظن أهل نهر العاصي أن بردى مات حمدت الله كثيرا و قلت بالفعل (كما اكتشف أخونا طارق في صحراء العراق ) أن الانسان يمكنه العيش بالقليل القليل ان رضي ...و الكثير من ما كنا نركض ورائه لاهثين في السابق ...ما كان الا بهرج من بهارج و زخارف الدنيا....يمكننا الحياة بدونه بكل بساطة حمدت الله كثيرا لأني بحال أفضل من ملايين الناس .......... صدح آذان الصبح و لم تعرف عيني النوم أيقظت أم حكيم و قمنا و توضأنا و صلينا صلاة الصبح و حمدنا الله سبحانه و تعالى على نعمة الإيمان التي تهون على المؤمنين مصائب الدنيا.....ليقين المؤمن بفكرة زوال الدنيا ...و ليقينه بالموت ومن ثم النشور ..... يالله يا أم حكيم ضبيلي غراضي بدي انزل بس يشئشئ الضو .... أي ايه... فجأة أم حكيم ضربت مرش محرك البكاء عندها .....بس ما أكلت هم كتير ...الت لحالي مافي بنزين بحلب أي الليتر عمنباع ب 125 و مافي .....أكيد ما راح يشتغل محرك البكاء هللأ ......... أي مو طلعت أم حكيم متلها متل كل الحلبيات عاملة حساب ....من وين جابت البنزين و كيف ما بعرف .... بس بتوقع انوا بالليل وأت ما شافت نتيجة .. وآلت أم حكيم لحالا :ياخيتوا خليني خبي هالبنزينات لبكير بلكي الله بيهديه وأتابستفيد منون لأنوا هللأ ما عاد يأثر فيو البكي ....علفاضي عمأصرفون ...ووأت الأزمات لازم الوحدة تضب ايدا بكل شي... أمت و قبلت أطفالي و جبين أم حكيم ...... و قلت لها السلام عليكم و أغلقت الباب ورائي ....ووينك يا حمص ...اشتئتلك... تاكسي ...تاكسي .....على البولمان اذا بتريد ..... في داخل مدينة حلب مررنا على العديد من الحواجز التي بدأت أعدادها تزيد في الفترة الأخيرة ...... ولفت نظري بعض العساكر الصغار في العمر و هم نائمون مرهقون على الرصيف وكل منهم يحتضن....من والدته ......لا ...كل منهم يحضن بارودته حالما بوالدته... من اللذي رماكم في هذا الموقف الذي لا تحسدون عليه؟؟ هوب وصلنا على البولمان صوت جوهري يصيح: ماشي حمص الشام ماشي حمص .. بألبي فرحت وأت عميؤول ماشي حمص .....معناتا الحمد لله رب العالمين لسا في حمص .................. طلعت و أعدت بالبولمان و سألت المعاون عن أيو طريق بدكون تروحوا آل على الدولي .. سألتوا شلون وضعوا ...آلوا ماشي الحال بس فيو مخاطرة ....حمدت الله و قلت يا رب.................. و انطلق البولمان و ذلك في يوم الثلاثاء 26حزيران 2012 و في الطريق العديد من حواجز الجيش النظامي كانوا يوقفوننا و يطلبون منا الهوية الى أن وصلنا قبل مدينة سراقب ...أوقفنا حاجز للجيش النظامي و طلب الهويات ....ثم مشينا بحدود خمسة دقائق!!! و هناك فجأة يقفز أحد الأشخاص يحمل رشاشا...!!!! وقف أمام البولمان وبدأ يلوح بيده أن ننعطف نحو اليمين لندخل مكاتب السفريات التابعة لمدينة سراقب على الطريق الدولي و هو تجمع عدة مكاتب سفريات معروف لمرتادي طريق حلب ............ كل المسافرين استيقظوا من النوم و اشرأبت رقابهم و انخطفت نظراتهم الى ما يحدث أمام البولمان و ذلك لقيام السائق بتخيف سرعة البولمان فجأة و انعطف يمينا حسب اشارة المسلح المدني له و توقف البولمان بهدوء و عندها............. .............................يتبع .............................

