iass

أبو طارق، وقت بتتوظف بتكون صغير بالعمر، راتبك بيقديك مواصلات وروحات وجيات عالخفيف، لهيك بتلاقي الموظف الجديد كتير متحمس عالشغل ومفكر أنو رح يغير الدنية، بس يمرقو عليه ست سنين وما زاد راتبو غير 2000 ليرة على 3 ترفيعات، رح يشوف أنو ما رح يقدر يتجوز أو يعيش حياتو، وإذا مرض حدا من عيلتو عم تكلف الطبابة كزا، إذا بدو يشتري بيت أو سيارة أو حتى ستأجر بيت فهاد من سابع المستحلات، وطبعا عم يشوف الحياة كيف عم تغلا، بعطيك مثال بسيط، أنا عم أدفع راتبي الشهري أجار بيت قد بيت العصفورة.
المهم ما لنا بطول السيرة، الله يرحمو د. عصام الزعيم انسأل مرة هالسؤال بمحاضرة على مدرج الجامعة، وحكى وقال أنو ال500 ليرة وال50 ليرة يلي بياخدها الموظف لتمشاية معاملة أو غض النظر عن مخالفة مرور هي ما أسمها رشوة، اسمها تعويض نقص الدخل المتدني، بينما الفساد هو يلي عم يصير على مستويات اعلى، متل المناقصات والتهرب الضريبي والعقود الوهمية، يلي من خلالها عم يتسرب مليارات، مو فتافيت. طبعا منتذكر انو المرحوم حاول أنو يدفع باتجاه إصلاح الاجور. و هاد الطرح لا زال قائما، بس أكيد مو معروف أيمت رح بيصير.