مراسم دفن موتى في حمص .....

في أيامنا الأخيرة في مدينة حمص .........
وئت الجامع ينادي على اسم متوفي ....
ما عاد نهتم كتير للعدد ..لأنو كل يوم كذا مرة يصير في نعوة لمتوفيين شباب
بس الغريب هالمرة
نادى على اسم الحاج فلان الفلان ...أبو فلان ...........
و الفاتحة على روحوا ...
و أنا من فرحتي نطيت ...مع اني الشخص المتوفي هو أبو أحد معارفي
و الت لحالي الله أكبر.....بس بعدين وطيت صوتي ....
ما بعرف ليش آخدة هي الكلمة على لسانا ....
لك حتى صارت تستخدم بالتلطيش .....
المهم : الت الله أكبر
و أخيرا ....صار في نعوة لشخص كبير بالعمر .............
صارت تنزل دموعي من الفرح ......و أم حكيم صارت تؤول بسرها :
عليه العوض و منو العوض ...أبو حكيم أكيد فصل و صار خارج التغطية ......
بس و الله طول لفصل ......ما شاء الله عنو ....اتحمل تلت سنين
إلتلا يا ام حكيم و كأني عرفان شو عمتحكي :
وئت كنا صغار كل كذا شهر لشهر لنسمع انو في ميت و هاد الميت
بالعادة بيكون كبير بالعمر
و غالبا حسب الموضة بحمص بيكون حجي كمانة ....
و كنا نخبر بعضنا : سمعتو في بالشارع الفلاني ميت
و نروح لهنيك نشوف التابوت بس
و نرجع على البيت و كل ليلتنا نئضيها كوابيس ...
و ننظر لأولاد الميت كأنون أبطال ..على شو ما بعرف ....

أما هللئ با أم حكيم الموت حولنا و حوالينا
مشتهي من سنتين اسمع نعوة لشخص كبير بالعمر
كل يلي عميموتوا شباب
حتى صرت وئت شوف شي ختيار بالشارع
شوية تانية راح أؤولو ...شو عمتساوي هون ....
اتصلت مع رفيئي مشان عزيه و شوف ترتيب و مراسم الدفن و العزاء
بفقيدون.......
وكنت شوية تانية راح أؤلون مبروك محل ما عزيون
وئت عرفت كمانة انو ابوهون مات موتة طبيعية
اللهم صلي على سيدنا محمد
توفي كبير بالعمر و بشكل طبيعي الله يتم عليه و عليون ...!!!!
استغربت وئت لائيت نبرة من الفرح بصوت ولادو
استغربت !!!!!! و
التلون ايمتا الدفن ...؟؟؟؟
صاروا يضحكوا !!!!!!!!
و آلولي دفن شو ....!!!!!!
سألتون طيب ما بدكون تغسلوه ..
صاروا يضحكوا ...!!!!!!!!
آلولي تغسيل شو ...؟؟؟؟؟؟
المهم فوتوني بالحيط
الت لحالي عجب المي مئطوعة
و لا شو القصة
طيب سألتون التعزية ايمتا ووين ........
آلولي ...نحن بعصر السرعة
شررف لعندنا على البيت هللأ و على الحارك ...
على الحارك ...!!!!!
(أوووف لي كل هالسرعة ...)
التلون ممكن صلي العصر و اجي
آلولي يا الله انت المرحوم كان يحبك بنستناك شوية
بس ما تتأخر .....
صليت تلت مدري اربع مدري خمس ركع عصر
و حملت حالي ركيض مشان لححئ التعزية ...
و على الطريئ عمؤول الله يرحمك يا أبو غازي ....
........يتبع ........