......معركة خان السبل 26/6/2012.....
توقف البولمان بهدوء و اذا بجموعة تقارب العشرة أشخاص مسلحين بالرشاشات و لابسين الجعب الممتلئة بمخازن الرصاص و القنابل تحيط بالبولمان و فتح السائق الباص و خرج شخص مسلح الى البولمان..و رمى التحية و طلب منا أن نخرج هوياتنا ......سألت أحد الجالسين بجواري هل هو حاجز نظامي أم للمعارضة ...فأجابني انه حاجز لما يسمى بالجيش الحر ...فاستغربت و قلت له أي ما في بينوا و بين الحاجز النظامي يادوب كيلوا متر و شوي ...
كيف هيك .....!!!؟؟؟
أطبق الصمت على البولمان و الشخص المسلح يدقق في الهويات ثم يعيدها الى أصحابها ....
لم أشعر بالخوف ...فكنت أقول لنفسي يلي مانوا عامل شي
ما حدن بيتعرضلوا ...........من المعارضة .....
وصل الشخص لعندي و أخد الهوية ..و هوي صار يدقق بالهوية و أنا صرت دقق بملامحوا .....
و شردت و ألت لحالي أكيد هالشخص عندو أهل و اخوة و أصدقاء و ممكن أملاك ....لي تارك كل هالشي .....
و حامل البارودة و حاطط روحوا على كفوا .....
معقول مشان المصاري ....ما بتوقع لأنوا يلي بدو مصاري معناتا شخص محب للحياة ...
و الشخص المحب للحياة اي ما بيؤوم بيخاطر بحياتوا مشان المصاري .......يعني اذا مات و هو احتمال كبير شو بدا تنفعوا المصاري .....
طيب و لنفترض انوا شخص بيحب المخاطرة مشان المصاري ...
طيب : لي ما شلحنا مصرياتنا يلي بجيبتنا و ما أخد دهبات النسوان يلي كانوا معنا بالبولمان
طيب مشان شو شايل هالشخص سلاح...
و أنا هيك عمأسأل حالي ألي تفضل هي هويتك أبووة...
أخدت هويتي و من لهجتوا للشخص اكتشفت انوا هو من اللاتئية يعني مانوا من سراقب ....
لأنو لفظا متل أسعد و جودى في
مسلسل دولة ضايعة عفوا مسلسل ضيعة ضايعة
رجعت تسائلت شو جايبوا لهالشخص من اللاتئية لهون ...و شو يلي دافعوا ليحمل السلاح ؟؟؟؟؟؟؟؟هو ورفآتوا ...
و مشان شو طلع على البولمان........
أسئلة ...أسئلة ....أسئلة كتير
و ما كنت أأدر أعرف لائيلا جواب يقنع الاعلام.......
المهم خلص تفتيش على الهويات و نزل من البولمان و هو عميؤول للسائق توكل على الله لا تواخذونا شباب .....
مشي البولمان لفترة بسيطة كانت صارت الساعة 8و ربع وصلنا لأبل المعرة بشوي على منطقو اسما خان السبل هيك أريت الاسم الموجود على الجسر يلي بوشنا ...
و ألت لحالي بائي شي ساعة و بصير بحمص باينتوا الطريق ميسر على اسم المنطقة يلي انشلفنا فيا بحلب ....
الله وكيلكون لسا ما خلصت الجملة انئلبت الدنيا .....
(لكان هاد درس مشان يتعلم الواحد يؤول الحمد لله رب العالمين و باذن الله ما هيك أطع بت من عندوا يؤول الطريق ميسر و راح وصل ......)
وفجأة ارتفع صوت الفرامات السي و صارت تلف السيارات بأرضا و تمشي بعكس الطريق و طايرة من السرعة و البولمان كمان لف بأرضو بحركة سريعة كنا راح نطير فيا برات الشبابيك...و رجع مخالف و هو مأسرع بنفس الطريق ...رفعت راسي لأعرف شو يلي عميصير ...
شفت رتل من الدبابات عميمشي و في دبابة بنص الطريق التاني نازلة اطلاق نار ...و صوت رصاص و هدير طيارات..
المهم رجع البولمان هيك و صف بين مجموعة من السيارات يلي عملت متلوا ....
نزلنا من البولمان مرعوبين ....مشان نتخبا ورا البيوت
يا جماعة تؤول فيلم سينما ...
طيارات هيلوكبتر عمتضرب ..و دبابات عمتنصاب و بيوت عمتتهدم ....شي متل الكذب.....
ما لائينالكون حالنا الا و صرنا أول سيارة مع انو كان البولمان بالنص................. فالغانم كان يلف سيارتوا و يرجع فيا على حلب ...
المهم نادالنا الشوفير و آل يالله ياشباب خلينا نطلع على البولمان
عاد الكلمة كذا مرة و ما كانت العالم تطلع ...
اجت قذيفة أريبة كتير مننا و صوتا بيصرع الآذان ...و تعبت بالجامع تبع خان السبل ....
وأتا هوب كل العالم صارت جوات البولمان بقدرة قادر و صارت تمسح عرقا .....و يلي بيحب النبي يخلي ....
