عضو أساسي
تاريخ التسجيل: Jan 2011
المشاركات: 4,237
شكراً: 6,342
تم شكره 10,276 مرة في 3,461 مشاركة
رد: جلسة صالون سيريا ستوكس ليومي الخميس 1والجمعة 2 -12-2011
تفضل اخ غالب والموجودين صحتين وهنا
الشيشبرك اكلة ممكن كتير تضيف لها او تنقص بحسب ذوق الشخص وما يحب
مقادير العجينة:
2-كأس طحين منخول .
ملعقة صغيرة ملح
ملقعة كبيرة زيت
نخلط الطحين والملح والزيت و بعدين نضيف الماء شوي شوي ونعجن هتبقى العجينة طرية وما بتلزق باليد
ونتركها شي نصف ساعة ترتاح او ساعة مع تغطيتها بمنشفة مبلولة
مقادير الحشو :
نصف كيلو لحمة مفرومه
كميه بقدونس مفرومة صغير كتير (في ناس ما بيحطوها )
بصلة كبيرة مفرومة ناعم كتير كمان
ملح ،فلفل، بهار
نقلي البصلة لحد ما تدبل مش تنحرق او يتغير اللون
نضيف اللحمة والملح والبهار ونقليها بشكل جيد
اخر شي نضيف البقدونس
ونترك اللحمة لتبرد ونحاول نشفها من الزيت لانه ما بيخلي العجينة تقفل اذا كان كتير
نرق العجينة منيح بالشوبك او بألة العجين
نقطع العجينة بكاسةمدورة بس صغيرة او بألة التقطيع وكل ما كانت الدائرة اصغر اطيب واحلى ومنظرها حلو اكتر
بعد ما نقطع العجينة بشكل دائري ناخد كل دائرة ونضع بداخلها نصف ملعقة صغيرة من الحشو
ونقفلها على بعض بشكل هلال بعدين ناخد طرفين الهلال ونلزقهم ببعض متل الصورة
ملاحظة (اذا بتحبوا تشيلوها فى الفريز دخلواها متل ما هى ولما يجمد العجين حطوها بكيس نايلون حتى ما ياخد حجم )وتنطبخ بأي وقت
ومن الممكن أن نشوي الشيشبرك قبل الطبخ حسب الرغبة
طبخ اللبن :
3علب لبن زبادي العلبة 400غرام
3 ملاعق كورن فلاور (نشاء)كبار بس ممسوحين
وإذا كان اللبن طازد مو مبستر ما يحتاج للنشاء بس بيضة مع الخفق
ملعقة صغيرة ملح وبعدين ممكن نزيد الملح حسب الذوق
نضربهم بالخلاط اونخلطهم كويس اوى ونضعهن على نار متوسطة مش عالية حتى ما يلزق اللبن و نحرك ونحرك ونحرك ليغلي اللبن
نسقط الشيشبرك بهدوء ونتركه على نار هادية حوالى عشر دقايق لانه العجينة رقيقة وصغيرة
نحط ملعقة كبيرة سمنة ونضع نعناع ناشف وفصين ثوم مدقوقين
نحمرهم بشكل جيد ونضعهم فوق اللبن قبل ما نطفي بدقيقتين
وتقدم مع طبق من الرز
وممكن ينطبخ بمعجون الطماطم للي مايحبو الزبادي يذوب معجون الطماطم مع الماء ويضاف قليل من الملح والنعناع والثوم ويوضع إما بالفرن أو على الغاز
ويقدم أيضا" مع الرز أو بدونة حسب الرغبة وصحتين وعافية
__________________
• للرجل العظيم قلبان : قلب يتألم و قلب يتأمل .