عضوية مميزة
تاريخ التسجيل: Oct 2009
الدولة: سورية
المشاركات: 5,533
شكراً: 9,602
تم شكره 8,287 مرة في 3,384 مشاركة
رد: شو فطرت اليوم؟؟
اهلا مدام رندة....
مابعتقد كوردون بلو... لانو هو قال صدر دجاج فوق صلصة بيضاء.. ماجاب سيرة انو محشي...
وشهيتوني الباسمشكات لازم قدم طلب لأمي بركي بتوافق على طبخها ههههههه
بالنسبة للدجاج بالفرن رح اعطيكي وصفة سريعة وطيبة كتير كتير....
وهي الشباب بيعملوها بسهولة...
عدة قطع صدر دجاج
فنجان زيت زيتون
فنجان ليمون
ملح- بهار- فلفل
هيل مطحون ملعقة كبيرة
ثوم مدقوق ملعقة ونص كبيرة... ...
علما انو اساس الخلطة هي الثوم والهيل.... لانو رح تعطي مزيج نكهة هائل... وهدول رح يشكلوا مع الليمون والزيت نوع متل صلصلة مع الدجاج...
قليل من الكمون ... ممكن فليفلة حمرا مطحونة....
على فكرة انا بحط المقادير بدون تحديد.. يعني على النظر... بس عم حاول اعطي كميات تقديرية...
بتتركي المزيج منقوع قد مابتقدري... ساعتين تلاتة منيح... وبعدها بتحطيها بالفرن... يمكن بدو شي نص ساعة ليستوي... احيانا بنحط بالصينية بطاطا شرائح واحيانا لاء.. على هوا المزاج....
هلق بقى نفس هي المقادير ممكن تعدليها وتعمليها شيش طاووق....
بدال شرائح الدجاج بتحطي دجاج مقطع... نفسه تبع الشيش...
بتحطي نفس المقادير... انا بضيف الها احيانا ملعقتين كتشب... مشان اللون والنكهة...
بعد النقع... بتحطيهن بطنجرة على النار وبتقلبيه كم دقيقة لحتى تشوفي انو القطع صار فوقها طبقة استواء خفيفة... مابعرف شو بيسموا هي العملية لكن اكيد بتعرفي كيف... بس الشرح للشباب...
لانو قال اذا تغطى الدجاج اول مابينحط على النار مابيعود بيستوي منيح..ليش مابعرف.... المهم بعد شي 3 دقائق على النار بتضيفي شي فنجان مي او كاسة شاي مي... وبتغطي الطنجرة وبتتركيها.... وهيك لحتى يستوي الدجاج... المفروض يطلع طري ومعه الصوص اللي تشكل من الزيت والليمون وبقية المكونات...
وهي الاكلة احيانا اذا موجود فطر فريش بنحطه معها بيطلع كتير طيب...وبالمناسبة نكهة التوم مابتضل واضحة.. بتتغير كتير... يعني لاتخافوا انو تطلع نكهته قوية....
بس مو تحطوا نص كيلو توم بعدين تجوا تقولولي مو طيبة... هو بالحقيقة تحديد هي المقادير هو اللي بيفرق بين طبخة وتانية... وهو بذاته النفس بالطبخ....
وفيكي تعمل بطاطا مقلية او تساوي الشيش سندويش.. اللي هو... كل مرة شكل....
وصحتين والف هنا...
__________________
اللهم إنه لا مانع لما أعطيت...ولا معطي لما منعت