نقاش حول بلاد للهجرة والسفر ....

[najm]

اقتباس: المشاركة الأصلية كتبت بواسطة salam l    الناحية النفسية كتير بتلعب دور... لانو اذ الواحد عايش ببيئة جيدة رح تخف عليه الغربة..

التعب النفسي رح يلحقك لو صعدتي الى رؤوس الجبال

[Salam L]

اقتباس: المشاركة الأصلية كتبت بواسطة najm    التعب النفسي رح يلحقك لو صعدتي الى رؤوس الجبال

ليش هلق مالي تعبانة نفسيا مثلا؟؟؟ القذائف عم اسمع صوتها تمر فوق بيتي وتروح على مناطق تانية... يعني لو بالغلط هرت شي وحدة بنروح فيها....

تعب عن تعب بيفرق...

[najm]

اقتباس: المشاركة الأصلية كتبت بواسطة Salam L    ليش هلق مالي تعبانة نفسيا مثلا؟؟؟ القذائف عم اسمع صوتها تمر فوق بيتي وتروح على مناطق تانية... يعني لو بالغلط هرت شي وحدة بنروح فيها.... تعب عن تعب بيفرق...

انا شرحو ما لي قاعد بسويسرا والله

[najm]

اقتباس: المشاركة الأصلية كتبت بواسطة salam l    عندي سؤال كتير شاغل بالي.. من ناحية نفسية هالسوري المعتر اذا قدر يسافر.. وين بينبسط اكتر؟؟ بالقاهرة او عمان؟؟ ببدون حسابات المصاري... اي المدينتين اريح؟؟ناس بتلي القاهرة عجقة وشوب وبتقرف.. وناس بتقلي منفتحةوالناس طيبين.. عمان شي بيقولولي راسهن يابس والبلد ناشفة وبتقرف... وناس بالعكس بيقولوا الاردنية اذكياء ومرتبين وقراب مننا...

روحي على العقبة احلى من عمان.

[iass]

اقتباس: المشاركة الأصلية كتبت بواسطة najm    الكل بيحلم بأمريكا بس عندي حارات دمشق العتيقة احلى منها كلها . والله كنت كل كم يوم شوف منام اني راكب بالطيارة وراجع على بلدي . ياسبحان الله كيف في ناس بتقدر تغيب عن بلادها العمر كلو ! بس الجنسية للأولاد منيحة متل ما ذكرلنا الاخ كانو وحتى احسن بكتير من 1/2 مليون $ لايلي بيعرف يستفيد منها .

معلشي ، أنا ساكن بالشام القديمة طول عمري. الشام القديمة صارت كباريه كبير. فحاجة نوستالجيا لشي مانو موجود.
بيقول المتل الواحد بيصلي عالحاضر. هي الشام القديمة يلي عم تحكي عنا تبع السياحة والأراكيل، هي مالها علاقة بالشام القديمة لا من قريب ولا من بعيد. وأساسا الشام القديمة ما عاد فيها سكانها الشوام. إلا بكم حارة مهرهرة وصحابين البيوت بدهن الصرفة لأنو ميراث قديم وهيك شغلات. وإذا أنت شايف الشام القديمة تبع الأراكيل حلوة. بنصحك تروح تعيش فيها شي شهرين. تشم روايح الأكل والزنخة والزبالة والمجارير والصرف الصحي غير التزمير بالسيارات بعد الساعة تلاتة الصبح من سهيرة المطاعم الملتزمة دينيا والفلتانة دينيا على حد سواء.

[Salam L]

اقتباس: المشاركة الأصلية كتبت بواسطة najm    روحي على العقبة احلى من عمان.

مممم... بس بعرف العاصمة اكيد رح يكون فيها فرص عمل او مشاريع صغيرة اكتر من المدن التانية...

