السلام عليكم
شكرا ابو حكيم و الشكر موصول كذلك لكافة الاعضاء و ادارة المنتدى على المعلومات عن سعر الدولار و الذهب و التي تصل بسرعة من كافة محافظات سورية الحبيبة . و الشكر ايضا للتحليلات العلمية و التوقعات المبنية على اساس علمي و مستندة الى دراسة لوضع الدولار و الليرة والذهب و المركزي .
اخي ابو حكيم انا رسمالي كلو بضاعة ( و كلها بضاعة انتاج محلي 100 % ) و ما بفهم بالدولار و الذهب و ما بيلزمني غير لما كنت سافر سياحة لبرا او لما بدي ابعت مصاري لبرا و لما كان يتوفر معي شوية ارباح زيادة عن راس المال بالسنوات السابقة كنت اشتري عقار . بس عم لاحظ انو راسمالي ثابت تقريبا و زميلي تاجر البضاعة المستوردة او حتى يلي بتدخل بصناعتها موادة مستوردة راس مالو عم يتضاعف . يعني انا كان عندي كمية زيت زيتون و سمن و لبن و جبن ...الخ زاد سعرا بس كانت قيمة هالبضاعة عالذهب كذا غرام ذهب , و ع الدولار كذا الف بس هلق عم احسبها ما عم تزبط معي صارت قيمتا حوالي النص و يمكن اقل .
اخر مرة اشتريت دولار لحتى ابعت لإبني يلي عم يدرس برا سورية ( طبعا ع حسابي ) كان 125 ليرة . هالشي خلاني فكر اني حول نص راسمالي لذهب او دولار و خلي النص التاني بضاعة . ( يعني نص عاقل و نص مجنون ) .
للعلم للاخوة الاعضاء اسعار بضاعتنا المحلية المنتجة ( مشتقات الحليب ) مازادت عن اسعار السنة الماضية كتير بالعكس في بعض الاصناف ارخص شوي من العام الماضي بس زادت كتير اسعار العبوات ( بلاستيك او تنك ) و زادت كتير اجور الشحن و كلفة التخزين بالبراد و التكاليف كلها بشكل عام . و بالنسبة لزيت الزيتون البكر لولا يكون موسم الزيت الماضي مضروب بإسبانيا و زاد سعر الطون عالميا . ما كان زاد سعرو عنا ( صار شوية تصدير) و مع ذلك ما زال سعرو بسورية اقل من نص سعرو بالدول المجاورة و يا دوب عم يجيب للمزارع كلفة انتاجه.
و ما ننسى انو هالمنتٍج للزيت او لمشتقات الحليب ( الانتاج الزراعي و الحيواني ) هوي بالنهاية مواطن و بيشكلو اغلبية من الشعب السوري عايشين من هالعمل و كل معامل الصناعات الغذائية قطاع خاص او عام معتمدة على المادة الاولية حتى تبقى شغالة .
ملاحظة للإدارة زر الشكر لا يظهر عندي .