عضو أساسي
تاريخ التسجيل: Jan 2011
المشاركات: 4,237
شكراً: 6,342
تم شكره 10,276 مرة في 3,461 مشاركة
رد: صالون سيريا ستوكس لايام السبت 18-8 -2012 وعطلة العيد لغاية الجمعة
الشام ريحة القهوة... الشام سيران يوم الجمعه ياعند موره ببلودان يا عند أبو وحيد بالفيجة... الشام التفتيله بالشعلان وأبو رمانة و باب توما والأحلى بالشام القديمة مع فطور ببيت جبري... الشام السهر برمضان للصبح.... الشام الحميديه وبكداش... الشام قلعة دمشق ونزار قباني.... الشام صوت الله أكبر بالجوامع ... الشام مية بردى والياسمين والتفاح والكرز والجوري والزنبق البلدي... الشام اللي بس تطلع منا نهار بتحس بالغربه... الشام لويعرفوا الشام؟؟ الشام لمة الصبايا ع صحن تبوله... وأكلة الصبارة بساحة الروضة... الشام فنجان قهوه مع فيروز وكسر سفره بمكدوسة وكاسة شاي وخبزه مقمره عالصوبيا... الشام الغدا الساعه ٣ صحن حراق أصبعو وكوسا محشي وشاكرية ومشاوي... الشام ضجة الولاد بالباحه... الشام معرض دمشق الدولي وفيروز .. الشام لو يعرفوا شو الشام؟؟ الشام الكنافه من عند نبيل نفيسه والزحمه بسوق الحميديه... الشام باب شرقي وباب الجابيه... الشام التكسي الأصفر .. الشام بسطات الفستق الحلبي بأيلول وطرطشة السيارات بمطرة تشرين وطابات التلج المرصوصه رص بكوانين... الشام السبع بحرات والقصاع وباب توما والمالكي والصالحية والحمرا والمهاجرين ... الشام البيوت العتيقه المعربش عليها الياسمين ... الشام بوز الجدي وقهوة الروضة وبروستد الباشكاتب وبياعين الفلافل وفرن العابد... الشام سبيل المي اللي مابيخلي حدا عطشان... الشام الناس بتسلم عليك بالطريق كأنا بتعرفك من مية سنه... الشام الدفا بعد البرد... الأم يلي بتلم... الشام أمان بالروح قبل المطرح... الشام بأهلها وسكانها... الشام زفة العروس وعراضة العريس للصبح... الشام العزه والكرامة... الشام بالحزن تمسح دمعتك وبالفرح بتزلغطلك... الشام الحكي عنها ما بيخلص...... الله يحميك يا شام
__________________
• للرجل العظيم قلبان : قلب يتألم و قلب يتأمل .