صالة أسعار صرف الدولار وباقي العملات ليوم الاثنين 22-7-2013

[انس الحموي]

اليوم سكرتوا الصالة على بكير قبل حتى ما يدخل 22 لساتنا يا شباب ب21 ...المهم استكمال لاخر مداخلة كتبتها ...هي صورة للاصدار يلي منعرفه وعما نتداوله وشوفوا كيف العلامات موجودة وبالاصدار القديم مو موجودة ...وبالفعل حيرني صراف المتحدة لانو الكمية كلها كان رح يدفعلوا حقها وشرحنا له العلامات البارزة وصار يقنعنا انو بالاصدار القديم مافي هيك علامات ...وقلنا له شركات الادهم وحنيفه والسمان قالوا مزورات ...ابتسم وقال هي على الصرافة مافي ولا قطعه مضروبة وانا مستعد اخدهم كلهم منكم فبالله عليكم مو شي بثير للضحك والاستغراب بنفس الوقت

[S.O.S]

مساء الخير
وافتتاح مبارك اخي مؤيد

[sajed]

ربي يسعد مساك أخ أبو عمر الأول وجميع الأخوة الأعضاء وزواره الأكارم

ونسأل الله أن يجعلنا من أوائل الفائزين دنيا وآخرة

بافتتاحيتك المباركة لابد أن يكون هناك نزول للمغضوب

(هكذا عودّتنا)

[eng-Ahmad82]

مساء الخير والمحبة للجميع
الرجاء سعر تحويل الدولار بالويستريونيون والريال تحويل لو سمحتو

[مجرد إنسان]

اخي رفيق كيبورد دخيلك

[alternative]

مساء الخير
والشكر للاخ مؤيد على الافتتاح

[sajed]

كلمة سابقة:


حسب المثل الصيني:

من يدخل المحكمة يربح قطة ويخسر بقرة

وأنا أقول: من لعب (مع المركزي وشر كاه) ربح القطة بالتأكيد

[عابر مجيب]

مو حلو هيك ، لازم تحطولنا مؤشر يشعل ويطفي بسرعة قبل اقفال الصفحة ، بلا ما كل مرة حس حالي غليظ وألحقكم للصفحة الجديدة
كتبت التالي :

اقتباس: المشاركة الأصلية كتبت بواسطة جوليت    انا لم اكذب بأي شيئ, وانا المركزي لايهمني منه الا ماذا سيفعل لوضع الليرة وانا سبق وقلت لا انفذ اجندة لأحد . لدي قدرة على الحصول على المعلومات وحبيت شارككن فيا ,بحب فيد واستفيد مو اكتر , بتمنى من جميع الاعضاء والمشرفين والمشرف العام ,يلي مصدق هالكلام يحط شكر عامشاركتي وانا بأكد اذا مااخدت رقم شكر مقبول سألتزم الصمت ولن اكتب مشاركة واحدة لاني عند ذلك اقتنع اني لا افيد احد ,وانني فعلا بنظر الاعضاء سجلت بالمنتدى لنشر الاشاعات وانا لن اقبل بذلك الاتهام وسأعرض هذه المشاركة في هذه الصالة وصالة الاثنين لكي يتسنى للجميع روؤيتها والحكم عذرا على الاخطاء الاملائية لاني لاتقن اللغة العربية كثيرا والشكرسلفا للجميع من اعضاء ومشرفين ومشرف عامl

