مدينة حمص ممسوكة بقبضة أمنية حديدية
..................................................
هلكني هالعفريت الحمصي و هو عميؤول :
أكلت يوم أكل الثور الأبيض......
قلت لحالي هالعفريت بس شاطر بالتنظير
لسا بيؤول أكلت يوم أكل الثور الأبيض ...
طيب يا أيها التور الحمصي الأبيض عفوا
يا عفريت مدامك لساتك عايش و مافي أشطر منك بالحكي معناتوا ما راح حدن ياكلك ...
حل عني و بدال ما تنظر روح لاقيلي محل مشان نام فيو بحمص ....
هون سبحان الله اختفى العفريت و كأني قلت أعوذ بالله من الشيطان الرجيم ..لسرعة اختفائه ......
المهم صرت فكر وين بدي أنام ....
رحت شفت كذا واحد من رفقاتي كلون يسلموا علي و ما حدن يؤول اتفضل .......
كلون يخصموها و يقولوا ...وين بداك تنام و شلون بدك تدبر حالك .......
آل شلون بدك تدبر حالك ...والله على أساس أنا شادد ضهري فيك يا حبيبي ....
المهم طرقت عدة أبواب من أبواب معارفي الأغنياء بحمص و ما أكثرهم!!!!!!!
قلت في نفسي بيضل الغني عندوا مقدرة أكتر على التحمل من الفقير ...في استقبال ضيف بدون موعد في هذه الظروف ......
لكن للأسف كل واحد من هالأغنياء صار يتهرب بأسلوب و بطريقة ما عهدتها سابقا منهم ........
والله صعبت علي نفسي و كادت الدمعة تنفر من عيني و أحسست بغربة و كربة في مدينتي مدينة حمص ..........
خفف عني تذكري أن المصاب كبير و الله يساعد العالم و الناس كل واحد همه لفوء راسو..........
قلت لنفسي لماذا أدق باب الأغنياء
لماذا لا تدق باب أصدقائك الفقراء.......
تذكرت أحد أصدقائي الفقراء لكنه يعيش في حارة الأغنياء عمره خمسة و ثمانون عاما و هو يعيش وحيدا......
طرقت بابه و أنا في قمة الحياء و الخجل فتح لي الباب و كاد يطير فرحا و سلم علي سلاما حارا
أنساني برودة سلام معارفي الأغنياء .........
رائد المسرح الحمصي أيام الانتداب الفرنسي
الذي أبدع مع الكاتب المسرحي الكبير مراد السباعي رحمه الله أجمل المسرحيات الوطنية و المقاومة و التي ما زال يتغنى بها المثقفون الحماصنة و منها ......مسرحية معركة في طاحون ...........
الرجال قا لي تفضل ....و أنا من ناحيتي قعدت عندوا واحد و عشرون يوما و أنا أبحث عن مكان للاقامة و لم أجد ....
و طلعت من عندوا لأني صرت استحي أؤعد أكتر من هيك ....رغم اصراره أن البيت بيتي .............
بالفعل الحياة مواقف و الشغلة ما شغلة مصاري يلي بدوا يوقف جنب محنة أخوه بيقدر يوقف و لو كان هو بمحنة ...لأنو على النية الطيبة الله بيبارك و بيسر الأمور ....
المهم تاني يوم نزلت على المعمل........الطريق سابقا كان خمس دقائق و الآن 45 دقيقة لأنو بدنا نطلع على الوعر بعدين على تحويلة مصياف و بعدين نرجع ندخل حمص من المدخل الشمال .....
الحمراء هاد الحي الراقي ماديا......... يلي ما كنت تشوف فيو حركة بالشارع...هدوء .......
كانت حتى القطاط يلي بالشارع فيو غير شكل ...بتلائيا هيك ربيانة على الدلال...وو مربربة من السمنة و هيك بتحكي عفوا بتنوي من راس مناخيرها..
يعني بالحقيقة الواحد بيستحي يؤولا يا قطة ....بتلائي باللاشعور عميعيطلا ...يا أؤتة....بيخاف تنجرح مشاعرها .......
بعكس قطط شوارع الفقراء يلي بتحسا جاية من الصومال من كتر مانا ضعيفة و هي مقطوع دنبا و هي مكسورة رجلا ....... و هي مشحورة ....
صار شارع الحمرا الهادئ يلي أتاتوا غير شكل
صار هللأ كلو بياعين وبسطات دخان و تياب و مصلحين وبياعين خضرة و زحمة كتير ...عالم غريبة عن الشارع....
عالم آعدة بالمدارس و ناس بالجوامع و ناس بالدكاكين .....يعني للمفارقة
الجماعة كانوا ساكنين في أفقر أحياء حمص ....تشردوا الى أغنى أحياء حمص .....
سبحان الله كل شي بهالدنيا الو محاسن و الو مساوئ.....
المهم وصلت على المعمل بعد المرور على العديد من الحواجز ...و كلوا بيطلب هوية الشباب بالتحديد و ممكن يضربا على الفيش و بيفتش ....أحيانا بتوصل المسافة بين الحاجز و الحاجز الى أقل من 200 متر ...؟؟؟
و كل حاجز ما الوا علاقة بالحاجز التاني ممكن يرجع يفتشك من أول و جديد و يضرب هويتك على الكمبيوتر..
وصلت على المنطقة الصناعية بحمص و هي على طريق حماة بتشعر بوحشة شديدة .....
كل المحلات مسكرة و ما في حركة.........يا الله من وين عمتاكل و تشرب أصحاب هي المحلات .....
