عضوية مميزة
تاريخ التسجيل: Apr 2009
المشاركات: 4,860
شكراً: 67,497
تم شكره 35,134 مرة في 4,783 مشاركة
الليرة الانجليزية الأصلية والتجارية .
كان جدي رحمه الله حاسس حالي متل الحسن دو ( يعني التاني ) بلغة الفرنجة
عمل خطاب مرة وعم يحكي عن أبوه ، ورد في الخطاب ترحم على والده وأمواته أكثر من 30 مرة في خطاب من خمس دقائق
لأ وبيتكي عليها بسماجة ويقول : كان ابي رحمتو اللهي عليهي .. وهكذا
بنرجع بعد الغلاظة متل العادة لموضوعنا ، من عند جدي .
كان يحمل ليرة عثملية ( كانت بهديك الأيام تساوي 22 ليرة سورية ) يضعها منفردة بجيب الفراطة بالبنطلون ( السروال بالعربي )
بقيت في ذهني وكنت أجد فيها منتهى الحكمة وخصوصا أنني رجل حويط .
وعندما كبرت وشببت عن الطوق صرت اشتري قمصان ملونه لحرماني منها على اساس عند أمي الأبيض سيد اللبس ، وصرت اشتري ليرات ذهبية ، للادخار فقط، بعد ان علمت ما حل بمضاربات أبن الراجحي اللي تختخ بالحبوس .
الذهب مغري ، لذلك استلط أبي على هالسوسة وصرنا نعمل دراسة عن الذهب ، فأبي مثلا قبل ان يشتري سجادا عجميا ، اشترى كتاب بسعر 175 استرليني وأتقن الصنعة ثم اشترى ، الله يرحمو على هالورته ، عايشين بأرهاب من العث والرطوبة ، وكل سنة عندنا بلوة نفتلين وصابون وشامبو وفلفل ، أغلى من ثمن سجادة وطنية .
المهم بنرجع للذهب .
في انجليزي أصلي وفي تجاري
كل ليرة عليها تاريخ ، اشترينا واحدة أصلية (تعتبر أثرية حاليا ) وانتبهنا لتاريخها ، وأخرى تجارية ولم نغفل تاريخها المكتوب عليها .
أكملنا المصلحة بميزان صغير ، وبمكبر 1/10 وبوشنا على البيت .
رنينا التنتين على البلاط ، نفس الصوت
وزناهن ، نفس الوزن
قلبنا حسب ما قالو :
هنالك فرق بالعين ، ما وجدنا !
رجل الحصان ما في خلاف
طيب دنبو ، نفس الشي
تفحصنا بالمكبر ميللي ميللي وجه وقفا
لولا التاريخ كنا ضعنا
الزنار الخارجي ودقة مسنناتو ، تحرم عليه إذا في فرق
تطابق 100%
بعد ان اشترى والدي رحمتو اللهي عليهي كم وحده ، جاء بقرار أن نشتري تجاري ونريح راسنا . على اساس أكتر من القرد ما مسخ الله .
أنا موسوس واعتبرت اللي مو أصلية متل اللي بلا وضوء
شكوت لأحد الأصدقاء وكان عامل حاله بيفهم بكل شي رجال كبير ومختم اسمالله عليه
قللي بكرا بروح معك وبدلك شلون تشتري
والله ما كذبت خبر تاني يوم أخذته معي إلى الراجحي
قلنالو بدنا ليرات ذهب ، طلع كيس صغير مشنوق ، فك رقبتو ، وفردو على الرخامة .
مددت يدي فقال لي الخبير ، لألأ هي بلاها خود هي ، وهكذا وبعد جهد ومفاضلة انتقينا الأصليات وتحاشينا التجاريات . 16 ليرة طلعت روحنا .
عاد البائع ، شقفة ولد ما بيعبي العين ، قلنالو شفلنا ياههون هدول كلهم أصليات ؟
قال بدكم أصلي ؟
قلنالو طبعا شفلنا ياهون ، وضعهم على الرخامة وجمع الكل في الكيس ، افتكرناه زعل !
شنق الكيس وطالع واحد تاني وفردو ، وقال خدو من هدول !
صرت خجلان عن الخبير المطلع ، بس هو متعود ما كتير همو .
اخذنا الليرات وغادرنا
يتبع ، صار الغدا .