اسمحلي أو اسمحيلي ما عندي مشكلة الانسان يبقى انسان ذكر أو أنثى ، ولكل انسان الحق بممارسة الدور الذي يريحه
بس متل عادتي بحب اخرج عن النص وعدم اتقانك للغة ذكرني بشخص نهفة
كان خبير روسي سافر معي على حلب ليشتري ثريات نحاس بحجة لازم يكشف على مستودعات مواد خطوط التوتر العالي .
طول الطريق بالروحة وبالرجعة نتفنا ريش الحكومات وخصوصا المتلبسة بالاشتراكية والخوف على المواطن ، وصلنا عند نزول التنايا ، قلتلو اللي حكيناه بيجبلنا اعدام فقال :
استاز انا روسي كلو هاد كلام اربي ما بيفهم كلو كلام كاسورة ، يعني بيفهم شوي شوي موكلو كلام بيأرف !
كان من عفاريت سيدنا سليمان تبعات جورجيا بلد المحتالين .
ما علينا ، وبدون اسقاط بس الشيء بالشيء يذكر وحلوة القصة تجي بمناسبة .
بنرجع لحديثتا
واضح من مشاركاتك ( التشكيل اختياري )
نعم واضح ان في توجية ، وهاد ما بيضر إلا الغشيم ، بس كمان الضرر بيتحول لفائدة وخبرة ، وبيتحصن الغشيم لمرات قادمة.
انا شخصيا شايف لغز حلو وظريف ، وما بدي لا فكر بمؤامرة ولا غيرو
بس الشي الوحيد المزعج التكرار والاصرار المتواصل اللي ممكن يثير البعض
انا رايق لأني غير مسؤول ، يمكن لو كنت مشرف كنت بحس احساس تاني
ما بتخلى بعض المشاركات من معلومات أكيدة ، والبعض الآخر فيه منطق سليم قابل للنقاش والتفكير متل ألعاب الألغاز
أنا مع بقاءك .
يلا صار لازم آخد مكافأة وتحكيلنا عن اللي عملو رياض سلامة ، بدون تأخير حتى لحقلو مذكرة دفاع وتبرير

[basem_smk]

يسعد مساكم جميعا .... وانشالله افتتاحية مباركة استاذ مؤيد
مع أملنا أن اليوم يكون فيه كل الخير للبلاد والعباد

[tigereye]

شباب اختلاف وجهات النظر شي صحي و كشعب شرقي منحب نتفرج على اي خلاف بيصير وحتى بالطريق اذا اتنين مختلفين بتلاقي جمهور طويل عريض بيترك شغلوا ليتابع القصة وماتسالوني ليش ؟ هيك ببساطة روح قلبنا نتفرج ونتابع اي خلاف
بس المشكلة الكبيرة انو في متابعين لمنتدانا الرائع المتميز ويتأثرون بشكل مباشر باي تعليق بيجي ولو 5 بالمية على هواه وكتير بيخسروا وبيقعد هو واهلوا يندبوا حظهم
والكل ماحابب يعترف بالواقع متل مانكتب بكتير مشاركات سايقة

على كل الاحوال الاختلاف الملاحظ وهادا مو رأيي بس رأي كتير من أصدقائي المتابعين للموقع انوا الخلاف على طلوع ونزول الدولا هو فقط في الفترة القريبة اما في المستقبل يعني بعد شهر او شهرين اكيد الكل متاكد انو مادام وضع البلد هيك يعني اقتصاد فايت بالحيط اكيد الدولار طلوع والاسعار طلوع مع انو بتمنى يصير ادولار ب 5 ليرة سوري بس هادا واقع مو تمنيات
وهادا الحكي بس للاشخاص المتابعين للدولار بدون خطة دخول او خروج
اما المحترفين والي عارفين شو عم يعملوا خلاص الي من ايدوا الله يزيدوا

وهي ليست دعوة للشراء او البيع بس اذا الوضع رح يستمر بدون حل اكيد اغلب الاشخاص متلي وجر رح يخلص الي موفرينوا ونقعد على باب الجامع اكتر من الي جوا الجامع
وياريت ماحد يقلي انت متشائم انا اكتر المتفائلين بس عم احكي لانوا من الي حواليي والي متابعين المنتدى اتورطوا بالبيع او الشراء من ورا تعليق
طبعا كان جوابي: ماشفت الاتاذ عابر او المشرفين الاختصاصين شو عم يحطوا توصيات
بتعرفوا شو جاوبوني قالوا والله مانتبهت بس قريت تعليق لشخص بالمنتدى مابيتذكر شو اسموا كمان انو الدولار طالع او نازل

وبرجع بقول مشكلة الناس البسطاء الي ابنوا او اخوا عم يقرالوا شو عم ينكتب بالمنتدى عم ينقل تعليق شخص جديد ويتورط هو واولادوا

كمان اقتراح للمشرفين : متل مافي زر شكر لازم يكون في زر تبليغ والشخص الي يصير علي تبليغ كتير يرجع تحت الرقابة

الله يعين المشرفين والناس الغلابة
بالمناسبة حبيت اكتب بهل الطريقة تيمنا باستاذي لقمان وردة المنتدى وياريت يرجع يكتب يومياته كتير عالم ناطرتوا