يعني الصمت رهيب في المنطقة الصناعية لولا زقزقة العصافير و صوت الانفجارات الرهيبة التي تحدث في حي القصور و الخالدية و جورة الشياح الملاصقة تقريبا للمنطقة الصناعية ......
استقبلني موظفو و عمال الشركة بحرارة و غمروني بلطفهم .....
لكن الجهاز الاداري في المصنع استقبلني ببرود....و كأنه سيغص....
حتى أن أحدهم ...أخذته الدهشة و قال لي بالحرف شو جابك من حلب على الخطر .....
قلت له و الله كنت ابعتلي راتبي أو شي عيش منو ما كنت اجيت على الخطر لعندك ....
هون استدرك الاداري و شعر بالخجل ليس من الموقف لأنه لو كان يخجل منه لما قام به بالأصل
و انما خجل من وضوح الرد الذي أنطقني به رب العالمين .....
و قال اذا هيك هادا شي تاني......أهلا و سهلا فيك .......
طبعا كمانة هنن معذورين ...الوضع صعب على الكل و الأهم من هيك ....كتير من شغلي الو علاقة بالبنوك وشركات التأمين و شركات الصرافة و غرفة التجارة و التأمينات......و هدول كلون هللأ مسكرين بحمص ...
فتت على مكتبي و أول شي عملتوا عبيت كاسة مي و تناولت كمشة درة بيضا من يلي عندي بالمكتب و فتحت باب البرندا ....
و بالعادة بس أعمل هيك بتهجم العصافير لتاكل و تشرب متل العادة كل يوم ....
بس هالمرة حتى العصافير ما عرفتني ...
و مع هيك ...سكبتلا المي و رميتلا الدرة و الت لحالي في كل كبد رطبة أجر
سواء اتعرفوا عليك و لا لاء ..........
رميت الدرة و قلت لحالي عجب الناس يلي مانا عرفانة تدبر حالا
عجب ...عميلتقى مين يفكر فيا و لا لاء ...و لا بس شاطرين متل حكايتي باطعام العصافير بس ...
.................................................. ....
طبعا أصوات القصف و الانفجارات لا تهدأ بحمص .....
بتحس بحالك وأت بتمشي بحمص انك جوات سجن كبير .....
في كام حارة يلي آعدة الناس فيا فوء بعضا.....على راس مفرء كل حارة في حاجز و بالنهار بيفوتوا العساكر و الأمن و المداهمة بكل حرية على أيو محل بدون ياه و بتلائي بقية العالم كاسرة عينيا بالأرض........
بس للأمانة مافي عسكري بيغلط بحق المدنية ...الا الاستثناءات ......و حتى على الحواجز ....باين انوا في تعليمات شديدة انون يكونوا لطفاء مع الناس المسالمين يلي هربانين من بيوتون و جاييين ساكننين هون..
هاد الشي بالنهار ....بس بالليل ...الوضع غير ....بالغالب هناك التزام أدبي ...بممنوع التجول ليلا...
و لكي تحافظ على هذا الالتزام....جرب أن تمشي ليلا من مفرق لمفرق ستجد من يصيح عليك و يقول تعى لهون ولا ... ....طبعا انت ما راح تسترجي تروح لعندون بتؤول هنن مترين بقطعون و بخلص
أحسن ما روح لعندون و ما بعرف شو يلي بدو يصير.....بتزت حالك هيك متل
الغزال ....غزال ...مو اياد غزال .....
و بيبلش الرصاص يلعلع فوق رأسك .....طبعا للأمانة لا يقصد به الاصابة و انما التخويف...هذا في أحياء النزوح أما في الأحياء الساخنة و ما أكثرها في حمص .....فلا صوت تنبيه ....
و استبدلت اشارة ممنوع المرور .....بالقنص .......
فيرى المحظوظون ما حدث بمن يقترب من خطوط التماس في تلك الأحياء
و بتوارد نقل حالات القنص على ألسنة الناس ..... يصبح عندك معرفة بأن هذا الشارع عليه اشارة خفية و هي ممنوع المرور ......................
أقرب نقطة وصلتها باتجاه بيتي هي على بعد 2 كيلو متر بالغوطة حيث يمكنك رؤية الدمار الهائل و الذي لن تسعفني أحرفي في نقله لحيي جورة الشياح و القرابيص ............
الى من يعرف مدينة حمص و لا يحب المخاطرة .........
اقطع الطريق من سوق الجنزات بالدبلان من عند دار الثقافة الشعبية باتجاه شارع الحمراء شارع فلافل الفيصل و انظر على يمينك و انت تمشي بسرعة لتصعق بحجم دمار جورة الشياح.........
سترى مشهدا قد يصيب رجليك بالسكون ........لا تقف يا حبيبي و تذكر ما ينتظرك ان أطلت الوقوف و النظر ....وستجد و يا سبحان الله ....كيف أن رجليك ستستعيدان عافيتهما ..........
بالفعل مدينة حمص ممسوكة بقبضة أمنية من حديد فولاذ
.....................................

(شكرا لكم اخوتي في هذا المنتدى الرائع
شكرا لكل من سأل عني أو علق على مشاركاتي أو وضع مشاركة كانت تحتم علي الرد .....اعذروني
و عذري هو اني أحبكم ...لذلك لا أترك أي فرصة مهما كانت صعبة للتواصل معكم الا و أقوم بها .....لكن هذه الأيام الفرص قليلة وربما تكاد تكون نادرة..........
سلامي لكم جميعا و أخص بالذكر من يعرف نفسه منكم .........
......ومن منكم لا يعرف نفسه ........
...و الله هادا سلام حمصي تمام.....