رد: جلسة صالون سيريا ستوكس ليومي الخميس 22 والجمعة 23 - 09 -2011
مساء الخير للجميع دون استثناء أكيد
جلسة اليوم مع أني لا ناوي بيع ولا ناوي اشتري كانت متعبة جدا ، حتى الشكر كان عم يعلق الصفحة ، وكل ما أنقل على صفحة جديدة كانت الصفحة تكربج ويطلعلي ياصفحة بيضة يا خطأ ، غيرت متصفحي من سيء لأسوأ . أنتو عم تشتكوا من موقع السوق ، أنا المنتدى بذاتو ما كان عم يشتغل معي . ومن بين ما تفتح الصفحة بكون نسيت شو بدي أكتب .
لسا ما صار الصندوق والناس اندفعت على الأسهم متل لقمة الغلا ، بكرا بس يوصل الصندوق شو بدو يصير ، يمكن لا خطوط هاتف ولا موبايل ، والكي بورد يشعل نار ، ورح ينزل الدولار للواحد وأربعين وأقل .
ممكن لهداك الوقت يكون تحسن السوق ، من دهنو سقيلو ، وما يعود في حاجة للصندوق وما يتابعو حدا لانتفاء السبب .
لا بد أن من باع واشترى اليوم ساهم في رفع الروح المعنوية ، ولا بد أن ذلك أدى إلى ارتفاع الأسعار ، ولكن هل الارتفاع حقيقي ؟ أم مجرد عرض وطلب لأسهم هبط سعرها ثم ارتفع ضمن اطار مجموعة مضاربين محددة محليا . يعني مثلا لو كان معي أسهم عشرة وقيمتها مئة ليرة وارتفع السعر واشتراها مني مضارب آخر بمئة وعشرة ، يعني هي الأسهم هي هي ولكنها كانت عندي بسعر عشرة للواحد وانتقلت لغيري بسعر إدعش ( هي ما حدا بيقولها غير الشوام ) وين الناتج القومي ؟ وين الربح ؟ لمين فرحانين نحنا وبمين شمتانين ؟ أنا أخدت عشر ليرات من جيب أحد إخوتنا بالمنتدى وعطيت العشر أسهم نفسهم اللي كانوا عندي ليصيرو عندو . لو بقي السعر منخفض لي وله ما المشكلة ؟ هي مشكلة الوسطاء وعمولة السوق وهم أصحاب الفائدة الأوائل في رفع السعر لترتفع قيمة نسبتهم . لا أدري ولكن ألا يعني هذا أنه علينا أن نكون كلنا مجموعة واحدة بمواجهة الغريب أو الهامور أو الحوت ؟
أتساءل دائما كلما قيل مبروك ! كأننا بعنا أو اشترينا من العدم . طيب الطرف الآخر لما اشترى أو باعنا شو مشكلتو ؟ أجدب مثلا ؟! .
تناهى إلى سمعي صوت أم كلثوم تغني : قد يكون الغيب حلوا ولكن الحاضر أحلى ، هاج الحضور وطيبولها وصفروا . سرحت بخيالي وتصورت لو كانت كلمات الأغنية بالمقلوب لتصبح : قد يكون الحاضر حلوا ولكن الغيب أحلى . هل كان خيم الوجوم على الحضور وغادروا الصلة أم كانوا هاجوا وصاحو وصفروا أيضا .
معذرة إذا كنت مملا ولكن نحن هنا في استراحة وصالون خواطر وتسلية وأحببت مداعبة دوائر المنطق في تلافيف العقل العجيب .