Damaslover

السلام عليكم،

الى الإخوة الأعزاء:

1- تعليقي الأول كتبت انو :(ما بئول هالخطوة رح تنهي التهريب بشكل كامل او فعال، و لكن ما سيتم توفيره رح ينعكس جوا البلد)

2- الأخ مجد : انا مقيم يالكويت و دارس بمصر 6 سنين يعني بعرفها لمصر داخلي خارجي، الرواتب ياللي عم تحكي عليها اتوفرت جديد و بالقطاع الخاص و بعد ماكان الدولار ب 4 جنيه هلأ عحيطان ال 7

3- الأرقام ياللي جبتها أكيد مو من خيالي و لا أحلامي و لا شماعاتي، ئبل ما أكتب الرد تبعي، فتحت الانترنت و عملت بحث على الرواتب و اسعار المحروقات بلبنان و الأردن، و بامكانك التأكد بقيامك بالبحث

4- الأخ عابر، برجع بأكد اني ما عم بحمل التهريب سبب مشاكلنا، و لكنه واقع و موجود، و عن استخدام اللبنانيين للمازوت للتدفئة، فانا ما فين اكد كلامك او انفيه و بحاجة لمصدر، و لكن من حوالي 3 سنوات كان في تقرير عالجزيرة، عن اللبنانيين ومشاكل الكهرباء و التقنين و استعمالهم لمولدات الكهرباء المعتمدة على البنزين والمازوت، فمو شرط المازوت للتدفئة

5- أخ غسان، كلامك 90% صحيح، لكن المازوت سلعة متل اي سلعة تانية، و متل أي محصول زراعي يتم تضمينه، و تجار التهريب و سرقة الشعب بيكونو ضامنين كمية لشي سنتين 3 لادام، هاد على كلام بعض مين الهم علاقة بالمهربين و العلم عند الله

نقطة أخيرة بحب وجهها للجميع، مين ما كنت تكون مؤيد و لا معارض، اذا ما كنا على قلب بعض و اتخلينا عن انانيتنا، في اشياء كتير رح نحس بخسارتها اكتر من مازوت و خبز


تحياتي للجميع

تعديل اضافي:

1- أخ مجد يمكن انت ما سافرت برة سوريا و شفت شوارع الاردن و مصر، ما رحت عالقاهرة و الجيزة و امبابة و مساكن عين شمس و العشوائيات و مساكن القبور، لا تشوف شارع ميدان لبنان او مصر الجديدة و تقارنو بكل سوريا، انا ئلت بمشاركة سابقة انو المصريين عندهم ثقافة السكن بالاماكن الجديدة اقوى من عننا و هي شغلة تعتبر جديدة ابتدأت باواخر التسعينات، عندك مثلا 6 أكتوبر، تخطيطها كان بالسبعينات و كانت جاهزة للسكن بأواخر الثمانينات، بعام ال 99 كانت القهوة ياللي منئعد فيها بتسكر عالخمسة المسا و مافي الدومري بالشارع، عمي ئللو لأابي كيف بترمي ابنك هيك بمنطقة مافيها الا كلاب، بحكم سكن الجامعة ياللي كنت فيو هي العمارة الوحيدة الموجود ضمن حي كامل، طبعا 6 أكتزبر هل غير و بتنافس القاهرة بالحياة ياللي فيها.

2- عم تحكي عن الغاز و الكهرباء، مصر منتجة للغاز و يتم توصيل الغاز بالانابيب للبيوت، و منشان هيك سعرو رخيص، المهرباء عم تئئلي رخيصة، يمكن لأنو اغلب المصريين ما بيستعملو مكيفات كلو مراوح و تدفئة كهربائية خفيفة، و السبب الجو العام المعتدل بمصر.

برجع بئلك معلوماتي هي مو من خيالي انا عشت هنيك و بعرف شو هي مصر، و اخي هلأ أهر سنة هنيك و اخبار مصر و احوالها متجددة عندي، هاد غير السفريات لهنيك عند الحاجة


تحياتي للجميع، و سوريا فوق الجميع