سعر صرف الدولار والذهب مقابل الليرة السورية اليوم الاثنين 25 -11- 2013

[محمد19]

اقتباس: المشاركة الأصلية كتبت بواسطة عابر مجيب    الله يكون بعونك وعون كل تاجر ما عاد عرف رأسمال بضاعته إلا يوم بيوم وبيقولوا التجار : من عرف رأسماله باع واشترى ، غير هيك شو بيعمل ؟ على العمياني مثلا ! بس شغلة صغيرة المضاربه على الليرة تطيل عمر الليرة ، شي أكيد طيب اطالة العمر لها ثمن ، مين اللي عم يدفع ؟ مو هاد معناه استنزاف امكانيات الناس حتى يصلوا إلى الحضيض ؟ هاد مو منطق مجرد ، الله يرحم الكورفوازييه روحو طلبت الرحمة ، قال : لا شيء يفنى ، ولا شيء يولد من العدم وهيك بيكون اللي عم يفنى من مقدرات المواطن عم يولد بدعم الليرة ويركبلها رجلين من قصب . طيب وبعدين ؟ الناس بتفلس والليرة بتنهار وهيك منخالف أصل المعادلة إلا إذا علمنا بأن هذا الفناء ولد في حسابات تجار الأزمات ، هيك توازنت المعادلة .

السلام عليكم
رائع
خصوصي قانون لافوازيه
و فغلا انو استمرارية الليرة من خلال المضاربة يعني انها تستمر على حساب الناس و من اموالهم

[mak]

في شغلة مهمة ذكرها الأخ خيرو مبارح ..انو مو مبسوط غير يللي معو سوري......بس هو ما كمل ليش مبسوط.....انا رح كمللكم ......مبسوط لأنو عم يسن سنانو مشان يشتري فيهم دولار برخيص......يعني ما حدا فرحان بالسوري مشان يخليه سوري بس كلو عم يستنى القاع ليشتري منو......و حاليا انا معي شوية سوري ...و كمان عم سن سناني

اشتريت اليوم شوي ب 147 من واحد بدو يبيع لصراف عالساعة شي 2 .....و هلأ سألت المسا صويرف...قلي السعر 144- 146 .......في واحد تاني سالتو قال 140 و ما في مين يشيل .....قلتلو انا بشيل .....بس ما عندو!!......على كلن بانتظار الغد .....و بنشوف شو الأسعار...اتوقع سياسة القطيع غدا مستمرة ...هالمرة رح حاول استقيد منها...نصحنا كتير و ما حدا رد ...مو ذنبي بقا!!

[عابر مجيب]

اقتباس: المشاركة الأصلية كتبت بواسطة ryad    يا سيدي كانك قاعد بقلبي انا رح امشي مع القكرة يلي عم تقول انو ارتفاع الليرة هي انو العالم خافت و عم تبيع دولاراتا يا سيدي و انا موافق هالسوري بدل الدولار شو عم ينعمل فيه؟ تجارة؟ بناء؟ يا سيدي دعارة حشيش؟ لاء كل هلسوري عم بيروحو عالاكل و الشرب و هالشي شو معناتو؟ السوري بس يخلص و العالم يلي قلبت دولاراتا سوري شو رح يصير فيا؟؟؟ هدول العالم ازا حدا رجع صار معو كوشة سوري صدقني رح يرجع يبدلون بدولار بعدين حتى لو ما بدلون ازا الشعب فقير قديش وقتا رح تسوى الليرة؟

هاد اللي عم يطول عمر الليرة ، بس هي المصاري الدوارة كل مرة بتنقص شوي ، وبتروح لجيوب اللي احتكروا توريد الأغذية ، وكل مرة بتضيق الحلقة ، وبعدها الناس لا بيبقى معها لا دولار ولا سوري ، ووقتها بينتهي تقييم الليرة على السعر السوقي المعتمد على العرض والطلب ، وبيتحدد السعر على موجودات المركزي ويا بيكون إلها قيمة يابتكون مجرد حبر على ورق .

[ringoo83]

سؤال سريع قبل اغلاق نقاش اليوم

بروكرنا العزيز رامي أعطى تحليل ومنشور بالاقتصادي أنو الدولار نازل عالـ 120 . وكانت النصيحة بالبيع واعادة الشراء عند القاع..بس كأنو اليوم صار شبه استقرارعن أول الاربعينات وبطل ينزل : شو تفسيركون؟
فيني انتظر لبكرة لاعرف الجواب بس حابب شوف تحليلاتكون و "تكهناتكون"

[نورالهدى]

مساء الخير :
يوم طويل مر والسؤال الملح _ الفارض نفسه بقوة على البعض وبقسوة على البعض وكملهاة تستحق المشاهدة بالنسبة للبعض الآخر _ إلى أين ؟
الساعة الآن الحادية عشرة والنصف ومن غير المضمون متى سيتم إغلاق صالة اليوم .
لذلك نستأذنكم بتأجيل وضع مجموعة من المؤشرات إلى صالة الغد كيلا يقطع الموضوع كما حدث سابقأً .
وبكل الأحوال الخوف والاضطراب قد يؤذي ليس فقط المدخر بالذهب والعملات بخسارة أعصابه وبعض مدخراته ،
وإنما قد يطال المضارب المحترف بخسارة قد تطال على الأقل جزءاً من أرباحه المتوقعة وصولاً إلى بعض أصول أمواله .
من المفترض أن السوق قد أغلق إلى الغد
نرجو من الجميع الهدوء _ وخصوصاً المدخرين _ والمراجعة .


نتمنى ليلة هادئة للجميع
أنور

[عابر مجيب]

اقتباس: المشاركة الأصلية كتبت بواسطة محمد19    السلام عليكم رائع خصوصي قانون لافوازيه و فغلا انو استمرارية الليرة من خلال المضاربة يعني انها تستمر على حساب الناس و من اموالهم

شكرا على التصويب أنا خلطت الكوربوزيية بروفيسور العمارة مع لا فوازيية العالم الفيزيائي
هاد من السهر والعمر
شكرا إلك والله يرحم الاثنين ، قدموا للبشرية خلاصة تجاربهم

[جوليت]

الانسة المحترمة هزار وينك ماعاد شفنا مشاركات الك , الوظيفة سرقتك منا ,انشالله تكوني بخير, ياريت ماطولي بألوانك التفاؤلية

[خيرو الشامي]

خبر عاجل بهمكون
السيد ناصر قنديل يقول بان الدولار اول السنة بمائة ليرة وذلك منذ دقائق بالفضائية السورية
وقال هو يقول علم وليس توقع

[ADIB]

اقتباس: المشاركة الأصلية كتبت بواسطة خيرو الشامي    خبر عاجل بهمكون السيد ناصر قنديل يقول بان الدولار اول السنة بمائة ليرة وذلك منذ دقائق بالفضائية السورية وقال هو يقول علم وليس توقع

احسن الو يناظر على اللبنانين

[ADIB]

اغلاق طرطوس 146 مبيع شراء 142