ركب الشوفير و آل وينك يا حلب ركيض .....
كنا أطعنا نص المسافة ....سبحان الله ما تيسرت ..
سبحان الله شو محظوظ أنا بحضور الأمور الغير روتينية .....يعني هي المعركة ضجت فيا وسائل الاعلام و بالفعل كانت متل ما شفت بعيني.....
مقبرة للدبابات حقيقية للدبابات ..........
(بعدين بمشوار تاني أحصيت الدبابات المحروقة يلي لساتا على الطريق كان عددون أربعة تنتين على يمين الطريق و تنتين على الشمال و كل العالم يلي على الطريق عمتشوفون............... )
مقبرة حقيقية للدبابات......
آه ....يا الله....القتلى سوريين من طرفي المعركة و الخسائر المادية سورية ...و البيوت التي تهدمت جراء المعركة سورية ....و المقبرة كانت للأسف لدبابات روسية ...صحيح أنها روسية الصنع ...لكنها سورية فثمنها مدفوع من آلاف قطرات عرق هذا الشعب المسكين...و العساكر المجندين الذين سقطوا سوريين و القتلى جيعهم سوريين ......
الا الجامع الذي أصيب فهو ليس ملكا لسوريا ...
انما هو بيت من بيوت الله....
ألا لعنة الله على من زج البلد في هذا الأتون ....
رجعنا باتجاه حلب ...آم الشوفير طلب من كل واحد مية ليرة زيادة مشان يعبي مازوت لأنو الطريق طال علينا ...
و المازوت بدو يشتريه من عند المحتكرين أقل الشي بخمسين ليرة لليتر اذا كان محظوظ ...
هون العالم نسيت الرعبة يلي أكلتا و اشتغل العياط ...
على بدفع ما بدفع بترجع ما بترجع ....
ما نسكت واحد الا يطلع عشرة محلوا يعيطو.....
المهم أنا دفعت من تم ساكت و عالم دفعت و عالم ما دفعت..
لفلفنا الأصة بدون عدالة كالعادةفي لفلفة كل الأصص ببلادنا ...يعني كيف ما كان بدنا خلاصتا ..
سألتو للشوفير ايمتا ممكن نوصل حمص ...
آل شي الساعة 12.5 الت لحالي منيح المهم يوصل أبل الساعة تنتين ...و طلع البولمان على طريق الرقة
و هالمرة عاد يلائي مازوت ...هيك طول الطريق ...
نشحد شوي من هون و شوي من هون ....لحد ما وصلنا على ضيعة تلعمري ...هنيك البولمان ...وأأف خلاص ...
نزلت عالم خبيرة مدري شو عملوا بالمحرك و سحبوا بطريقة فنية المازوت يلي بالمضخة أو مدري من وين المهم ... بعد وأفة نص ساعة مشي البولمان لحدود المشرفة
و هنيك في عالم حاطا المازوت ببيدونات و عمتبيعوا ...
أشتروا الليتر بشي ستين ليرة و آمت الركاب هي يلي تنتع البدونات و تجيبون على البولمان ......
أخيرا مشي الحال ...بس صارت الساعة تنتين الا عشرة دقائق ....و أنا لازم كون بالبولمان أبل التنتين مشان لحق جماعة المعمل يلي بدا تمرء من أدام البولمان اذا ما لائيت تكاسي تاخدني لعندون ...
فأنا صرلي غايب عن حمص شي خمسة أشهر ....و ما عاد أعرف شو الترتيب يلي بالبلد هللأ من وين بدي امشي و أيو شارع فيو قناص و أيو شارع فيو قصف و ياهل ترى لسا موضة الخطف بسيارات التكسي أو لأيو شخص عميمشي دارجة ....... بدي روح و لوين و كيف بدي وصل ...
ألت لحالي لحاول اتص بالموبايل ....
يا حبيبي ..كمل النئل بالزعرور ...(مثل حمصي )
ما في و لا شحطة تغطية .....
هون صار العرق يزخني شو بدي ..ساوي ...و شو بدي اعمل ..اذا ما لائيت حدن أداالبولمان ....
بعدين خففت عن حالي الاضطراب و ألت لحالي ...بأسوأ الاحتمالات بنام بالبولمان لتاني يوم لحتى رب العالمين يفرجا علي و يا شوف حدن بعرفوا يا انو تجي تغطية الموبايل .......................
وصلت على مدخل حمص الساعة تنتين و نص ....
ووأفنا على الحاجز يلي أبل البولمان ......
طلع العنصر بئقة و أمان و طلب الهويات ....
و أنا كنت عمحاول المح شي من معالم حمص البهية ....
ما شفت الا الدخان الأسود و الأبيض الموجود بكثافة
فوء القصور و جورة الشياح و القرابيص و الخالدية .......
هاد الشي الوحيد يلي شفتوا وأتا من اطلالة حمص البهية ...
................................يتبع ...........................

