سعر صرف الدولار والذهب مقابل الليرة السورية ليومي الخميس و الجمعه 19& 20 -06- 2014

[hasobman]

وهي طلع الرئيس الاسود وقال انو ما في ضربة للعراق
ممكن عم يموه وممكن لا
بس قرر ارسال 250 جندي مع انو ما بعرف شو ممكن يسوي هالعدد
حماية لسفرة الغدا ما بيكفو بس معقول هي الرقم المصرح عنو والبناديق ارسلو اضعاف هالرقم من المرتزقة كالعادة
ما علينا المهم امريكا بلشت تغطس بالمستنقع العراقي شوي شوي
ايران بلشت ترسل وتسحب من دول اخرى وتبعثون عالعراق
الاتراك ماكلينها اذا بدهو يعلقو بيرجع ملف الاكراد بيفتح من جديد
وعندك الشحاد الاردني عم يشكي كالعادة من المصاريف الزائدة لاستقبال السوريين
وفي سوريا الوضع احيانا بتحس بانو خلصت ورجعت المي لمجاريها
وبس بدك تعمل شي شغلة بتنفجر سيارة جنبك بتروح كلشي حواليك الا انت بتضل عايش بس لتقول وين خلصت نحنا خلصنا وهي ما رح تخلص
بيكون الواحد مدخر شوية فلوس وهو قاعد لا شغلة ولا عملة بيحسب بالالة الحاسبة
بيطلع متبهدل واذا ضل الوضع هيك سنة كمان بيروح فيها فراطة
مو بيصير يصرف دولار ليعيش لا بيصير يصرف تيابو والله يستر ما يبيع كليتو وقلبو وعيونو ليعيش باقي عيلتو
بتجي بتفكر انو طالما لسه معي شوية مصاري خليني الحق حالي وافتحلي شي شغلة خفيفة نظيفة
بتجيك حالة خوف وبتقول شو افتح بهالاوضاع الي بتهوي لا خليني نايم ومنيمون معي احسن تا الله يفرجها
وهيك على هالحالة من 3 سنين
ولا لسه جايك رمضان مع انو صايم الا انك بتصرف دبلين المعتاد
احسن شي ياجلو رمضان للشتوية بيكون النهار قصير وبرود الجو وبلكي بتكون اسعار المواد ارخص
مع انو اسعار الخضار نازلة بس اسعار المواد التموينية مرتفعة
ما في مهرب الي بتوفرو من هون بتحطو لهون الي بتوفرو بالبطاطا بتحطو للرز
الله يفرجها علينا يا رب امين

[عابر مجيب]

تفجير انتحاري في ظهر البيدر
طلع مو انتحاري الرجل نزل من السيارة وبعدين فجرها
السيارة ما بقي منها غير المحرك فقط
القطع تناثرت بعيدا جدا ، انفعال المراسل خلاني شك انو ممكن اطلع لاقي شي شقفة بالشارع عندي
بعد شوي طلع معلومات جديدة : السيارة بقي منها محرك وهوية الانتحاري
المراسل والأدلة الجنائية وقوى الأمن أكدوا ان الهوية للارهابي
انا ما قبضتا
بعد شوي اتصل صاحب الهوية وقال هو من القرية المدعوة عين
طلعت الهوية مو للفاعل ، قال حاططها للتضليل ، بهنيهم على هالذكاء
كان في قماشة حمراء بالأرض ، قال لتغطية دماء المصابين ، لما رفعوها طلع تحتها حديدة سوداء، قال هاي أشلاء الفاعل !
كان المقصود اغتيال المدعو عين ألف
مرة قالو هو كان سابق ومرة طلع الجاني هو السابق
بعدين كان السيناريو الأكثر أكابرية :
المدعو عين ألف اشتبه بذكاءه بالسيارة طلع سبقها وأعلم الحاجز وراح
ما ظبطت
والحل ؟
سيارة من الموكب سبقت السيارة المشبوهة وكملت طريقها متخلية عن الموكب بعد ان اعطت معلومات للحاجز
وصلت السيارة وانفجرت
بعد شوي وصل عين ألف
بنظرة ثاقبة على مسرح الانفجار الارهابي الانتحاري ، تم الربط مع بقية الشلة اللي بالفندق ببيروت ، وبالفندق المقابل ، هو مو مقابل كتير ، لأ ، بعد شارعين .
بقي ان السيارة الرمادية أو الفضية كانت رباعية الدفع من نوع نون ميم .
والله سخفوا الحدث وملينا ، ونسينا نزعل على الضحايا .

