عضوية مميزة
تاريخ التسجيل: Dec 2010
الدولة: سوريا /حمص
المشاركات: 5,510
شكراً: 18,885
تم شكره 22,038 مرة في 4,797 مشاركة
هل يجوز شراء أثاث بيت مسروق ان كان منزلك قد سرق
مساء الخير
باعتبار مشرفي القسم الديني هم اخوتي المدام أم حمزة و أبو حمزة ..........
و النا زمان ما شفنا مشاركات لألون ....
و أكيد هنن دايئة خلائؤون من هالحالة
و باعتبار الوضع كتير مكركب بحلب .....
راح اسأل سؤال لألون بالدرجة الأولى و للجميع ....هذا السؤال كنت قد سألته لأحد المشايخ في حمص و سأنقل لكم الحوار الذي جرى بيني و بين الشيخ:
لقمان : شيخي بيجوز الواحد يشتري أثاث بيت مستعمل رخيص كتير و هو شبه متأكد انو الأثاث و الأدوات الكهربائية مسروقة ...
الشيخ و هو مستغرب و أظهر مظاهر الغضب : طبعا ما بيجوز.........
لقمان : شيخي ليش رأسن عصبت و جاوبت بدون ما تستفهم مني ...اي جدي بيعرف يجاوب هيك جواب بهالسرعة ...و أنا ما رحت لعند جدي الله يرحمو جاي لعندك لأسألك شيخي لأنو أكيد في شي جديد بحاجة للاجتهاد مشان هيك بدي اسألك........
الشيخ بعد ما رجعتلوا الطمأنينة :تفضل يا ابني
لقمان : شيخي أنا أكبر منك بالعمر شلون عمتؤوللي تفضل يا ابني ......
الشيخ طيب تفضل يا أخي
لقمان : شيخي هللأ شراء المسروقات حرام..
بس بدي ياك تفكر بهالطريقة
هللأ أنا أو غيري من يلي انسرق بيتون...
راحوا لعند يلي سرق بيتي أو بيت أخي أو رفيقي و اشتروا من عندوا الأثاث المسروق بيكون هيك حرام .........
الشيخ :ابني اذا نفس عفش بيتك بتوقع ما فيا شي و لو انك عمتشجع السارق على السرقة
لقمان : شيخي هللأ أنا بدي توقعاتك شو نحن بمسابقة من سيربح المليون .....
طيب راح أجاوبك و لنفترض جدلا انوا هو ما نفس عفش بيتي .......
الشيخ : ابني ما بيجوز .......
لقمان : شيخي لا تعصبني التلك أنا أكبر منك بالعمر لسا بتؤولي ابني
الشيخ : سوري ماي برازر .....
لقمان : ما شاء الله عنك يا شيخي عمتحكي انكليزي كمان بس انا انكليزيتي كمانة رائعة اسأل أهل سيريا ستوكس عنا و راح ترجملك شو الت ....
سوري هو أخوي...........
طبع أخوي صحيح سوري نازل قتل في
بس هي كمانة قابيل قتل هابيل ...معناتوا شو ما صار بيضلوا اخوة .....
الشيخ : و هو يبتسم .....لاء لاء ....
عمألك أنا آسف يا أخوي .....
لقمان :شيخي أنا مانا شيخ بس بطلب منك تفكر بآلية التفكير التالية حتى تلاقيلي فتوى شرعية للصالح العام ........
هللأ فينا نجمع كل يلي مسروقة بيوتون و نعتبرون فريق أو شخص واحد .....
و نجمع كل يلي سرقوا بيوت العالم اذا ادرنا نجمعون و نعتبرون فريق واحد ....
فاذا واحد من يلي انسرق بيتوا راح اشترى عفش بيت من عند واحد من السارقين
فينا نعتبر انوا الواحد الذي يمثل الكل قد اشترى جزء مما سرق منه .........
مو هيك أحسن للصالح العام ...يعني السارق بدو يسرق و لو بدو يحرقون يعني انا ماني عمشجعوا على السرقة ....
بعدين من كتر ما سرق ما عاد يعرف شو بدو يساوي بالمسروقات ....
يعني ركب شاشة بلازما بكل أوضة و ركب وحدة بالمطبخ ووحدة بالحمام ووحدة على السطح ووحدة على باب البيت اي شو بدو يساوي بالعشرين شاشة الباقيين و هيك كمان أوضة الضيوف ....يعني حتى على السطح حط طقم الستيل و بالحمام كمانة حط طقم شو بدو يساوي بالعشرين الباقيين
الشيخ و هو صفنان ...........
و الله هيك ما عندي جواب راح اسأللك و جاوبك ............
و لحد هللأ يا جماعة الشيخ ما جاوبني و سوق المسروقات بحالة انتعاش و موقعوا معروف لكل أهالي مدينة حمص .....
أصلا بكل مدينة في سوق اسموا سوق الحرامية
و باعتبار سوق الحرامية القديم في حمص يقع في منطقة ساخنة فانتقل متل بقية الأسواق الى مناطق آمنة بل شديدة الأمن ..........
و الغراض عمتنباع فيو بتراب المصاري ...
فأرجوا من المشرفين الكرام على المنتدى الديني مساعدتي ...صحيح هنن مشرفي هالقسم حلبية .....و عينون محمرة مني و لأنون عميتهموني انو خربتلون الدنيا بجيتي على حلب .....آل رجلي خضرة ...و كنت ا}ولون خطي أخضر مو رجلي خضرة بس عبس ما كانو يوءتنعوا (يقتنعوا بس قيلت باللهجة الحلبية )
بس بوعدون بس يلاقولي جواب عن هالفتوى انو اترك حلب و سافر لوين :
خلوني شطب الورقة ...
هللأ حمص مشي حالها
الشام كمان مشي حالها
اللاتئية مسقط رأسي كمان مشي الحال
حلب ...اي خربنا الدنيا بحلب ...
ريف حلب الشمالي ...اي صار ريف تركيا الجنوبي ....
ما بائي الا
الرقة و طرطوس .........
و بالرقة ما بعرف حدن
و بطرطوس النا صحباتنا
الاخوة عبد الكريم و الأخ هشام و الأخ القبطان محمد ............و في بحر كمان و
و عميل منيح يا لقمان و كب ببحر طرطوس .........
يالله شدو حالكون يا مشرفي حلب و جاوبوني مشان لحق اطلع على طرطوس دوبو لسا في شمس .......................
......................................
__________________
أبو حكيم الدين