لن نتطور بالصناعة إلا اذا تحسنت الجودة

[abu mhd]

في البداية الموضوع عبارة عن تفكير شخصي بصوت عالي
كلنا يسعى و يفرح عندما نرى شركة محلية أصبحت عالمية أو نالت جائزة عالمية للجودة ولكن لماذا ليس الكل ؟؟؟ السر بالجودة و إتقان الصنعة سأطرح أمثلة للتقريب

كنت دائما أتسائل عندما أدخل لمطعم ما لماذا أرى نوع المحارم على الطاولة \ سانيتا \ ماركة لبنانية و أكياس القمامة \ أبو ربطة \ كمان سانيتا
لماذا لا أرى نوع آخر وطني مع أننا نملك الكثير من معامل التصنيع وظلت تراودني الفكرة حتى اشتريت أول الشهر من ضمن قائمة الطلبات المنزلية أكياس قمامة وهنا ظهرت أمامي فجأة المعاني الوطنية و القومية السامية لدعم المنتج الوطني و أبيت إلا ان أشتري أكياس منزلية كمان أبو ربطة و سألت البائع فقال لي لا بأس بس ما يكون بيتك عالي فقلت له ليش قلي هدول بيوصلوك عالطابق الثاني بس ؟؟ فاشتريتهم ضاحكا
المهم أنا أسكن بالطابق الثالث والله يا جماعة لم يكمل الكيس الطريق لنهاية الدرج وعند الطابق الأول طارت الربطة ووقع الكيس و حالة بهدلة ؟؟
فنظرت بين الضحك و البكاء وأنا أقول لماذا عندما أحمل ما أحمل بأكياس نوع آخر تصل معي بسلام شو الفرق بالكلفة ربع ليرة أم أقل لتقوية جوانب الكيس ؟؟


- عندما كنت سابقا أذهب للبنان كنت غالبا ما أتوقف عند مخبز شمسين أو تفاحة و آكل فطائر متنوعة وشهية بل و أحضر معي بعضها اضافة للخبز اللبناني
وعندما افتتح المخبز هنا فرحت و قلت أخيرا عاد صاحب المعمل ليفتتح منشأة ببلده طبعا هو سوري بالأصل ولكن ومنذ مدة بدأ الانتاج بالتراجع و السعر بالارتفاع و بالأمس كان لدينا ضيوف فأحضرنا منه بعض المعجنات لا أقول لكم سوى أنه سود وجهنا شي محروق و الجبنة بس رشة خفيفة و القشقوان كأنه دولاب سيارة .........

اشتريت منذ سنة 1996 غسالة انتاج شركة وطنية خاصة وكانت ممتازة و كما يقولون أدت الفرض و السنة و لما أحببت أن أبدلها نظرا لدخولها سن التقاعد أشتريت من نفس المعمل ولكن الفرق أن الأب صاحب المعمل توفي و استلم الأولاد الإدارة ومنذ 7 أشهر إلى الآن صرت مبدل الغسالة 3 مرات لسوء التصنيع ؟؟؟؟
مات و أخد سر الصنعة معه مثلا
ولكني علمت لاحقا أن الابن لما استلم صرف العمال ذوي الخبرة وأتى بعمال جدد أرخص أجرا ورفع الأسعار على اعتبار الشغلة ما بدها معلمية إي طلع بدها ما هيك ؟

بالمقابل لماذا نرى معمل للشكولا \ غراوي \ أخذ أوسمة و جوائز جودة عالمية

معناها نحن قادرون على التمييز بس ما بدنا الصناعي لدينا بس بده يصنع أرخص شي ليش مين خبرك انوا الكل بده الأرخص صنع نوع أول و نوع ثاني مثلا واترك حرية الاختيار للزبون
البعض سيقول لي البلد وكله هيك ماشي و الحكومة ما عم تدقق ليش شو دخل الحكومة هل أتاك احد بالصناعة و قال اجباري صنع أرخص شي و أسوأ شي ليس الحكومة بل ضميرك أيها الصناعي الفاسد

لا أعلم إن كان كلامي سيصل أو إن كان مهما أو لماذا كتبت ولكن عجبي أن طموحنا أكبر من عملنا وهو ليس عيبا بشرط أن نعمل لتطوير الانتاج وليس تطوير الجيبة وبس
و آااااااااااااااااااااااااااااااااه يا بلد

[Adnan89]

