تعلم التحليل الاساسي .. خطوة خطوة ..!

[ahmad-Fx]

حابب بلش انا وياكن بهالموضوع اللي يعتبر من احلى مواضيع سوق الفوركس والاقتصاد العالمي

اخترت هالموضوع ليكون اول موضوع الي بهالمنتدى العظيم بعد المتابعة بصمت لفترة طويلة

لأني بشوف أنه من احلى المواضيع اللي ممكن يتعمق فيها المضارب بسوق الفوركس

وكمان التحليل الاساسي يعتبر من المواضيع الشيقة والممتعة اللي بتهم كتير ناس سواء كانو مضاربين او متابعين ليس أكثر ..

رح حاول بهالموضوع انو تنتاول كل يوم معلومة بسيطة وخفيفة بحيث ان المتابع يفهمها ويتعمق فيها بشكل اكبر اذا حب وبنفس الوقت ما يكون الموضوع تقيل ومعلوماتو ما بتنهضم ..

رح نحكي عن شو يعني تحليل اسأسي ؟ ومن وين بتطلع هالأخبار .. ومين بيطالعها .. وعلى أي اساس ؟ رح نحكي عن فائدة هالأخبار ومدى تأثيرها على السوق

انشالله يكون موضوع ممتع وشيق وما تملو مني

[غالب]

سيد احمد موضوع شيق ومهم للكثيرين نتمنى ان تستمر به بهمة وشايفك حابب التحليل كثير ونحن كمان رح نحبو كثير على الاقل لانك حابو وعبتشرح بقلب كبير ومفتوح لذلك نحن بانتظارك وبانتظار كل جديد منك وسنكون لك دوما من الشاكرين .

[ahmad-Fx]

اقتباس: المشاركة الأصلية كتبت بواسطة غالب    سيد احمد موضوع شيق ومهم للكثيرين نتمنى ان تستمر به بهمة وشايفك حابب التحليل كثير ونحن كمان رح نحبو كثير على الاقل لانك حابو وعبتشرح بقلب كبير ومفتوح لذلك نحن بانتظارك وبانتظار كل جديد منك وسنكون لك دوما من الشاكرين .

شكرا سيد غالب وانشالله نكون قد الثقة تحياتي

[ahmad-Fx]

رح نبدأ اول شي بتعريف بسيط للتحليل الأساسي ..

كلمة تحليل اساسي جاية او مشتقة من اساسيات ..اساسيات شو ؟؟ اساسيات السوق او بمعنى اخر

الاسباب اللي عم تخلي هالسوق طالع نازل والكل محتار معو

هالأساسيات هية عبارة عن عدة عوامل :

احيانا بتكون سياسية "حرب او سلم " .. اقتصادية "الها كتيييير تشعبات" ... واحيانا كمان بتكون اجتماعية ..يللي بتخلي العرض والطلب والسعر يتحركو إما للأعلى وإما للأسفل

هلأ بالنسبة لسوق العملات الاجنبية .. بيعتمد التحليل اساسي على دراسة اقتصاد الدولة والعوامل الاجتماعية والسياسية بهالدولة لأن من خلال هالعوامل رح نعرف مدى قوة اقتصاد الدولة اللي رح يأثر بشكل كتير كبير على عملتها مقابل عملات الدولة الأخرى

على سبيل المثال .. نحن مندرس ومنحلل الاقتصاد الامريكي واخبارها السياسية "لان ماشالله هالدولة كل كم يوم بتعمل حرب :D وكمان العوامل الاجتماعية بأميركا .. ومن خلال هالدراسة رح نعرف الدولار الامريكي شو وضعو .. ياترى رح يكون قوي مقابل سلة العملات الاخرى .. ولا ضعيف .. وبالتالي .. رح ينزل السعر على الشارت ..ولا رح يطلع .!!

يعني باختصار .. اذا زادت قوة اقتصاد الدولة زادت قوة العملة تبعها بشكل عام

هلأ اكيد نحن مارح نقعد ليل نهار قدام شاشة التلفزيون او المواقع الاخبارية لحتى نعرف شو في اخبار ..او كلما طلع خبر اقتصادي ولا سياسي .. لأن في اخبار تعتبر قوية ومحركة قوية جدا للسوق ..وفي اخبار غير هامة ابدا ولا تؤثر على السوق .. وكمان بنفس الوقت .. هالاخبار ما بتطلع بشكل اعتباطي "يعني البنك المركزي الياباني مارح يطلع بقرار مفاجئ بدون ماحدا يعرف وبالسر .. اكيد لا .. رح يكون في موعد لاصدار الخبر ..او موعد لاطلاع الرأي العام العالمي على محضر اجتماع هالبنك ..وبالتالي رح يكون كل الناس مستنية هالوقت ورح تشوف الخبر ورح تدخل بالسوق سواء بيع او شراء حسب ما فهمت من الخبر وقدرت تستخلص اتجاه العملة للوقت اللاحق متل ما صار مبارح تماما لما كان في خبر صادر عن البنك الفدرالي الامريكي عن توقعاتو للتضخم والبطالة والنمو ..وفورا بعد صدور الخبر اتأثر الدولار واتكركب قدام باقي العملات وشفناه تراجع قدام اليورو والين الياباني وباقي العملات بشكل واضح وصريح

خلينا نعطي مثال صغير على واقع عايشينو حاليا بالنسبة لبلدنا "سوريا"

اعلان البنك المركزي عن جلسة تدخل يوم فلاني الساعة الفلانية .. لبيع القطع الاجنبي "وحاليا في هيك شي متل ما سمعت :D " ... هون بتلاقي كل المضاربين على الدولار/ليرة بلشو ياخدو احتياطاتهن .. وناس بتمتنع عن البيع وناس بتمتنع عن الشراء او بالعكس ناس بتشتري وناس بتبيع ..وكل واحد حسب توقعه لشو ممكن يصير بجلسة التدخل ..بس لاحظ .. ان جلسة التدخل ما صارت فجأة .! او يا غافل الك الله مانسمع الا المركزي عمل تدخل .!!

ومتل ما حكينا ..رح نحاول نركز على اهم العوامل الاقتصادية يللي رح تفيدنا بمعرفة حركة السوق

قبل ما اختم اليوم .. رح ركز على كلمة كتير منسمعها بالتحليل الاساسي ..وهي "المؤشرات الاقتصادية"

وهي المؤشرات معناها بعض البيانات او الاحصائيات يللي بتصدر بشكل متكرر "اسبوع شهر سنة ربعي " وبتصدر عن عدة جهات احيانا بتكون حكومية واحيانا بتكون خاصة

وهالمؤشرات هي هية يللي بتشكل شي كلياتنا منعرفو وهو "الاجندة الاقتصادية" يللي منشوفها باغلب الصحف والمواقع والاخبار التفزيونية بشكل يومي ومتكرر

انشالله ما كون كترت عليكن اليوم وقدرت وصل معلومة بشكل حلو وبسيط وبتشكر متابعتكن وبتقبل ملاحظاتكن بصدر رحب

[ahmad z]

شكرا للجهد أخ أحمد

بانتظار المزيد