اقتباس:
المشاركة الأصلية كتبت بواسطة لقماان
...........رغيف الخبز في حلب..........
(بحثت عن رغيف الخبز لم أجده في حلب.... رأيت الناس تتزاحم على الصمون فحلمت بأنني حصلت عليه و سرحت بأفكاري و كتبت............................)
بعد ما نزحت بحلب و أعدت عند عديلي و كأني فهمت منو انو مافي خبز...التلوا انا نازل على العزيزية و بجيب معي خبز سياحي اذا ما لائيت ....
الساعة عشرة بشارع الشلالات بالعزيزية مافي الدومري ماشي وأفت هيك أنا و موظفين بنك بيمو برا عمنشوف طيارات الهليوكبتر وين عمتضرب ....
سألني واحد أولتك وين عمتضرب ..
جاوبتو بدون ما أتفرج عليه هللأ الاتجاهات ما بعرفا بس يمكن هون قاضي عسكر و باب الحديد و الميسر
سألتوا أنا و بدون ما اتفرج عليه
و هديك الطيارة ....
جاوب ....يمكن صلاح الدين و السكري
و تيناتون بعدين بيسلموا على باب الجنين.....
راح كل واحد على شغلوا بدون ما يتفرج على التاني و عيونا معلقة بالسما .....
المهم سحبت مصروفي من البنك باعتبار الواحد ما عاد يسترجي يترك ألف ليرة بجيبتوا ....
و مشيت دور على خبز ما لائيت ...
دخلت على السوبرماركت تبعيت العزيزية ....
دورت ما لائيت ...سألتوا بالحمصي ..ما في عنكون خوبز أخي.....
تفرج علي هيك باستغراب ....خوبز ..لساتكون بحومص بتتذكروه للخوبز ......
خبز ...من وين و كيف بدنا نجيب خبز ....
التلوا بألبي أنا شغلتي أعرف كيف بدك تجيبا للخبزات
ان شاء الله تجيبا بهي الهليوكبتر المهم بدي خبز...
فتلت كل المحلات يلي بالطريق ما لائيت ....
طلعت على الأشرفية ..و هنيك بسوق الخضرا لائيتلمون المئات من العالم متجمعين و بابدون مصاري ....و عميدافشوا بعضون ...
ألت لحالي مافي كلام أكيد هدول الشباب وائفين على دور الخبز ....طبعا آصد الخبز السياحي ....
أما الخبز أبو يلي أبو الربطة بخمسطعش...
فمافي ولا فرن شغال ....بقدرة قادر ....و فجأة صار في أزمة خبز بحلب ....؟؟؟؟؟؟؟؟!!!!!!!!
حطيت راسي بين هالروس و ألت يا أطاع الروس..
و أدفش هيك بالخمسين ليرة مشان ياخدوها مني ...
المهم كيف و شلون بعد شي نص ساعة ...طارت الخمسين من ايدي .......
و انزت كيس صخن على ايدوا ....حضنتوا هيك متل ما بتحضن الأم ابنا و ركضت فيو .....
و ما هديت الركيض شوي الا لخوفي من الهليوكبتر تشوفني عمأركض بسرعة و أنا ضامم شي على صدري بيؤولوا أكيد هاد شي انتحاري ....
و يؤوموا ...يناولونا يلي فيو النصيب من فوء ....
من فوء .....من عندون.....
المهم أنا و هيك عمأمشي بسرعة شافني رجالل ختيار يا دوبوا عميئدر يمشي ......
و فتح تموا بسرعة و راح تطير بدلة سنانوا ...
و سألني خاي ...من وين جبت هالصمونات ....
أنا هون متل شي واحد انكتت عليه طاسة مي باردة عفوا يا ربي شي طاسة مي سخنة بالشوب و بالصيام ......التلوا و ألبي صار يدق ...
أيو صمونات حجي ...
أشرلي على الكيس يلي معي ...هدول الصمونات خاي .....نيالك ما شاء الله عنك شو محظوظ ...
الي من السبعة بكير عدور و ما عميصيرلي ....
تفرجت هيك على الكيس فاذا به يا سبحان الله صمون
و الصمونة جنب اختا الصمونة .......
تذكت وأتا ماري انطوانيت و مقولتا الشهيرة
ليش طالعين الناس بهالمظاهرة ...آلولا مشان الخبز...
آلتلون ...خليون ياكلوا كعك مو أحسن.....
.......لا خبز في حلب الا على قناة الدنيا .....
.......لا خبز في حلب الا على قناة الدنيا .....
.......لا خبز في حلب الا على قناة الدنيا .....
|
حالنا بحلب اليوم بالنسبة لتاريخ 27-07-2012
بموضوع الخبز ... غير قابل للمقارنة . بس صامدون وبكل حيادية