مجرد إنسان

عزيزتي فيروز...

كنت حابب خبرك أنو جسر اللوزية فجروه.
ودروب الهوي انقطعت... لأنو في دواليب شاعلة...أو حاجز....
وماعاد عم ينطّرونا عمفرق دارينا... هلق عم ينطرونا عالحاجز اللي قبله.
... وطريق النحـــل ماعاد حدا عم يسترجي يمشي عليه خوفاً من شي عبوة ناسفة...أو قذيفة... أو شي قنبلة صوتية.
والبوسطة يلي كانت تنقلنا من ضيعة حملايا لضيعة تنورين عم تروح فاضية... لأنو العالم ميتة رعبة من طرقات السفر.
وصرنا بدل ما نسمع صوت المهابيج ... عم نسمع صوت ار بي جي وبي كي سي وهاون ورصاص وروسيات.
والسيارة مش عم تمشي، لأنو ماضل معنا حق بنزين.
والقهوة اللي عالمفرق سكرّت... و صرفت الشغّيلة.
وجوزها لأم سليمان ما طلع عم ياكل رمان بالحقلة... طلع مخطوف... وام سليمان باعت اللي فوقها واللي تحتها لحتى تطالعو.
و بعد ما ضاع شادي، استشهد جورج وأحمد وعلي وطوني واسماعيل وعمر وحسين.
وما عاد فيكي تقطفي ولا زهرة حمراء... لأنو الزهر اصفَرّ من خجله قدام دموع الأمهات، ويبس لأنو المي مقطوعة متلها متل الغاز والمازوت والبنزين.

لذلك... أنا قررت آخد هالناي وغني... بلكي هالعالم تصحى بقى... و تتذكر أنو سوا ربينا.

__________________
{بل نقذف بالحق على الباطل فيدمغه فإذا هو زاهق ولكم الويل مما تصفون}