شو ميزة العقبة؟؟

والعقبة فيها بحر ونحنا مالنا متعودين على طقس البحر.... احتمال ما نتحمله

[najm]

اقتباس: المشاركة الأصلية كتبت بواسطة salam l    مممم... بس بعرف العاصمة اكيد رح يكون فيها فرص عمل او مشاريع صغيرة اكتر من المدن التانية... شو ميزة العقبة؟؟ والعقبة فيها بحر ونحنا مالنا متعودين على طقس البحر.... احتمال ما نتحمله

هلأ ما بعرف شو ميزتها لأن الأيام اختلفت وكل شي تغير لكن بيزماني كنت ناوي استقر فيها وكانت اسعار البيوت والمحلات حتى المطلة على البحر رخيصة حاليا سمعت كل شي صار عشر اضعاف . والحقيقة حبيت جوها وبحرها . ولا تنسي انها منطقة سياحية وفيها فرص عمل كتير . حضرتك شو اختصاصك ؟

[iass]

اقتباس: المشاركة الأصلية كتبت بواسطة salam l    عندي سؤال كتير شاغل بالي.. من ناحية نفسية هالسوري المعتر اذا قدر يسافر.. وين بينبسط اكتر؟؟ بالقاهرة او عمان؟؟ ببدون حسابات المصاري... اي المدينتين اريح؟؟ناس بتلي القاهرة عجقة وشوب وبتقرف.. وناس بتقلي منفتحةوالناس طيبين.. عمان شي بيقولولي راسهن يابس والبلد ناشفة وبتقرف... وناس بالعكس بيقولوا الاردنية اذكياء ومرتبين وقراب مننا...

رح قلك من خبرتي بالمكانين. بعمان والقاهرة.
بالتنين بينبسط فيهن المواطن السوري يلي رايح ينبسط. مو رايح يحارب سكان المدينة. القاهرة غنية ثقافيا كتير. مدينة عريقة. حاراتها تعبق بالتاريخ. وخاصة المناطق يلي مانها سياحية. القاهرة مشرشة بالتاريخ من إيام الفاطميين. بعدين العثمانيين، بعدين الخديوي اسماعيل. بعدين عبد الناصر. والسادات ، ومبارك. كل هدول بتشوفيهن واضحين بالقاهرة. الناس لطفاء كتير. بس بنفس الوقت الفقر كبير. السرقة كبيرة. البقشيش ضروري بكل مكان. ما ممكن يشعر الواحد أنو هو ابن البلد قد ما ضل موجود. بيحبها كتير يلي استفاد من الفساد بسورية، ومتعود أنو يكون أحسن من غيرو لأنو بيدفع مصاري. بيحب الفشخرة. بيشتري الناس بمصاريه.

عمان. مدينة حديثة بكل المقاييس، شوارع جميلة ونظيفة. مدينة هادئة. أبنية جميلة جدا. مافي كتير أماكن للسهر والمشاوير. بس مدينة تشبه المدن الأوربية الصغيرة. الناس ما كتير بيتدخلو ببعض.( باستثناء شوفيرية التكاسي دمهن تقيل شوي). إذا ما ضايقتي حدا ما بيضايقك حدا. بيرتاح فيها يلي بيحب النظام وبيحب الرتابة. كتير صعب ترشي حدا بعمان. المطاعم أكلها أطيب من مطاعم مصر. وما عندهن كتير مجاملات بالتعامل.

[najm]

اقتباس: المشاركة الأصلية كتبت بواسطة iass    معلشي ، أنا ساكن بالشام القديمة طول عمري. الشام القديمة صارت كباريه كبير. فحاجة نوستالجيا لشي مانو موجود. بيقول المتل الواحد بيصلي عالحاضر. هي الشام القديمة يلي عم تحكي عنا تبع السياحة والأراكيل، هي مالها علاقة بالشام القديمة لا من قريب ولا من بعيد. وأساسا الشام القديمة ما عاد فيها سكانها الشوام. إلا بكم حارة مهرهرة وصحابين البيوت بدهن الصرفة لأنو ميراث قديم وهيك شغلات. وإذا أنت شايف الشام القديمة تبع الأراكيل حلوة. بنصحك تروح تعيش فيها شي شهرين. تشم روايح الأكل والزنخة والزبالة والمجارير والصرف الصحي غير التزمير بالسيارات بعد الساعة تلاتة الصبح من سهيرة المطاعم الملتزمة دينيا والفلتانة دينيا على حد سواء.

يا أخي مو شرط الواحد تكون بلدو جنة ليحبها مع العلم حتى السياح بحنولها برغم العيوب يللي ذكرتها . بس ما فهمت شو معناها هي الكلمة اول مرة بسمعها نوستالجيا ليكون مسبة هاه

[Salam L]

بيقصد ب نوستالجيا الحنين للوطن...