سعر صرف الدولار والذهب مقابل الليرة السورية ليوم السبت 12-04- 2014

[عابر مجيب]

دخلت بمجال الأعمال الحرة والتجارية ، ولكن لم يكن لدي أي خلفية تجارية ، والدي كانت فرصه بالعمل الوظيفي في وقت كان فيه ندرة لاختصاصه ، ثم اتيحت له فرصة اغتراب مجزية ، كان مكتفيا ، لا فكر بالاتجار ولا اشترى يوما بسعر موفق ، كنت اعاتبه ، فيقول : كم مرة سأشتري هذا الشيء ؟ فليكن أغلى قليلا ، مافي كميات تستحق المفاصلة .
أخوالي كانوا تجارا ، ولكن كنت أجد فيهم شخصيات لا تدعو لا للثقة ولا للإحترام ، مقارنة بالجيل السابق الذي لم تتح لي فرصة معاصرتهم ، فلم احاول التعلم منهم ، بل وما كانوا سيخلصون النصيحة .
حاولت التعلم وحيدا ، وفي خضم تعاملي ، التقيت بمنوعات من تجار الأسواق وفي مجالات كثيرة ، كنت عرضة للاستغلال ، ولكن حذري وابتعادي عن الطمع والغوغائية ، جنبني الكثير من المخاطر .
لطالما أعجبني من كان يخدعني أو يحاول في البداية واكتشفه ، قبل أن أغوص معه في صفقات قاتلة .
علمت مع الوقت ان أهم خطوة في التجارة هي حسن التسوق ، فعند الحد الأدنى للسعر لن يكون هنالك قاع أسوأ للبيع .
كل ما كان يشغل بالي هو فوات الربح ، فمن حقي معرفة السعر الحقيقي لبضاعتي ، وقد تعلمت من السوق ان التجارة نبع والصناعة جمع . كما ان التجارة تجرة ، اي تأتيك صفقة واحدة يوما ما ترفعك للأعلى ، يكتر فيها دخلك ، فتحيد رأسمالك ، وتلعب مرتاحا بالأرباح فقط .
قدامى التجار يقولون : عندما تدور الخميرة ، يمكنك ان تصرف من الفائض بقدر ما تشاء .
سألت تاجرا مرة كيف يمكن معرفة الأسعار لأتماشى مع السوق ؟ هل اجوب السوق يوميا لمعرفة الأسعار ، ضحك وقال : انا أجلس هنا على الكرسي خلف مكتبي وتصلني الأسعار .
قلت كيف ؟ قال من الزبائن !
قلت وإذا كذبوا ؟ قال حسن قراءة كلام الزبون يعطيك مؤشر عن السوق .
بنرجع بعد هالديباجة لزبدة اللي بدي قولو
انا لا بتعامل بالعملات ولا عمري حبيت المضاربة ، حتى ولو لم يكن فيها مساءلة قانونية ، بزماناتي حولت من دولار لاسترليني وضليت انتظر حوالي عشر سنوات لرجعت رأسمالي وربحت ، متوسط الشراء يومها كان 184.25 وبعت فوق 200 وتحرم إذا عدتها .
فأنا حاليا أراقب وأستنتج بدون خوف أو استعجال ، واحلل بذهن صافي .
طبعا التحليل الفني لا يصح هنا طالما أن السعر يتحرك قسرا بفعل فاعل ، يعني شو بيفيد التشارت أذا حدى محاه بالمحاية ولوى رقبة الترند ؟ أو نفخ على الشموع اليابانية وطفاها ؟
ما بقي غير التحليل الأساسي ، ممكن نستشف بعض الأخبار ، على الرغم من الغموض المقصود ، ولكن لا وجود للجريمة الكاملة ، والمجرم يحوم حول جريمته ويفتضح لعبته ، من خلال كترة الغلبة والمبالغات بينكشف ، مو شرط يكون المروجين لفكرة يكونوا عارفين الحقيقة ، ولكن تهويلهم وتوسيع الكذبة والنسبة لجهات عليا ، ما تدخلت وقت وصل الدولار للـ 325 ، كل هذا ، أعطاني معلومة أكيدة ، أن المشكلة عويصة . حطيت توقعاتي على أساس هالغشمنة بالطرح والتخويف .
عرفت اللي عم يصير وأنا قاعد على الكرسي وما غيرت مكاني ، على قولة التاجر اللي سألتو مرة عن أخبار السوق . الله يرحمه .
معذرة للإطالة ، بس لا تقولولي ما تسليتوا، مو هيك بالله