التجار و الصناعيين بس تحكي ادامن جودة بيفكرو جودة اللي كان بضيعة ضايعة
الغرض بتشتريه و بتطلع من المحل و بترجع دغري ما بيعترف فيه ( طبعا مو الكل )
ناس بدها تشتري سيارة من أول سنة شغل و تاني سنة بيت و زواجة
علما أنو الفرق بين السيئ و الممتاز لا يذكر مقارنة بالفرق بالجودة

[BROKER]

كلام جواهر


حتى الاتقان بالعمل هو سر من اسرار الربح واستمرار البيع


تعودنا عالغش واذا ما لقينا مين يغشنا منغش حالنا


مدرستين في الصناعة اولهما "الاتقان" مع طلب السعر المناسب
والثانية "الرخص" وهنا تكون البضاعة سيئة او وافية بالغرض ولكنها رخيصة جداً كالبضاعة الصينية المنتشرة.


لكن للاسف الصناعة السورية احتوت على المدرستين ( غلاء وسوء بالعمل ) ..


واللي تميز منها قليل وفعلا وصل وانتشر متل ما ذكرت ( غرواي ) وفي معامل تصنع المواد الخام غير معروفة وسبب شهرتها اتقانها

[arnouri]

للصناعي يحق له أو التاجر أن ينتج ما يريد
ولكن لايحق للدولة ان تحمي انتاجه بأي قرار
متل المنع أو او او

ودع قانون المنافسة في السوق أن يأخذ حقه الطبيعي .ومن هنا تبدا المنافسة
مثال بسيط بائع العصير ابو العبد الذي في الصالحية وازدحام الذي عندي حتى بعد منتصف الليل
وجيرانه من البائعين تقريبا لديهم من الزبائن من مل الوقوف وانتظار عند ابو العبد

[Tareq]

شركة أدامكو تنتج أدوية صناعة سورية من فئة الادوية الاساسية كالضغط والقلب و السكري وغيرها. أخذت ترخيص من شركة باير من اجل تصنيع دواء الاسبيرين في سوريا. تقوم شركة باير بزيارات مفاجئة وغير مخططة إلى المعمل في سوريا لاخذ عينات عشوائية وذهلوا لدقة المعايير المنتج بها الدواء وصنفوا سوريا من افضل الدول التي منح لها ترخيص. و في عدة مرات طلبوا من ادارة الشركة بسوريا مدهم بكميات من الدواء لمساعدتهم في تلبية الطلب في بعض بلدان أوروبا واسيا.


عدا عن الالبسة التي تصنع في سوريا وتباع في الخارج على انها صناعة اوروبية.
ما ينقصنا هو وجود الضمير لدى بعض الصناعيين وعندها لن نحتاج للتفاخر بالبضائع المستوردة.

المال موجود والعقل موجود والكفاءة موجودة ولا ينقصنا الا بناء السمعة الطيبة عن طريق الاتقان بالصناعة.

[economic opinion]

فعلاً يا جماعة يعني يا مؤيد إنت حطيت إيدك عالوجع
مثال تاني عنا كمان على هاد الحكي هو شركة كتاكيت يلي كلنا منعرفها
مرة كنت بالأردن وكنا أنا وبنت خالتي بالجامعة فجعنا فقالتلي تعالي في بسكوتة كتييير طيبة هلأ مناخد منها وإذ منوقف عالكشك وبيطلع قصدها على بسكوتة من انتاج كتاكيت اسمها "طيبة" على ما أعتقد
فقلتلها هي البسكوتة سورية، فقالتلي صح وبسكوتات هي الشركة هي أكتر بسكوت ماشي بعمان
وفعلاً تطلعت على ستاند البسكوت وعنجد معظم البسكوتات يلي كانو عليه من كتاكيت وبعدين صرت لاحظ بأي سوبر ماركت بفوتو إنو في بسكوت كتير من صناعة كتاكيت كأنك فايت على سوبر ماركت بالشام
يعني شوفوا قديش هالشركة السورية لأنو حافظت على جودة منتجاتها لوين وصلت
ويا ريت كل الصناعين السوريين يحافظو على جودة عالية بمنتاجتون وأنا عنجد مستعدة ادفع سعر أي غرض مصنع بسورية بجودة عالية أد ما بدفع عليه مصنع خارج خارج سورية، عالأقل بعرف إنو مصنع ببلدي ومن أدوات ومواد محليه ومعيّش عيل سورية بالشغل فيه بدءً من الزراعة وإنتهاءً بعمال المصانع.