[M-PMP]

السلام عليكم
جمعة مباركة وفيض محبة بإذن الله

إغلاق اللاذقية
شراء 166.5 - 167
مبيع 167.5 - 168

[OMAR1233]

السلام عليكم
جمعة مباركة للجميع

[black_ghost87]

جمعة مباركة للجميع. أكرمنا الله ب 60 نقطة في نهايتها في السوق العالمي و الحمد لله. و الشكر الكبير لأستاذنا رامي العطار على توصياته.

[black_ghost87]

بانياس-البحر-السوق
شراء:166
مبيع:168

[عابر مجيب]

لمن لا يبحبش باستمرار بالمنتدى
تم افتتاح صفحة الصالون بعد انقطاع الأسبوع الماضي
الضيافة ظريفة من اعداد أخونا مؤيد ( ابو عمر ) ملك منطقة المزة وما حولها .
http://syria-stocks.in/forum/showthread.php?t=17059
لحقو حالكم قبل انقطاع الكهرباء

[عابر مجيب]

نزلت مشاركة بصفحة الصالون ، وبعدين لقيتها إلها علاقة بالاقتصاد
فقلت بحطها هون لتعم الفائدة ، بكل حال اليوم جمعة سماح .

كانوا يقولو حظ عطيني وبالبحر رميني
شوف العالم اللي على نياتهم
يعني لما بيغرق مركب وما بيطلع منه مخبر ، بيكونوا كلهم عديمي الحظ ؟

المثل من أصلو غلط ، المفروض يكون :
مصاري كتير عطيني ووين ما بدك رميني ، وانت ماعليك لا تكتر غلبة .

اللي معو مصاري كتير ، كيف ما بيرميها بتفلح ، وبيضل منافس بكل مجال
بيضرب على عماها ، إلا ما تصيب ، واللي مابتصيب بتتأخر شوي ، بس بترجع تزبط .

يعني اجهل وأغبى وأقل الناس حظ ، بتتعدل أمورهم بالمصاري ، وبعد شوي بيتعلمو .

وقد قال مدري مين اللي قال :

من كان يملك درهمين تعلمت = شفتاه أنواع الكلام فقالا
وتقدم الفصحاء فاستمعوا له = ورأيته بين الورى مختالا
لولا دراهمه التي في كيسه = لرأيته شر البرية حالا
إن الغني إذا تكلم كاذباً = قالوا : صدقت وما نطقت محالا
وإذا الفقير أصاب قالوا : لم يصب = وكذبت ياهذا وقلت ضلالا
إن الدراهم في المواطن كلها = تكسو الرجال مهابة وجلالا
فهي اللسان لمن أراد فصاحة = وهي السلاح لمن أراد قتالا

هالغوغل كأنه قاعد بقلبي ، بس بذكرو بأول كلمتين وهو بيكمل الله يوفقو .

التعديل لذكر القائل : مو طلع الامام الشافعي وأنا نسيان .

[عابر مجيب]

هلأ لقيت البقية

يمشي الفقير و كل شيء ضـده
والناس تغلـق دونـه أبوابهـا
وتراه ممقوتا و ليـس بمذنـب
يرى العداوة لا يـرى أسبابهـا
حتى الكـلاب إذا رأت ذا غنيـة
أصغت إليه و حركـت أذنابهـا
وإذا رأت يوما فقيـرا ماشيـا
نبحت عليه و كشـرت أنيايهـا

[مجد]

صباح الخير