[المسار]

الله يرحم والديك يا استاذ عابر

هاي حكم و مواعظ مو تسليه

كتر منن

على فكرة ما اقتبست لحتى ما تحز بنفسك وتتحسر
على ايام الاقتباس

[القلب الأبيض]

السلام عليكم
بالنسبة لتخبط الأسعار - محسوبكن ليوم أكلها بالطلعة وبالنزلة وهاد مؤشر جيد
بما أني اليوم خسران حوالي ألفين دولار معناها بلشت أتعلم قواعد اللعبة
أدعولي

[hasobman]

بكرة بداية الاسبوع وسعر المركزي بكرة طالع كم قرش
السودة بكرة محتارة
بين ال70 ولا تفوت عال 80
بمجرد وصولنا فوق ال 180 واغلاق الاحد فوقها يبدا الاثنين 185 دغري
185 رقم حلو ووقفنا عندو فترة طويلة من فترة
لذلك ارجح الوصول لل 185 والثبات عندها فترة
لكن في شي بهالطلعة مو عاجبني في شي حاسسني قلبي انو رح يصير
ولكن اكبر خطيئة وخطيئة لا تغتفر اذا المركزي ترك السعر يطلع بعدين بينزلو
يا طالعو شوي شوي يا اكبسلو فرام الايد من بكرا

[hasobman]

على ذكر السوق والتسوق
اشتريت اليوم شوية فريز لنعملو مربى
محل ب 165
محل 175
محل200
محل 250
وكلو نفس الفريز وبدون اي فارق لا بالحجم ولا بالجودة

[hasobman]

من قرائتي للمشاركات
سؤال اسالو للخبراء
لماذا الصبح في حركة مثلا والعصر لا والمغرب اي والعشا توازن واخر الليل ما بعرف
بمعنى اخر لماذا السعر بينزل وبيطلع كذا مرة باليوم الواحد وخلال ساعات معدودة
(طبعا انا عم احكي على منطقة محددة وليست الفوارق بالمناطق المختلفة)

[عابر مجيب]

اتحضروا لرفعة الذهب
التسونامي على الطريق
زلزال 8.2 بمقياس ريختر ضرب جزر سليمان جنوب المحيط الهندي
قولكم باخرة التوابل بتغرق وباخد ضعف قيمتها من التأمين ؟ ههههههههههه

[drmousali]

بعتقد ما في سوق ما الو معادلة
حتى الفوضى الها معادلة...بس بدك تفهم يلي ماسك الخيوط و عم يحركها لفوق و لتحت شو بدو؟
بعتقد الكل بيعرف هالحكي... بس احيانا بننسى و بنسوق مع السوق

[hasobman]

قولكم باخرة التوابل بتغرق وباخد ضعف قيمتها من التأمين ؟ ههههههههههه

من حظنا وحظك اذا غرقت
انت بتاخد ضعف التامين
ونحنا منشتري السمك متبل جاهز ومنوفر حق البهارات

[المسار]

اقتباس: المشاركة الأصلية كتبت بواسطة hasobman    قولكم باخرة التوابل بتغرق وباخد ضعف قيمتها من التأمين ؟ ههههههههههه من حظنا وحظك اذا غرقت انت بتاخد ضعف التامين ونحنا منشتري السمك متبل جاهز ومنوفر حق البهارات

مصائب قوم عند قوم فوائد

متل ما بيقول المتل كمان

انت واخوك على ابن عمك وانت وابن عمك عالغريب


منتضامن معكن ومندعيلكن بغرق الباخره

هههههههه