[سندباد]

الحمد الله على سلامتك اخي لقمان.... الك وحشة بجد

اذا كان لكل اكلة ملح فانت ملح المنتدى بدونك لا طعم له .....

طبعا هاد رأئي الشخص بحضرتك يمكن في اعضاء ما بوافقوني على الوصف خصوصا الشيف رامي بما انو صار يعرف يطبخ

باتمنى انو يكون زيارتك دورية للمنتدى حتى تعطيني شوية من جزمزاتك ههههههه

[Tareq]

الحمد لله على سلامتك اخ لقمان يعني حكينا بالموضوع من قبل ما في داعي ليك مغامرات بالوقت الحالي بعرف الغربة صعبة بس كمان أولادك وزوجتك بحاجة لالك هالايام خاصة مع يلي عم يصير بحلب حاليا. صحيح أنا لعند منك وما رديت على حدا ولا حتى على محرك البكاء تبع مرتي يلي قوتك ١٠٠٠٠ حصان ويلي لسا شغال لهلا وسافرت بس حالتك مختلفة. الله يردك لعائلتك سالم ويديمك لالهون ورجاء حار من اخ اعتبروا طلب او امر او اي شي لا تنزل مرة تانية. انشاء الله لتنزل المرة الجاية بشكل نهائي وبعمر بيتك وتسكن فيه. هاد أملنا بالله الذي لا يخيب امل ورجاء احد

[لقماان]

االأخ غسان و الأخ غالب و الأخ رامي و الأخ أبو معاذ و الأخ مجرد انسان
و الأخ سندباد و الأخ طارق ...........
و الى كل من سجل مداخلة سابقة في هذه اليوميات الحزينة.........
لم تمكني ظروفي من الرد عليها .................

الله يسلمكون و يسلم أهلكون و عائلاتكون جميعا و شكرا لكم على مداخلاتكم الغالية كثيرا على قلبي .......و كم كنت أتمنى أن أرد عليكم ردا ردا .....
و بالأخص كام مداخلة مميزة و على رأسا مداخلة صديقي الصدوق ......( يا لطيف كنا راح نزلء باسموا .......وكمان مداخلة صديقي .....و وكمان صديقي ...وكمان صديقي .....وكمان صديقي .......و كمان صديقي .......
يا جماعة و الله كلكون أصدقائي و اخوتي و مداخلاتكون على العين و الراس .....................
لكن عذري أني استخدم الانترنت عن طريق الموبايل (ثري جي ).........

[hesham]

الحمد لله على سلامتك وسلامة عائلتك
ندعو الله ان تعود سوريا أفضل مما كانت

[Abo Karim]

أخي لقمان، الحمد لله على سلامتك أنت و العائلة الكريمة، و عوضكم الله قصوراٌ في الجنة و حماكم أنتم و أهلنا و أحبابنا في سوريا.

[abu mhd]

تحياتي لك ابو حكيم الغالي
وفقك الله لما فيه الخير و أعانك على ما ابتلاك به
اذا أحب الله عبدا ابتلاه فعوضك الله خيرا
في الدنيا و الآخرة